ಶಾಶ್ವತವಲ್ಲ

 

ಉರುಳುವ ಚಕ್ರ ಉರುಳುತ್ತದೆ

ಭಾರ ಬಿದ್ದಲ್ಲಿ ಕುಗ್ಗುತ್ತದೆ 

ಪುನಃ ತಿರುಗಿದಾಗ ಹಿಗ್ಗುತ್ತದೆ 

ಮರದಲ್ಲಿ ಹಣ್ಣು ತುಂಬಿ ತುಳುಕುತ್ತದೆ 

ಅತಿಯಾದಾಗ ಬಾಗುತ್ತದೆ 

ತೂಕ ಕಳೆದಾಗ ತಲೆ ಎತ್ತುತ್ತದೆ 

ಮಳೆಗೆ ಹೊಳೆ ಉಕ್ಕಿ ಹರಿಯುತ್ತದೆ 

ಇಳೆಯ ಬೆಳೆಯನ್ನು ಕೊಚ್ಚಿ ಸೆಳೆಯುತ್ತದೆ 

ಅಬ್ಬರ ನಿಂತಾಗ ಪ್ರಶಾಂತವಾಗುತ್ತದೆ 

ಬದುಕು ಕಷ್ಟಗಳನ್ನು ಕೊಡುತ್ತದೆ 

ತಡೆಯಲಾರದಂತೆ ಕಂಗೆಡಿಸುತ್ತದೆ 

ಸಮಯ ಕಳೆದಾಗ ಸುಖ ನೀಡುತ್ತದೆ 

ವೈರುಧ್ಯ

 

ಕೊಟ್ಟಾಗ ಕೈಲಾಸಕ್ಕೇರುತ್ತೆ

ಕೊಡದಿದ್ದಾಗ ಪಾತಾಳಕ್ಕಿಳಿಯುತ್ತೆ

ಬೇಡಿದಾಗ ಬೆಟ್ಟ ಹತ್ತುತ್ತೆ

ಅಸಡ್ಡೆ ಮಾಡಿದಾಗ ಪಟ್ಟ ನೀಡುತ್ತೆ

ಪ್ರಯತ್ನ ಪಟ್ಟಾಗ ದೂರ ಸರಿಯುತ್ತೆ

ನಿರ್ಲಕ್ಷಿಸಿದಾಗ ಹತ್ತಿರ ಬರುತ್ತೆ

ಕಾದಾಗ ಬಾರದೇ ಇರುತ್ತೆ 

ಕಾಯದಿದ್ದರೆ ಕಾಲ ಬಳಿ ಬೀಳುತ್ತೆ

ಹಿಂಬಾಲಿಸಿ ಹೋದರೆ ತಪ್ಪಿ ಹೋಗುತ್ತೆ

ಗಮನ ಕೊಡದಿದ್ದರೆ ತಾನಾಗೇ ಸಿಗುತ್ತೆ

ಆಸೆ ಪಟ್ಟರೆ ನಿರಾಸೆ ಆಗುತ್ತೆ

ನಿರೀಕ್ಷೆ ಮಾಡದಿದ್ದರೆ ಕೈಗೆಟಕುತ್ತೆ

ಅಮ್ಮ

 

ನೀನು ಹೋದ ಮೇಲೆ ಮತ್ತೆ 

ಬಂದು ನನ್ನ ಗಂಟಲಲ್ಲೇ ಕುಳಿತಿದ್ದೆ

ಮಾತಾಡಲು ಬಾಯಿ ತೆರೆದರೆ 

ಕಣ್ಣೀರು ತರಿಸುತ್ತಿದ್ದೆ 

ಅಡುಗೆಮನೆಯಲ್ಲಿ ಪಾತ್ರೆ ಲೋಟಗಳಲ್ಲಿ 

ಎಲ್ಲೆಲ್ಲೂ ಸದಾ ಕಾಣಿಸಿಕೊಳ್ಳುತ್ತಿದ್ದೆ 

ಏನಾದರೂ ತಿನ್ನ ಹೊರಟರೆ ಗಂಟಲುಬ್ಬಿಸಿ 

ಅಗುಳಗುಳಿಗೂ ನೀರು ಕುಡಿಸುತ್ತಿದ್ದೆ 

ಕಛೇರಿಯಲ್ಲಿದ್ದಾಗ ಆಗಾಗ ಕೈಯಲ್ಲಿ  

ಫೋನ್ ಹಿಡಿಯುವಂತೆ ಮಾಡುತ್ತಿದ್ದೆ 

ವಾಸ್ತವ ನೆನಪಾಗಿ ಫೋನ್ ಬದಿಗಿಟ್ಟು 

ಬಿಕ್ಕಿಬಿಕ್ಕಿ ಅಳುವಂತೆ ಮಾಡುತ್ತಿದ್ದೆ 

ದಾರಿಯಲ್ಲಿ ಸಿಗುತ್ತಿದ್ದ ಆಂಬುಲೆನ್ಸ್ ಗಳ 

ಒಳಗೆ ಕುಳಿತು ಗಾಬರಿ ಹುಟ್ಟಿಸುತ್ತಿದ್ದೆ 

ಒಂದೇ ಉಸಿರಲ್ಲಿ ವಾಹನ ಚಾಲನೆ 

ಮಾಡುವಂತೆ ಮಾಡುತ್ತಿದ್ದೆ 

ಕೆಲ ವರ್ಷಗಳು ಕಳೆದ ಮೇಲೆ 

ಗಂಟಲಿಂದ ಮೆದುಳಿಗೇರಿದೆ 

ಹುಟ್ಟು ಸಾವು ನೋವುಗಳನ್ನು 

ವಿಶ್ಲೇಷಿಸಿ ತಿಳಿಯುವಂತೆ ಮಾಡಿದೆ 

ಅದಾದ ಮೇಲೆ ಕೆಳಗಿಳಿದು ನೀನು 

ನನ್ನ ಹೃದಯದೊಳಗೆ ಕುಳಿತೆ 

ಹೆಜ್ಜೆಹೆಜ್ಜೆಗೂ ಜೊತೆಗೆ ನಡೆಯುತ್ತಾ 

ದಾರಿ ತೋರಿಸುತ್ತಾ ಉಳಿದೆ

ತುಂತುರು

 

ತುಂತುರಿನ ತೇರಿನಲ್ಲಿ

ಕಂಪನದ ಭೇರಿಯಲ್ಲಿ

ಮಂಪರನು ತೊಡೆದು 

ಸೊಂಪಾಗಿ ನಲಿಯಿತು

ಚುಮುಚುಮು ಚಳಿಯಲ್ಲಿ

ಜುಮುಜುಮು ಮುದದಲ್ಲಿ

ಘಮಘಮ ಮಿಂದು ಮಿನುಗಿ

ಫಳಫಳ ಹೊಳೆಯಿತು

ಸ್ವಾತಂತ್ರ್ಯದ ಕೆಚ್ಚಿನಲಿ

ಅಭ್ಯುದಯದ ಹುಚ್ಚಿನಲಿ 

ಬಾಂಧವ್ಯದ ಅಚ್ಚಿನಲಿ 

ನೆಚ್ಚಿ ಮೆಚ್ಚಿ ಕುಣಿಯಿತು

ಮೌನದ ಮರೆಯಲ್ಲಿ

ಸತ್ಯದ ಒರೆಯಲ್ಲಿ

ನಾಚಿಕೆಯ ಕಣ್ಣಿನಲ್ಲಿ 

ಪ್ರೀತಿ ಹೃದಯದಲ್ಲಿ ಮೆರೆಯಿತು

ಶ್ರೀಮಾತೆ

 

ಮಾತೆಯ ಮೈ ಮೇಲೆ ಮಣಭಾರ ಚಿನ್ನ 

ಕೇಳುತಿರುವಳು, ಯಾಕೆ ಎಳೆಯುವಿರಿ 

ಮೋಹ ಜಾಲಕ್ಕೆ ಎನ್ನ 

ಇವೆಲ್ಲಾ ಕೇವಲ ನಿಮಗೇ ಚೆನ್ನ 

ನಾನಿದಕೆಲ್ಲ ಅತೀತಳಲ್ಲವೇ

ಅರ್ಥ ಮಾಡಿಕೊಳ್ಳಿ ನನ್ನ 

ನನಗೆ ಬೇಡ ಈ ಸ್ವರ್ಣ, ಅದರ ಬಣ್ಣ 

ನೀವೆನ್ನ ಮಕ್ಕಳು ಇದನಿಟ್ಟುಕೊಳ್ಳಿ

ನಾನೆಡುವೆ ನಿಮ್ಮ ಕಡೆಗೆ ನನ್ನ ಕಣ್ಣ 

ನಡೆದರೆ ಸನ್ಮಾರ್ಗದಲ್ಲಿ ಸಂಪನ್ನ

ತೊಡೆಯುವೆ ಕಷ್ಟ ಕಂಟಕಗಳನ್ನ

ನೀಡುವೆ ಸದಾ ಸೌಭಾಗ್ಯವನ್ನ

ಭಕ್ತಿಯ ಎಣ್ಣೆಯಿಂದ ಉರಿಸಿ

ಅಧ್ಯಾತ್ಮ ಜ್ಞಾನ ದೀಪವನ್ನ 

ಹರಸಿ ಕಾಯುವೆ ನಾ ಸರ್ವರನ್ನ

ಮಕರ ಸಂಕ್ರಾಂತಿ

ಹೊಸತು ಹೊಸದಿನ ಸಂಕ್ರಾಂತಿ 

ತೊಡೆದು ನಮ್ಮೆಲ್ಲಾ ಭ್ರಾಂತಿ

ಹೊಸೆದು ನಗುವಿನ ಹೂ ಬತ್ತಿ

ಉರಿಸುವ ನವ ಚೈತನ್ಯ ಶಕ್ತಿ 

ಮಕರ ಸಂಕ್ರಾಂತಿಯ ಶುಭಾಶಯ.

-ಪೂ.

15-01-2026

ಕೊಂಡಿ

ಮಳೆಗೆ ಒದ್ದೆಯಾದ ಮೈ

ಮುದ್ದೆಯಾದ ಬಟ್ಟೆ

ಗಾಳಿಗೆ ಒಣಗಿದ ಬಟ್ಟೆ

ಬಿಸಿಲಿಗೆ ಬಿಸಿಯಾದ ಮೈ

ಕಾಫಿಯಲ್ಲಿ ಕರಗಿದ ಸಕ್ಕರೆ

ಮನದಲ್ಲಿ ಮೂಡಿದ ಅಕ್ಕರೆ

ಹರಡಿ ಹಂಚಿದಾಗ ಅಕ್ಕರೆ

ಪಾಲಿಗೆ ದೊರಕಿದ್ದು ಸಕ್ಕರೆ 

ಕೊಳದಲ್ಲಿ ಈಜುವ ಮೀನು

ನಿಂತು ಕಾಯುವ ಕೊಕ್ಕರೆ

ಮೀನು ಹಿಡಿಯುವ ಕೊಕ್ಕರೆ

ಸಂತಾನ ಬೆಳೆಸುವ ಮೀನು

ನಮ್ಮೊಂದಿಗೆ ಇರುವುದು ಉಸಿರು 

ಉಸಿರಿದ್ದರೆ ಎಲ್ಲವೂ ಹಸಿರು 

ಉಸಿರಿದ್ದರಷ್ಟೇ ಉಳಿವುದು ಹಸಿರು

ಹಸಿರುಳಿದರಷ್ಟೇ ಉಳಿವುದು ಉಸಿರು