ಅಮ್ಮ

 

ನೀನು ಹೋದ ಮೇಲೆ ಮತ್ತೆ 

ಬಂದು ನನ್ನ ಗಂಟಲಲ್ಲೇ ಕುಳಿತಿದ್ದೆ

ಮಾತಾಡಲು ಬಾಯಿ ತೆರೆದರೆ 

ಕಣ್ಣೀರು ತರಿಸುತ್ತಿದ್ದೆ 

ಅಡುಗೆಮನೆಯಲ್ಲಿ ಪಾತ್ರೆ ಲೋಟಗಳಲ್ಲಿ 

ಎಲ್ಲೆಲ್ಲೂ ಸದಾ ಕಾಣಿಸಿಕೊಳ್ಳುತ್ತಿದ್ದೆ 

ಏನಾದರೂ ತಿನ್ನ ಹೊರಟರೆ ಗಂಟಲುಬ್ಬಿಸಿ 

ಅಗುಳಗುಳಿಗೂ ನೀರು ಕುಡಿಸುತ್ತಿದ್ದೆ 

ಕಛೇರಿಯಲ್ಲಿದ್ದಾಗ ಆಗಾಗ ಕೈಯಲ್ಲಿ  

ಫೋನ್ ಹಿಡಿಯುವಂತೆ ಮಾಡುತ್ತಿದ್ದೆ 

ವಾಸ್ತವ ನೆನಪಾಗಿ ಫೋನ್ ಬದಿಗಿಟ್ಟು 

ಬಿಕ್ಕಿಬಿಕ್ಕಿ ಅಳುವಂತೆ ಮಾಡುತ್ತಿದ್ದೆ 

ದಾರಿಯಲ್ಲಿ ಸಿಗುತ್ತಿದ್ದ ಆಂಬುಲೆನ್ಸ್ ಗಳ 

ಒಳಗೆ ಕುಳಿತು ಗಾಬರಿ ಹುಟ್ಟಿಸುತ್ತಿದ್ದೆ 

ಒಂದೇ ಉಸಿರಲ್ಲಿ ವಾಹನ ಚಾಲನೆ 

ಮಾಡುವಂತೆ ಮಾಡುತ್ತಿದ್ದೆ 

ಕೆಲ ವರ್ಷಗಳು ಕಳೆದ ಮೇಲೆ 

ಗಂಟಲಿಂದ ಮೆದುಳಿಗೇರಿದೆ 

ಹುಟ್ಟು ಸಾವು ನೋವುಗಳನ್ನು 

ವಿಶ್ಲೇಷಿಸಿ ತಿಳಿಯುವಂತೆ ಮಾಡಿದೆ 

ಅದಾದ ಮೇಲೆ ಕೆಳಗಿಳಿದು ನೀನು 

ನನ್ನ ಹೃದಯದೊಳಗೆ ಕುಳಿತೆ 

ಹೆಜ್ಜೆಹೆಜ್ಜೆಗೂ ಜೊತೆಗೆ ನಡೆಯುತ್ತಾ 

ದಾರಿ ತೋರಿಸುತ್ತಾ ಉಳಿದೆ