ಎಂತು ಏಕೆ ಗೊತ್ತಿಲ್ಲ ಯಾರಿದು ಏನೆಂದು ತಿಳಿಯುತ್ತಿಲ್ಲ
ಹುಡುಗನೊಬ್ಬನಿಲ್ಲಿ ಪರಿವೇ ಇಲ್ಲದೆ ತಣ್ಣಗೆ ಮಲಗಿರುವನಲ್ಲ
ಎದುರು ಬರುತ್ತಿದ್ದ ಕಾರಿನ ಚಾಲಕ ಇವನುಳಿಸಲು ಕಂಬಕ್ಕೆ ಗುದ್ದಿ
ಅದರಲ್ಲಿದ್ದ ಹಿರಿಜೀವ ಗಾಬರಿಯಲ್ಲಿ ಇಹ ತೊರೆಯಿತಲ್ಲ
ಅಪ್ಪ-ಅಮ್ಮ, ವೃದ್ಧ ಮಡದಿ, ಮಕ್ಕಳು ಸಂಕಟದಿ ಅಳುತಿಹರು
ದಿಗ್ಭ್ರಾಂತರಾಗಿದ್ದರೂ ಆರಕ್ಷಕರಿಲ್ಲಿ ಕರ್ತವ್ಯ ನಿರತರಾಗಿಹರು
ಸೇರಿದ ಜನ ಹೆತ್ತವರನ್ನು ಅನಗತ್ಯ ಮಾತಲ್ಲೇ ಚುಚ್ಚುತಿಹರು
ಬೇಡದಿದ್ದರೂ ಮಿತಿಮೀರಿ ಮಿಶ್ರ ಪ್ರತಿಕ್ರಿಯೆ ನೀಡುತಿಹರು
ಬಾಳಿ ಬದುಕಬೇಕಿದ್ದ ಕುಡಿ ಬೇಜವಾಬ್ದಾರಿಯಿಂದ ಕಮರಿತು
ಬಾಳ ಸಂಜೆಯಲಿದ್ದ ಮರ ಮುದುಡಿ ಕುಸಿದು ಮೌನವಾಯಿತು
ಅಪ್ಪ-ಅಮ್ಮ, ಮನೆಮಂದಿ ಜೀವನಪರ್ಯಂತ ದುಃಖವುಣಬೇಕು
ಹೆತ್ತ ತಪ್ಪಿಗೆಂಬಂತೆ, ತಪ್ಪಿಲ್ಲದೆಯೂ, ಕರ್ಮಫಲ ಅನುಭವಿಸಬೇಕು
No comments:
Post a Comment