ಸಾರು-ನಾರು

ಇಂದು ಊಟಕ್ಕೆ ಸಾರು, ಇದನು ಕೇಳಿದವರು ಯಾರು

ತಿಂದು ಉಪ್ಪು ಕಮ್ಮಿ ಎಂದು ಹೇಳಿದವರು ಯಾರು

ಬಂದು ನಿಂದು ಬೆಂದು ಜೊತೆಗೂಡಿದವರು ಯಾರು

ಎಂದು ನೀ ಸಾರು,  ಬೇಕಾದರೆ ಬೇಗ ಬಳಿಸಾರು

ಊಟದಲ್ಲಿ ಖಚಿತ ಉಚಿತ ನಾರು

ಇಲ್ಲವೆಂದು ಗೊಣಗಿದವರು ಯಾರು

ಕಷ್ಟ ಗೊತ್ತಿಲ್ಲದಿರುವುದಕ್ಕೇ ಕೊಳಕು ನಾರು

ಬೇಡ ಬರೀ ಒಣ ಮಾತಿನ ದರ್ಬಾರು

ಭಾಗ್ಯ - ಯೋಗ್ಯ

ವರುಷದಾದಿಯಲಿ ಹೊಸ ಹಾದಿಯಲಿ 

ಸಿಕ್ಕಿರುವುದು ನಮಗೆ ಭಾಗ್ಯ

ಅಂಡು ಸುಟ್ಟರೂ ಮಂಡೆ ಕೆಟ್ಟರೂ

ನಮಗದೇ ಸೌ-ಭಾಗ್ಯ

ಮುಂದೊಂದು ದಿನ ನಾವೇ ಆಗುವೆವು ಭೋಗ್ಯ

ಆಗ ಪರಿತಪಿಸ ಬೇಕಾಗುವುದು ನಮ್ಮ ದೌರ್ಭಾಗ್ಯ

ಈಗಲೇ ಎಚ್ಚೆತ್ತರೆ ನಡೆಯುವುದೆಲ್ಲ ಯೋಗ್ಯ

ಆಗ ಮಾತ್ರ ಉಳಿಯುವುದು ಆಯುರಾರೋಗ್ಯ

ಧೀಮಂತ ದೊರೆತಾಗ ನೆಮ್ಮದಿಯು ಲಭ್ಯ

ಭಾಗ್ಯಗಳ ಅಳಿಸಿ ಬಲ ನೀಡುವ ಸಭ್ಯ

ಯೋಚಿಸಿ ಹೆಜ್ಜೆ ಇಟ್ಟರೆ ಸಿಗುವುದು ಸೌಲಭ್ಯ

ಕಿಸುರು ಕೊಸರುಗಳು ಅಲ್ಲಿ ಖಂಡಿತಾ ಅಲಭ್ಯ

ಸಾಧ್ಯ - ಅ - ಸಾಧ್ಯ

ಅಸಾಧ್ಯವನ್ನು ಸಾಧ್ಯವಾಗಿಸ ಬಹುದೇ

ನೀ ಮನಸು ಮಾಡಿದರದು ಸಾಧ್ಯ

ಸಾಧ್ಯವನ್ನು ಅಸಾಧ್ಯವಾಗಿಸ ಬಹುದೇ 

ಇಲ್ಲಸಲ್ಲದುದಕ್ಕೆ ಕಿವಿಗೊಟ್ಟರೆ ಅದೂ ಸಾಧ್ಯ

ಸಾಧ್ಯಕ್ಕೆ  ' ಅ ' ಸೇರಿದರಷ್ಟೇ ಅಸಾಧ್ಯ

' ಅ ' ವರಿವರ ಮಾತು ಕೇಳದಿರು ಸದ್ಯ 

ಅರಿತರಂತರಾತ್ಮದ  ಮಾತೇ ನೈವೇದ್ಯ

ಆಗಷ್ಟೇ  ಗೆಲುವಿನ ಮೆಟ್ಟಿಲೇರಲು ಸಾಧ್ಯ

ಮತ್ತೆ ಸಿಗದು

ಅಪ್ಪ ಇಲ್ಲ ಅಮ್ಮ ಇಲ್ಲ 

ಇದ್ದಾಗ ಬೆಲೆ ಕೊಡಲಿಲ್ಲ 

ಪ್ರೀತಿ ಮಮತೆ ಸಾಲಲಿಲ್ಲ 

ಈಗ ಪಡೆವ ಭಾಗ್ಯವಿಲ್ಲ

ಕೊಟ್ಟ ಕಿರುಕುಳ ಕಮ್ಮಿ ಇಲ್ಲ 

ಪಶ್ಚಾತ್ತಾಪ ಪಟ್ಟೇ ಇಲ್ಲ 

ನಿನಗದರ ಅರಿವೇ ಇಲ್ಲ 

ಅವರು ತಿಳಿಯಗೊಡಲಿಲ್ಲ

ಅವರ ಮನವ ಅರಿಯಲಿಲ್ಲ

ಜೊತೆಗೆ ಸಮಯ ಕಳೆಯಲಿಲ್ಲ

ಪ್ರೀತಿಯಂತೂ ತೋರಲಿಲ್ಲ

ಮಾತು ಕೂಡ ಆಡಲಿಲ್ಲ

ವಾಸ್ತವವ ಗ್ರಹಿಸಲಿಲ್ಲ

ತಕ್ಷಣ ಎಚ್ಚೆತ್ತುಕೊಳಲಿಲ್ಲ 

ಕಳಕೊಂಡ ಮೇಲೆ ಅವರೇ ಎಲ್ಲಾ

ಆದರೇನೂ ಫಲವಿಲ್ಲ

ಒಂದು ದಿನ

ದಿನದಲ್ಲಿ ದಯೆಯಿಂದ

ದಯೆಯಲ್ಲಿ ಪ್ರೀತಿಯಿಂದ

ಪ್ರೀತಿಯಲ್ಲಿ ಹೊಳಪಿಂದ

ಕಳೆಗೊಂಡ ಕಣ್ಮಣಿ ಬೆಳಗು

ದೀಪಾವಳಿಗೆ ದೀವಿಗೆ ಹೊತ್ತು

ಭಾರವಾಗಿ ಬೇಸತ್ತು

ಬಸವಳಿದ ಈ ಹೊತ್ತು

ಬೆಂದು ನಿಂದಿರುವ ಮಧ್ಯಾಹ್ನ

ಯೌವ್ವನದ ಎಸಳ ಸವಿ

ಜವ್ವನದ ಹೆಗಲೇರಿ

ಗವ್ವನೆಯ ನಿಶೆಗೆ ಬೆದರಿ

ಸುಮ್ಮನೇ ಕುಳಿತ ಸಂಜೆ

ಸಾಧನೆಯತ್ತ

ಬದಲಾವಣೆಯನ್ನು ಬರಲು ಬಿಡು 

ಕಾಡುವ ಅಹಮನ್ನು ಬದಿಗಿಡು

ಕೊಂಚ ಕಸಿವಿಸಿ ನುಂಗಿ ಬಿಡು

ಕಣ್ಣ ಪಟ್ಟಿಯ ಸರಿಸಿ ಬಿಡು

ಮನದ ಬಾಗಿಲನು ತೆರೆದು ಬಿಡು

ಹೃದಯ ಕವಾಟವ ಬಿಗಿದಿಡು 

ಟೀಕೆಟಿಪ್ಪಣಿಗೆ ಕಿವಿಗೊಡು 

ಆಲೋಚನಾ ಕ್ರಮವನ್ನು ಹರಿತ ಮಾಡು

ಪರಪ್ರಶಂಸೆಯ ಕಡಿಮೆ ಮಾಡು

ಸ್ವನಿಂದೆಯ ಬಿಟ್ಟುಬಿಡು

ನಿನ್ನೊಳಗಿನ ಧ್ವನಿಗೆ ಗಮನ ಕೊಡು

ಪ್ರಾಮಾಣಿಕವಾಗಿ ಪ್ರಯತ್ನ ಪಡು

ನಿಂತ ನೀರು

ಅರಿತವರಿಗೆ ಅರಿವಿಲ್ಲದೊಡೆ

ನುರಿತವರಿಗೆ ಛಲವಿಲ್ಲದೊಡೆ

ಬೆರೆತವರಿಗೆ ಬಲವಿಲ್ಲದೊಡೆ

ಕಾರ್ಯವನೆಸಗುವುದೆಂತು

ಕಣ್ಣಿದ್ದೂ ಕುರುಡಾದೊಡೆ

ಕಿವಿಯಿದ್ದೂ ಕಿವುಡಾದೊಡೆ

ಕಾಲಿದ್ದೂ ಕುಂಟಾದೊಡೆ

ಜೀವಾತ್ಮಕ್ಕೆ ತೃಪ್ತಿಯೆಂತು

ಅಲ್ಪಕ್ಕೆ ಉಬ್ಬಿದೊಡೆ

ಸ್ವಲ್ಪಕ್ಕೆ ಸೊಕ್ಕಿದೊಡೆ

ಸಮಚಿತ್ತ ಸರಿದೊಡೆ

ಆತ್ಮವಿಶ್ವಾಸಕ್ಕೆ ಜಯವೆಂತು

ದೀಪಾವಳಿ

ಬೆಳಕಿನ ಹಬ್ಬದ ಬೆಳಗಲಿ ಇಂದು 

ಕವಿದಿಹ ಕತ್ತಲೆ ಕರಗಲಿ

ಬಾನಲೂ ಬುವಿಯಲೂ ಎಲ್ಲೆಲ್ಲೂ

ಭರವಸೆ  ಬೆಳಕದು ಹರಡುತಲಿರಲಿ 

ಹಬ್ಬದ ಹರುಷವು ಹಸಿಯಾಗಿರಲಿ

ಹೃದಯದ ಭಾವನೆ ಬೆಚ್ಚಗೆ ಇರಲಿ

ಪ್ರೀತಿಯ ದೀಪವು ಬೆಳಗುತಲಿರಲಿ

ಸಂಬಂಧದ ಸಂಕೋಲೆ ಬಿಗಿಯಾಗಿರಲಿ

ಎಲ್ಲರಿಗೂ ಬೆಳಕಿನ ಹಬ್ಬದ ಶುಭಾಶಯಗಳು.

ಬದುಕು ಸುಂದರವಾಗಿದೆ - II

ಕನಸಲ್ಲಿ ಕನವರಿಸಿ ಮನದಲದನಳವಡಿಸಿ

ಭ್ರಮೆಯಲ್ಲಿ ಬದುಕಿದರೆ ಬದುಕೇನು?

ಕಂಡ ಕನಸ ನನಸಾಗಿಸಲು ಮುನ್ನಡೆಯದೇ

ನಿಂದಲ್ಲೇ ನಿಂದರೆ ಪ್ರಯೋಜನವೇನು?

ಕಷ್ಟಗಳ ಕಟುವಾಗಿ ಬೈದೆದುರಿಸಬೇಕು

ಕಲ್ಲು ಮುಳ್ಳುಗಳ ಸರಿಸಿ ಬದಿಗೊತ್ತಬೇಕು

ಸಾಧನೆಯ ಹಾದಿಯಲಿ ಹೋರಾಡಬೇಕು

ಧೃತಿಗೆಡದೆ ಕೃತಿಗಿಳಿದು ತಲೆಯೆತ್ತಬೇಕು

ಹೃದಯ ಬಡಿದಾಗ

ಎರಡು ಹೃದಯಗಳು ಒಂದೇ ಗತಿಯಲ್ಲಿ ಬಡಿಯುತ್ತಿದ್ದರೆ,
ಭಾವನೆ ಮಾತಿಲ್ಲದೇ ಮಧುರವಾಗಿ ಮನ ತಟ್ಟುವುದು,
ಚೌಕಟ್ಟಿನೊಳಗಿನ ಚಿತ್ರಗಳು ಚಲಿಸಿ ಹೊರ ಬರಲು ತುಡಿಯುವುದು,
ಸುರಿವ ಜಡಿಮಳೆಯೂ ಸಹನೀಯವಾಗಿ ಸುಂದರವೆನಿಸುವುದು.

ಸಮಯ ಸಹಭಾಗಿಯಾಗಿ ಸರಿತಪ್ಪೆಂಬ ಜಿಜ್ಞಾಸೆ ಮೂಲೆ ಸೇರುವುದು,
ಯಾರ ಹಂಗೂ ಇರದ ಮನಸು ಮೈ ಬಿರಿದು ಅರಳುವುದು,
ಕ್ಷಣದಲ್ಲಿ ಹೊಸತನ ತುಂಬಿ ಬೆಸುಗೆಯ ಹಾದಿ ನೋಡುವುದು,
ನೆಮ್ಮದಿಯ ನಿದ್ರೆಯಲಿ ನವಿರಾದ ಸ್ವಪ್ನಗಳ ಬೇಡುವುದು.

ಮನದ ಮೂಲೆಯ ನಾಚಿಕೆ ತೊಡೆದು ಕುಣಿಯುವುದು,
ಇಹದ ಪರಿವಿರದೆ ಭಯದ ಅರಿವಿರದೆ ವಿಹರಿಸುವುದು,
ಸನಿಹದಲಿ ಸಮನಾಗಿ ಸರಿದಂತೆ ಭ್ರಮಿಸುವುದು,
ಭ್ರಮೆಯನ್ನೆ ನಿಜವೆಂದು ಸಂಭ್ರಮಿಸಿ ಸುಖಿಸುವುದು.

Image: Google.co.in