ಋಣಮುಕ್ತ

ಋಣಮುಕ್ತನಾದ ಕ್ಷಣದಲ್ಲಿ 

ಹರುಷ ತುಂಬಿದ ಮನದಲ್ಲಿ

ವರುಷ ಉರುಳಿದ ದಿನದಲ್ಲಿ 

ಅರುವತ್ಮೂರರ ಹಾದಿಯಲ್ಲಿ

ಸಹಚಾರಿಣಿಯ ಒಲವಲ್ಲಿ

ಸಂತೋಷದ ಹೊನಲಲ್ಲಿ

ಪ್ರೀತಿಯ ಬಲದಲ್ಲಿ 

ಎದೆಗುಂದದೆ ಛಲದಲ್ಲಿ

ಧೈರ್ಯದ ನಡೆಯಲ್ಲಿ

ಸಾಧನೆಯ ಹಾದಿಯಲ್ಲಿ

ಯಶಸ್ಸಿನ ಹೊಸ್ತಿಲಲ್ಲಿ

ನಿಂತಿರುವ ನಿನಗೆ ಸಾಟಿಯೆಲ್ಲಿ

ಆತ್ಮವಂಚನೆ

ಅಂಖನಿಯ ಬರಹ ನೀ ಅಳಿಸಬಹುದು

ಲೇಖನಿಯ ಬರಹವನು ಅಳಿಸಬಹುದೇ

ಪರರ ಕ್ಷಮೆಯಾದರೂ ಬೇಡಿ ಪಡೆಯಬಹುದು

ನಿನ್ನ ಕ್ಷಮೆಯ ನೀ ಪಡೆಯಬಹುದೇ

ಸಂಕವನೂ ಸುಂಕವನೂ ಕಟ್ಟಬಹುದು

ಮಂಕಾಗಿರುವ ನಂಬಿಕೆಯ ನೀ ಗಳಿಸಬಹುದೇ

ಅಂಕೆಯಿಲ್ಲದೆ ಬಿಂಕವನು ತೋರಬಹುದು 

ಕಳೆದ ಗೌರವವ ನೀ ಮರಳಿ ಪಡೆಯಬಹುದೇ

ಅಕ್ಕಿ ಆರಿಸಬಹುದು ಹೆಕ್ಕಿ ಜಾಳಿಸಬಹುದು

ಸೊಕ್ಕಿನಲಿ ಸಿಕ್ಕ ನಿನ್ನ ನೀ ಉಳಿಸಬಹುದೇ

ಉಕ್ಕಿ ಹಸಿರಾಗಬಹುದು ಬಿಕ್ಕಿ ಹಗುರಾಗಬಹುದು

ಹಳಸಿರುವ ಸ್ನೇಹವನು ನೀ ಮತ್ತೆ ಬೆಳೆಸಬಹುದೇ

ವಿದ್ಯಕೋಮಲೇ

ರವಿಗೆ ರಂಗೋಲಿ ಬಿಡಿಸಿ

ನೆರಳ ಜೊತೆ ಪೈಪೋಟಿ ನಡೆಸಿ

ದಶದಿಕ್ಕುಗಳಿಗೆಸಳುಗಳ ಹಾಸಿ

ನೋವುಗಳ ಗುಡಿಸಿ ಹಾರೈಸಿ 

ನಲಿವಿನಿಂದ ನಗುತಿರುವ ವಿದ್ಯಕೋಮಲೇ 

ತಾರಸಿಯ ತರುಣಿಯಿವಳು

ವಾರಸಿಯ ಹೆಮ್ಮೆಯಿವಳು

ಕೈತೋಟಕೆಲ್ಲ ಅರಸಿಯಿವಳು

ಬಾರಿಸುವಳು ಜಯದ ಭೇರಿ

ಹರುಷದಿಂದ ಬಾರಿಬಾರಿ ವಿದ್ಯಶ್ಯಾಮಲೇ 

ಕುಂಡದಲಿ ಜನುಮ ತಳೆದು

ಗುಂಡಿಗೆಯ ಅದುಮಿ ಹಿಡಿದು

ಸಂಡಿಗೆಯ ಸಪ್ಪಳಕೆ ಮಂಡಿಯೂರಿ

ಮುಂದೆ ಸರಿದು ಕಂಡಿಯಿಂದ ಇಣುಕಿ ನೋಡಿ

ಚೆಂಡೆಯನು ಬಾರಿಸುವಳು ವಿದ್ಯಕಮಲೇ 

ಅಗುಳು ಅನ್ನ

ನೆನಪಿನ ಶಕ್ತಿ ಉಳಿಯುವುದಕ್ಕೆ

ಆಡಬೇಕು ಸುಡೊಕು

ಬೆಂಕಿಕಡ್ಡಿ ಖರೀದಿಸ ಬೇಕು 

ಬೀಡಿ ಸಿಗರೇಟು ಸುಡೋಕು

ಘಳಿಗೆ ಲೆಕ್ಕ ಹಾಕಬೇಕು 

ಮುಹೂರ್ತವನ್ನು ಇಡೋಕು 

ಸ್ವಪ್ರಯತ್ನವಂತು ಬೇಕೇಬೇಕು 

ಯಾವುದೇ ಚಟ ಬಿಡೋಕು

ನೈಪುಣ್ಯದ ಅಗತ್ಯವಿದೆ 

ಅಡುಗೆಯನ್ನು ಮಾಡೋಕು

ಹಣೆಯಲ್ಲಿ ಬರೆದಿರಬೇಕು 

ಅಗುಳು ಅನ್ನ ತಿನ್ನೋಕು

ಒಳಗಿನ ಕೂಗು

ಒಳಗಿಂದ ಒದ್ದೊದ್ದು ಬರುವುದದು ಕೂಗು

ಮನಸು ಹೃದಯ ಒಟ್ಟಾಗಿ ಅದಕೆ ತಲೆ ಬಾಗು

ಕೂಗಿನ ಆಳ ಅರ್ಥವ ತಿಳಿದು ತಲೆದೂಗು

ನಿರ್ಧಾರ ತೆಗೆದುಕೊಳ್ಳುವಷ್ಟಾದರೂ ನೀ ಮಾಗು

ಹುದುಗದಂತೆ ನೋಡಿಕೋ ಕಾಲ ಕೆಳಗೆ ಜೌಗು

ಸರಿಯುವಂತೆ ನೋಡಿಕೋ ಒಳ್ಳೆತನದ ಸೋಗು

ಕರಗಬೇಕು ಪೂರ್ತಿಯಾಗಿ ದರ್ಪದ ಅರಗು

ಅರಗಬೇಕು ಸಂಪೂರ್ಣವಾಗಿ ನಿನ್ನ ತುಡುಗು 

ಅರಿತುಕೊಂಡರೆ ನೀ ಸನ್ಮಾರ್ಗದ ಸೊಬಗು

ಎಲ್ಲೆಡೆಯಲ್ಲೂ ಪಸರಿಸುವುದು ಅದರ ಮೆರುಗು

ಹಿಡಿದು ನಡೆದರೆ ನಿತ್ಯವೂ ನೀ ಸತ್ಯದ ಅಲಗು

ಸುಲಭವಾಗಿ ಕಳೆವುದದು ನಿನ್ನ ಸಕಲ ಪಿಡುಗು

ಸಜೆ

ರಜೆಯಿಂದು ಸಜೆಯಾಗಿಹುದು

ಪಕ್ಕದಮನೆ ಪೆಯಿಂಟ್ ವಾಸನೆಯಿಂದ

ತಲೆಕೆಟ್ಟು ಕರಡಾಗಿಹುದು

ಹಿಂದಿನ ಮನೆ ಜಾಯಿಂಟ್ ಜಗಳದಿಂದ

ಮುದುಡಿಹುದು ಪೆಯಿಂಟರ್ ನ 

ವದನಾರವಿಂದ

ನೋಡಿದರೆ ಹೃದಯ ಕರಗುವುದಾತನ

ಅಸಹಾಯಕತೆಯಿಂದ

ಮುಕ್ತಿ ಮಾರ್ಗ

ಜಡಿಮಳೆಯಲೊಂದು ಹಿಡಿ

ಅಶನ ದೊರೆತರೆ ಸಾಕೆಂಬ ಕಿಡಿ

ಜನನ ಮರಣದೊಂದು ಗಡಿ

ಹಿಡಿದಿಡುವುದು ನಮ್ಮ ನಾಡಿ

ಬಾಳಬಟ್ಟೆಲಿ ಭಗವಂತನ ನೆನೆದುಬಿಡಿ 

ಸತ್ಸಂಗದಲ್ಲಿ ಸದಾ ಮುಳುಗಿಬಿಡಿ

ಕಷ್ಟ ಕಿರಿಕಿರಿಗಳ ಮರೆತುಬಿಡಿ

ವಿಠಲ ನಾಮವನೊಮ್ಮೆ ಜಪಿಸಿಬಿಡಿ 

ಇರುವಷ್ಟು ದಿನ ಅಲ್ಲಿಲ್ಲಿ ಕಾಡಿಬೇಡಿ

ಪಡೆಯಲು ಯಾಕಿಹುದು ಈ ಗಡಿಬಿಡಿ

ಭವಬಂಧನಗಳ ಕೊಂಡಿ ಕಳಚಿಬಿಡಿ 

ಮುಕ್ತಿ ಮಾರ್ಗದೆಡೆಗೆ ಹೊರಟುಬಿಡಿ

ಪ್ರಯತ್ನ

ಅಕ್ಕ ನಿನ್ನ ಸೊಕ್ಕಿನಿಂದ 

ಬೆಕ್ಕಿಗಿಂದು ಹಾಲಿಲ್ಲ

ಬೇರೆಡೆ ಹೋಗಿ ತಿನ್ನುವುದಕ್ಕೆ

ಪಾಪ ಅದಕೆ ಕಾಲಿಲ್ಲ.

ಕೇವಲ ಬಾಯಿ ಮಾತಿನಿಂದ

ಹಸಿವೆಯೆಂದೂ ನೀಗುವುದಿಲ್ಲ

ಅನುಸರಿಸುವ ಸಲಹೆಯಿಂದ

ಅರಮನೆ ಹಾಳಾಗುವುದಿಲ್ಲ.

ಅಳವಡಿಸುವ ಕ್ರಮಗಳಿಂದ

ಅಶಾಂತಿಯೆಂದೂ ಮೂಡುವುದಿಲ್ಲ

ಕಷ್ಟಪಟ್ಟು ಪ್ರಯತ್ನಿಸಿದರೆ ಮಾತ್ರ

ಬೆಕ್ಕಿನ ಜೀವ ಹೋಗುವುದಿಲ್ಲ.

ವಾಟ್ಸ್ಆ್ಯಪ್ ಗ್ರೂಪ್

ಜನಸಂಖ್ಯೆ ಹೆಚ್ಚಾದರೆ ವ್ಯವಸ್ಥೆ ಕೆಡುವಂತೆ

ಪದಸಂಖ್ಯೆ ಹೆಚ್ಚಾದರೆ ಪದ್ಯ ಕೆಡುತ್ತದೆ

ಅಂಕಿಸಂಖ್ಯೆ ಹೆಚ್ಚಾದರೆ ಲೆಕ್ಕ ಕೆಡುವಂತೆ

ಗಣಸಂಖ್ಯೆ ಹೆಚ್ಚಾದರೆ ಗುಣ-ಮನ ಎರಡೂ ಕೆಡುತ್ತದೆ

ಗಿಡ - ಮರ - ವರ

ಖಾಲಿ ಜಾಗಗಳಲಿ ಗಿಡ ನೆಡದಿದ್ದರೆ ಇಂದೇ

ಅಳುವೆ ನೀ ಮುಂದೆ ನೆಡಬೇಕಿತ್ತು ಅಂದೇ 

ನೆಟ್ಟ ಗಿಡ ಬೆಳೆದು ಮರವಾಗಲೇನು ತಡ

ನೆಮ್ಮದಿಯ ಕ್ಷಣಗಣನೆ ಮನೆಮಂದಿ ಸಂಗಡ

ಮರದಿಂದ ಬೀಜ ಬಿದ್ದು ಹುಟ್ಟುವುದು ಗಿಡ

ಗಿಡದಿಂದ ಮರವಾಗಿ ತೀರುವುದು ನಿನ್ನ ಕಡ

ಮರಗಳು ಬೆಳೆದಂತೆ ಕಾಣಬಹುದು ಕಾಡ

ಗಿಡಬಳ್ಳಿ ಖಗಮೃಗಗಳ ಅಪೂರ್ವ ನಾಡ 

ಹಸಿರ ಉಳಿಸಿದರೆ ಭವದ ಉಸಿರು ಸಾಯ

ಹಸಿರ ಉಳಿಸಿ ಬೆಳೆಸಲು ಹೊಂದು ದೃಢ ಧ್ಯೇಯ

ಮಕ್ಕಳಿಗೂ ಮರಿಗಳಿಗೂ ಮಾಡು ಸಹಾಯ

ಮರವುಳಿಸಿ ಬೆಳೆಸುವುದೇ ಉಳಿದಿರುವ ಉಪಾಯ