ಹೊಸ ದಿನದರ್ಶಿಕೆ 2025

ಇಪ್ಪತ್ತನಾಲ್ಕರ ಹರೆಯ ಕಳೆದು

ಇಪ್ಪತ್ತೈದಕ್ಕೆ ಕಾಲಿಟ್ಟು ಬೆಳೆವ

ಹೊಸ ದಿನದರ್ಶಿಕೆ ತರಲಿ ಸದಾ 

ಸುಖ ಶಾಂತಿ ನೆಮ್ಮದಿಯ.

ಶುಭಾಶಯಗಳೊಂದಿಗೆ,

- ಪೂ. 01-01-2025.

ಉಫ್ ಎಂದು ಊದಿ ಬಿಡಿ

 

ಮನದ ಪೆಟ್ಟಿಗೆಯೊಳಗೆ

ಮುದುಡಿಟ್ಟ ನೋವುಗಳ

ಹೊರ ತೆಗೆದು ಗಾಳಿಗೆ

ಉಫ್ ಎಂದು ಊದಿ ಬಿಡಿ

ಕಷ್ಟಗಳ ಮೆಟ್ಟಿ ನಿಂತು 

ತಲೆಯೆತ್ತಿ ನಡೆಯುತ್ತ

ಸಾಧನೆಯ ಮೆಟ್ಟಿಲನು

ಏರಿ ಬಿಡಿ

ಹೃದಯದೊಳಗಿರುವ

ಪ್ರೀತಿಯನೆಲ್ಲ ಹನಿ ಹನಿಸಿ 

ಹರಡುತ್ತ ಜಗದ ತುಂಬೆಲ್ಲಾ 

ಪಸರಿಸಿ ಹರಿಸಿ ಬಿಡಿ

ಕಂಡಿರುವ ಕನಸುಗಳ

ನನಸಾಗಿಸುತ್ತ ನಗುತ

ಬದುಕಿನ ಪ್ರತೀ ಕ್ಷಣವನ್ನೂ 

ಉಲ್ಲಾಸದಿಂದ ಕಳೆದು ಬಿಡಿ

ರಾಜ್ಯೋತ್ಸವದ ಶುಭಾಶಯ

 

ಭಾಷೆಯ ಕುಲುಮೆಯಿಂದ ಪುಟಿದೆದ್ದ ಕನ್ನಡ 

ಕಲಿತು ಅರಿತವರಿಗೆ ಹೆಮ್ಮೆಯೆನಿಸುವ ಕನ್ನಡ

ವೇಷಗಳ ಹುಡುಕಿ ಕಳಚುವ ಕಸ್ತೂರಿ ಕನ್ನಡ

ಕನ್ನಡಿಗರ ನರನಾಡಿಯಲ್ಲಿ ಕನ್ನಡ, ಕನ್ನಡ, ಕನ್ನಡ

ರಾಜ್ಯೋತ್ಸವದ ಶುಭಾಶಯಗಳು

ದೀಪಾವಳಿ 2024

 

ಮಳೆಯಲ್ಲಿ ತೋಯ್ದ ಇಳೆ 

ಸುತ್ತೆಲ್ಲಾ ತುಂಬಿದೆ ಹಸಿರು ಕಳೆ 

ಎಲ್ಲೆಲ್ಲೂ ಹಣತೆ ದೀಪಗಳೇ 

ಶುಭ ತರಲಿ ಈ ದೀಪಾವಳಿ

ಅಂತಸ್ಥ

 

ಅವರಿವರ ಅರಿವಿನಲ್ಲಿ

ಅಳಿದುಳಿದ ಚೂರುಗಳಲಿ

ಅಡಗಿ ಕುಳಿತಿರುವ ಭಾವನೆಗಳಲಿ

ಬದ್ಧತೆಯ ಹುಡುಕಬಾರದು

ಅಂಗಲಾಚಿದರೂ ಎಟುಕದ

ಸಂಗಕೆಂದೂ ನಿಲುಕದ

ರಂಗು ಮೋಡಿ ಮನಸುಗಳಿಗೆ

ಸಿಲುಕಬಾರದು

ನೊಂದವರ ನೋಯಿಸುವ

ಬೆಂದವರ ಬೇಯಿಸುವ

ದುರುಳರ ಮಾತುಗಳಿಗೆ

ಬಲಿಯಾಗಬಾರದು

ಇಂದು ಇಂದಾಗಿರದ

ನಾಳೆ ನಾಳೆಯಾಗಿರದ

ಅಯೋಮಯ ಸ್ಥಿತಿಗೆ

ಬೀಳಬಾರದು

ಮೇಲು ಕೀಳೆಂಬ ಭ್ರಮೆಗೆ

ಮರುಳಾಗಿ ತಲೆ ಕೆಟ್ಟು

ನಮ್ಮನಮ್ಮ ಬೇರುಗಳ

ಮರೆಯಬಾರದು

ಎಷ್ಟೇ ಸಿರಿತನವಿರಲಿ

ಎಷ್ಟೇ ಬಡತನವಿರಲಿ

ಭಗವಂತನ ಧ್ಯಾನ ಬಿಟ್ಟು

ಮೆರೆಯಬಾರದು

ವೃಕ್ಷ

 

ಇಹದ ಮಾತುಗಳ ಪರಕೆ ತಲುಪಿಸುವಂತೆ

ಮುಗಿಲ ಮೇಲಿನ ಬಯಲ ಅಣಕಿಸುವಂತೆ

ಸಾಟಿಯಿಲ್ಲದೆ ಬೆಳೆದು ಆಕಾಶದೊಳ ತೂರಿದಂತೆ

ವೃಕ್ಷವೊಂದಿಲ್ಲಿ, ಸ್ಫೂರ್ತಿ ತುಂಬುತ ನಿಂತಿದೆ

ಕೊಂಕು ಕೊಸರುಗಳ ಊದಿ ಗಾಳಿಗೆ ತೂರಿ

ಸಾಧನೆಯ ಮೆಟ್ಟಿಲುಗಳ ಒಂದೊಂದಾಗಿ ಏರಿ

ತನ್ನೊಳಗಿನ ಪರಿಮಳವ ಪರಿಸರಕೂ ಬೀರಿ

ನಂಜ ನುಂಗಿ ಅಂಜದಿರಲು, ಉದಾಹರಣೆಯಾಗಿದೆ

ಧೈರ್ಯದ ಛತ್ರಿ ಬಿಡಿಸಿ ಗಾಳಿಮಳೆಗಳ ಎದುರಿಸಿ

ಸಮಾಧಾನದ ದೋಣಿ ಬಳಸಿ ನೀರುನೆರೆ ನಿವಾರಿಸಿ

ತನ್ನೊಳಗೂ ಹೊರಗೂ ಮೇಲೂ ಕೆಳಗೂ ಸೇರಿಸಿ

ಆಶ್ರಯ ನೀಡಿ, ದಯಾಮಾಯಿಯಾಗಿ ಬದುಕಿದೆ

ಗಾಢ ಹಸಿರನು ಹರಡಿ ಪ್ರಾಣವಾಯುಗೆ ಜರಡಿ

ಹಿಡಿದು ಜೀವಗಳ ಉಳಿಸಿ ಬೆಳೆಸುವ ಗರಡಿ

ದಿನ ಮುಗಿದು ಮಲಗಿದರೆ ಆರಡಿ ಮೂರಡಿ

ಹೊತ್ತೊಯ್ಯುವ ಚಟ್ಟಕೂ, ಸಹಕಾರಿಯಾಗಿದೆ

ಶೇರ್ ಮಾರ್ಕೆಟ್

ಆಸೆಯನ್ನು ಕೆದಕುತ್ತದೆ 

ಅತಿಯಾಸೆ ಮೊಳೆಯುತ್ತದೆ

ದುರಾಸೆಯದು ಹೆಚ್ಚಾದರೆ 

ನಿರಾಸೆ ಮನವನ್ನು ಸುಡುತ್ತದೆ

ಅರಿತರೆ ಅರಮನೆಯಾಗಿಸುತ್ತದೆ

ಅರಿಯದಿರೆ ಸೆರೆಮನೆಯಾಗಿಸುತ್ತದೆ

ಕಲಿಕೆಯನ್ನು ಅನಿವಾರ್ಯವಾಗಿಸುತ್ತದೆ

ಕಲಿಯದಿದ್ದರೆ ದಿಟವಾಗಿ ಕೈಸುಡುತ್ತದೆ 

ಅತ್ತರೆ ನಗಿಸುತ್ತದೆ 

ನಕ್ಕರೆ ರೊಚ್ಚಿಗೇಳುತ್ತದೆ 

ಕೊಟ್ಟರೆ ಏರುತ್ತದೆ 

ಕೊಂಡರೆ ಇಳಿಯುತ್ತದೆ

ಜಾಣ್ಮೆಯನ್ನು ಬೆಳೆಸಿ ಶ್ಲಾಘಿಸುತ್ತದೆ

ತಾಳ್ಮೆಯನ್ನು ಕಲಿಸಿ ಪರೀಕ್ಷಿಸುತ್ತದೆ

ಗಲಿಬಿಲಿಗೊಳಿಸಿ ತಲೆ ಕೆಡಿಸುತ್ತದೆ

ಭಯ ಹುಟ್ಟಿಸಿದರೂ ಜಯ ತರುತ್ತದೆ

ಜಗನ್ಮಾತೆ

 

ಬಿಸಿಲ ಕೋಲನು ಬಸಿದು 

ಪಾನೀಯ ಮಾಡಿ

ಕುಡಿಯುವಾಕೆ

ಆಕಾಶ ತೊಟ್ಟಿಲಿಗೆ

ಗಾಳಿ ಬಳ್ಳಿಯ ಕಟ್ಟಿ

ಜೋಕಾಲಿ ಆಡುವಾಕೆ 

 

ಪ್ರಾಣಿಪಕ್ಷಿಗಳೊಡನೆ 

ಸರಸದಿಂದ ಸಲ್ಲಾಪ

ನಡೆಸುವಾಕೆ

ಭೂಪಾತ್ರೆ ಹಿಡಿದಲ್ಲಾಡಿಸಿ 

ಮೂರ್ಖ ಮನುಜನ

ಸೊಲ್ಲಡಗಿಸುವಾಕೆ 

ನಂಬಿದವರ ನಖಕೂ 

ಕುತ್ತಾಗದಂತೆ ಸಲಹಿ

ಸಾಕುವಾಕೆ

ಶರಣು ಬಂದವರ

ಕೈ ಹಿಡಿದು ಸನ್ಮಾರ್ಗದಲ್ಲಿ 

ನಡೆಸುವಾಕೆ

ಹೊಳೆಯುತ್ತಿದ್ದಾನೆ

 

ಪುಟಕ್ಕಿಟ್ಟ ಚಿನ್ನದಂತೆ ಹೊಳೆಯುತ್ತಿದ್ದಾನೆ

ದೇಶವನ್ನು ಬೆಳೆಸಿ ಬೆಳೆಯುತ್ತಿದ್ದಾನೆ

ಕಳೆಗಳ ಕಿತ್ತೆಸೆಯಲು ಶ್ರಮಿಸುತ್ತಿದ್ದಾನೆ

ಹೆಜ್ಜೆಯಿಟ್ಟಲ್ಲಿ ಹೊಸತನ ತರುತ್ತಿದ್ದಾನೆ

ಮಲಗಿದವರ ತಟ್ಟಿ ಎಬ್ಬಿಸುತ್ತಿದ್ದಾನೆ

ಜ್ಞಾನ ದೀಪವನ್ನೆಲ್ಲೆಡೆ ಉರಿಸುತ್ತಿದ್ದಾನೆ

ಕಾಲಿಗೆ ಬುದ್ಧಿ ಹೇಳಿದವರಿಗೆ ತಕ್ಕ

ಬುದ್ಧಿಯನ್ನು ಕಲಿಸುತ್ತಿದ್ದಾನೆ

ಎಲ್ಲವನ್ನೂ ಗಮನಿಸುತ್ತಿದ್ದಾನೆ

ಎಲ್ಲದರಲ್ಲಿಯೂ ಆಸಕ್ತಿ ವಹಿಸುತ್ತಿದ್ದಾನೆ

ಎಲ್ಲರಿಗೂ ಸ್ಫೂರ್ತಿ ತುಂಬುತ್ತಿದ್ದಾನೆ

ಎಲ್ಲದಕ್ಕೂ ಹೆಗಲು ನೀಡುತ್ತಿದ್ದಾನೆ

ಖಡಾಖಂಡಿತ ಉತ್ತರ ನೀಡುತ್ತಿದ್ದಾನೆ

ಕೆಟ್ಟದ್ದನ್ನು ಮಟ್ಟ ಹಾಕುತ್ತಿದ್ದಾನೆ

ಒಳ್ಳೆಯದನ್ನು ಬೆಂಬಲಿಸುತ್ತಿದ್ದಾನೆ

ನಿಷ್ಕಳಂಕ ಪ್ರೀತಿ ಸೂಸುತ್ತಿದ್ದಾನೆ

ಪರರಿಗೆ ಮಾದರಿಯಾಗುತ್ತಿದ್ದಾನೆ

ದೇಶದುದ್ಧಾರಕ್ಕಾಗಿ ಜೀವ ಸವೆಸುತ್ತಿದ್ದಾನೆ

ದೇಶವಾಸಿಗಳೆಲ್ಲರೂ ತನ್ನವರೆನ್ನುತ್ತಾನೆ 

ತನ್ನದೆಲ್ಲವನ್ನೂ ಅವರಿಗೇ ಮೀಸಲಿಟ್ಟಿದ್ದಾನೆ

ಸುಧೀರ

 

ಮನಸಿನ ತಳಮಳ

ತಳಕಿಳಿಯದಂತೆ 

ಹೃದಯದ ಗಾಬರಿ

ನಲುಗಿಸದಂತೆ 

ಹೊರಚೆಲ್ಲಿ ಹಗುರಾಗಿ

ಹಸಿರ ಉಸಿರೆಳೆದು ನವಿರಾಗಿ

ಮೊರದಷ್ಟು ನಗು ಮೊಗೆದು

ಹೊಸ ಬೆಳಕ ಒಳಸೆಳೆದು

ಹೊಸತನವು ಆಗಮಿಸಿ

ಹೊಸತನ್ನು ಸ್ವಾಗತಿಸಿ

ಗರಿ ಬಿಚ್ಚಿ ನರ್ತನದಿ 

ಬಿರಿದ ಮಲ್ಲಿಗೆಯಾಗು

ಅಂಕು ಡೊಂಕು

ಅಂಕುಡೊಂಕಿನ ಮರದಲ್ಲಿ 

ಬಿಂಕವಿಲ್ಲದೆ ಬೆಳೆದ ಪುಷ್ಪ

ಸಂಖ್ಯೆಯನ್ನು ಹೆಚ್ಚಿಸುತ್ತಾ

ಸಂತಸದ ಸುವಾಸನೆ ಬೀರುತ್ತದೆ

ಪರ್ಣಪಾತಿ ವೃಕ್ಷವೊಂದು

ಅಪರ್ಣವಾಗಿ ನಿಂದರೂ

ಸ್ವರ್ಣ ರವಿಯ ಬೆಳಕಿನಲ್ಲಿ

ವರ್ಣಮಯವಾಗುತ್ತದೆ 

ಅಗಳ ಬಳಿ ಬೆಳೆದು ನಿಂದು

ಖಗಗಳನ್ನು ಹೊತ್ತುಕೊಂಡು

ಜಗಳವಿಲ್ಲದ ಜಗದ ಕನಸನು

ಜಗಕೆಲ್ಲ ಹಂಚುತ್ತದೆ

ಬದುಕಿದ್ದಾಗಲೂ ಸತ್ತಾಗಲೂ

ಎಲ್ಲರಿಗೂ ನೆರವಾಗುತ್ತದೆ

ಮನುಜನಂತೆ ಕೊಂಕು ಹುಡುಕದೆ

ಜ್ಞಾನಿಯಂತೆ ನಿರ್ಗಮಿಸುತ್ತದೆ

ಹರಿಯಬೇಕು

ಬಿಟ್ಟರೆ ಹರಿದು ಹೋಗುತ್ತದೆ

ತನ್ನ ದಾರಿಯ ಹುಡುಕಿಕೊಂಡು

ವಿಶಾಲ ಶರಧಿಯ ಸೇರುತ್ತದೆ

ನಿಂತರೆ ನಿಂತಲ್ಲೇ ಕೊಳೆಯುತ್ತದೆ

ಉಳಿದಲ್ಲೇ ಉಳಿದು ನಾರುತ್ತದೆ

ಕ್ರಿಮಿಕೀಟಗಳ ಸಲಹುತ್ತದೆ

ಹರಿಯಬೇಕು ಹರಿದು ಪೊರೆಯಬೇಕು

ಹೊರಳಬೇಕು ಪೊರೆ ಕಳಚಿ ಅರಳಬೇಕು

ನೆರಳೊಳಗೆ ನರಳದೇ ನಲಿಯಬೇಕು

ಹರಿಯಬೇಕು ಹರಿಯ ನೆನೆಯಬೇಕು

ಹರನ ಪಾದಕ್ಕೆ ಶರಣಾಗಬೇಕು

ಹೊರೆಯನೆಲ್ಲ ಬಿಟ್ಟು ತೆರಳಬೇಕು

ಇರುವೆಯಂತಿರಬೇಕು

 

ಇದ್ದರೆ ಇರುವೆಯಂತೆ ಇರಬೇಕು

ಬಿದ್ದರೂ ಮತ್ತೆ ಮತ್ತೆ ಎದ್ದು ಬರಬೇಕು

ಅಡ್ಡಿಗಳ ಸುತ್ತಿ ಹತ್ತಿ ಮೇಲೇರಬೇಕು

ಶರೀರ ಚಿಕ್ಕದಾದರೂ ಕಾರ್ಯ ದೊಡ್ಡದಿರಬೇಕು

ಕಣ ತೂಕವಾದರೂ ಮಣ ಕೆಲಸ ಮಾಡಬೇಕು

ಛಲ ಬಿಡದೆ ಸಾಧಿಸುವ ದೃಢ ಮನಸ್ಸಿರಬೇಕು

ಬಿಸಿಲಿನಲಿ ಬೆವರಿನಲಿ ಬೆದರದೇ ಓಡಾಡಬೇಕು

ದೂರವೋ ಸನಿಹವೋ ಗುರಿಯೆಡೆಗೆ ಸಾಗಬೇಕು

ಯಾರಿರಲೀ ಇಲ್ಲದಿರಲೀ ಕರ್ತವ್ಯದೆಡೆ ಲಕ್ಷ್ಯಬೇಕು

ಮುಖಾಮುಖಿಯಾಗಿ ವಿಷಯಗಳ ಚರ್ಚಿಸಬೇಕು

ಸಂಘ ಸಹವಾಸದಲಿ ಸ್ವರ್ಗವನು ಕಾಣಬೇಕು

ಶ್ರಮ ಪಟ್ಟು, ಕ್ರಮದಲ್ಲಿ ಬದುಕಿ ಜಯಿಸಬೇಕು

ಉತ್ತಮ

 

ಮಾಡಿದರೂ ಒಂದೇ ಮಾಡದಿದ್ದರೂ ಒಂದೇ

ಮಾಡದೆಯೇ ಕೆಟ್ಟವರಾಗುವುದು ಉತ್ತಮ

ಅರಿತರೂ ಒಂದೇ ಅರಿಯದಿದ್ದರೂ ಒಂದೇ

ಅರಿಯದೆಯೇ ಬದುಕುವುದು ಉತ್ತಮ

ಕೇಳಿದರೂ ಒಂದೇ ಕೇಳದಿದ್ದರೂ ಒಂದೇ

ಕೇಳದೆಯೇ ಕೂರುವುದು ಉತ್ತಮ

ತಿಳಿದರೂ ಒಂದೇ ತಿಳಿಯದಿದ್ದರೂ ಒಂದೇ

ತಿಳಿಯದಿದ್ದರೆಯೇ ಉತ್ತಮ

ನೋಡಿದರೂ ಒಂದೇ ನೋಡದಿದ್ದರೂ ಒಂದೇ

ನೋಡದೆಯೇ ಇರುವುದು ಉತ್ತಮ

ನೀಡಿದರೂ ಒಂದೇ ನೀಡದಿದ್ದರೂ ಒಂದೇ

ನೀಡದೆಯೇ ಬಲಿಯಾಗುವುದುತ್ತಮ 

ಗಳಿಸಿದರೂ ಒಂದೇ ಕಳೆದುಕೊಂಡರೂ ಒಂದೇ

ಗಳಿಸದೆಯೇ ಉಳಿಯುವುದು ಉತ್ತಮ

ಬೆಳೆದರೂ ಒಂದೇ ಅಳಿದರೂ ಒಂದೇ

ಇದ್ದಲ್ಲಿಯೇ ಇರುವುದು ಉತ್ತಮ

ಅಚ್ಚರಿಯ ತೊಟ್ಟಿಲು

ಅರೆ ಶತಕದ ಮೂರನೆಯ ಮೆಟ್ಟಿಲು

ಈ  ಜಗವಹುದು ಬಲು ಅಚ್ಚರಿಯ ತೊಟ್ಟಿಲು

ಸೋಲಿಲ್ಲ ಗೆಲುವಿಲ್ಲ ಇದ್ದರೂ ಇಲ್ಲಿ ಅದೆಲ್ಲ ಸಲ್ಲ

ಅರಿತರೆ ಸಿಹಿ-ಕಹಿ, ಜೀವನವಹುದು ಬೇವು ಬೆಲ್ಲ

ಬೆರೆತರೆ ಸ್ನೇಹ-ಸಂಬಂಧ, ತಕರಾರಿಲ್ಲ

ಇಲ್ಲವಾದಲ್ಲಿ ಕಿರಿಕಿರಿ ಎಂದಿಗೂ ತಪ್ಪಿದ್ದಲ್ಲ

ದಾರಿಯಲ್ಲಿ ಕಲ್ಲುಮುಳ್ಳು ಇರದಿರುವುದಿಲ್ಲ

ಎದುರಿಸಿ ನಿಲ್ಲದಿರೆ ಸುಲಭ ಪರಿಹಾರವಿಲ್ಲ

ಪ್ರಪಂಚದಲ್ಲಿ ಸಂಕಟ ಮುಗಿಯುವುದಿಲ್ಲ

ನಮಗೆ ನಾವೇ ನೆಮ್ಮದಿ ಪಡೆಯಬೇಕಲ್ಲ

ದುಃಖಿಸಿದರೆ ಎಂದಿಗೂ ಧೈರ್ಯ ಬರುವುದಿಲ್ಲ

ಧೈರ್ಯದಿಂದಿದ್ದರೆ ನೆಲ ಕುಸಿಯುವುದಿಲ್ಲ

ಬಯಕೆಯ ಬಳ್ಳಿಯ ಮಿತಿಯಲ್ಲಿ ಬಿಗಿದರೆ

ಬದುಕಲ್ಲಿ ಬೆಳೆಯುವುದು ಭರವಸೆಯ ಹಸಿರು

ಭಗವಂತನ ದಯೆಯ ಕೈ ತಲೆ ಮೇಲೆ ಇದ್ದರೆ

ಬಾಳ ಬಟ್ಟೆಯಲಿ ಸದಾ ನೆಮ್ಮದಿಯ ಉಸಿರು

ಪರಮಾತ್ಮನ ಪಾದ

 

ಅಚ್ಚರಿಯ ಮೊದಲ ಹೆಜ್ಜೆ

ಚಚ್ಚರದಿ ಎರಡನೆಯ ಹೆಜ್ಜೆ

ಕಾಲಲ್ಲಿ ಕಟ್ಟಿರುವ ಗೆಜ್ಜೆ

ಸಾಧನೆಗೆ ಹೆಮ್ಮೆಯಿಂದ ಲಜ್ಜೆ

ಬೆರಳ ತುದಿ ಹಿಡಿದು ಎದ್ದು

ಸ್ವಪ್ರಯತ್ನದಿ ಮುನ್ನಡೆದೆ 

ಶ್ರಮದೊಂದಿಗೆ ಬಿರುನಡೆದೆ

ಛಲದೊಂದಿಗೆ ಗಮ್ಯ ಸೇರಿದೆ

ಅಂದಕ್ಕೆ ಅಂಧಳಾಗದೆ 

ಚಂದಕ್ಕೆ ಮರುಳಾಗದೆ

ಬಂದುದನ್ನು ಎದುರಿಸುತ್ತಾ

ಬದುಕನ್ನು ಸಾಗಿಸಿದೆ

ಗರಿಗೆದರಿ ಸಜ್ಜಾಗಿ

ಗರಿಬಿಚ್ಚಿ ಹಾರಿದೆ

ಗರಿಗಳಂದವ ತೋರಿದೆ

ಗುರಿಮುಟ್ಟಿ ವಿಶ್ರಮಿಸಿದೆ

ಜ್ಞಾನಕ್ಕೆ ಕೈಮುಗಿದು

ಧ್ಯಾನಕ್ಕೆ ಗಮನ ಕೊಟ್ಟು

ಪ್ರಾಣವನ್ನು ಪವಿತ್ರಗೊಳಿಸಿ 

ಪರಮಾತ್ಮನ ಪಾದ ಸೇರಿದೆ

ಅರ್ಥ - ಅಪಾರ್ಥ

ಸಂಬಂಧಗಳಲ್ಲಿ ಅರ್ಥವಿರಬೇಕಾದರೆ

ನಿಸ್ಸಂಕೋಚವಾಗಿ ಚರ್ಚಿಸಬೇಕು

ನಿಸ್ಸಂಕೋಚವಾಗಿ ಹೇಳುವುದನ್ನು

ವಿಪರೀತವಾಗಿ ತೆಗೆದುಕೊಂಡರೆ

ಅದು ಅಪಾರ್ಥವೆನಿಸಬಹುದು

ಆಗುತ್ತಿರುವ ತೊಂದರೆಯನ್ನು ಎದುರಿನವರು

ಹೇಳಿದಾಗ ಅರ್ಥ ಮಾಡಿಕೊಂಡು ಸುಗಮಗೊಳಿಸದೆ,

ತಪ್ಪೆಂದುಕೊಂಡು ನಮ್ಮ ಅಹಂ ಗೆ ಸವಾಲಾಗಿಸಿದರೆ, 

ಹೇಳುವುದನ್ನು ಅಪಾರ್ಥ ಮಾಡಿಕೊಂಡರೆ,

ಮುಕ್ತ ಮನಸು ಮುಚ್ಚಿ ಅಂತರ ಹೆಚ್ಚಬಹುದು

 

ತೊಂದರೆ, ತಪ್ಪು ನಮ್ಮಿಂದಲೂ ಆಗುತ್ತದೆ

ತಿಳಿದರೆ ತಿದ್ದಿಕೊಳ್ಳುತ್ತೇವೆ ಎಂಬ

ಭಾವವಿದ್ದರೆ ವ್ಯಕ್ತಿತ್ವ ಬೆಳೆಯುತ್ತದೆ

ಇಲ್ಲದಿದ್ದರೆ ಒಳಗಿರುವ ಅಹಂ

ಎದ್ದು ಅಪಾರ್ಥವನ್ನು ಬೆಳೆಸಬಹುದು

ಅಪಾರ್ಥ ಹೆಚ್ಚಿದರೆ ಮನಸು ಮೊಂಡಾಗಿ

ವಿವೇಚನೆ ಕಳಚುತ್ತದೆ, ಇನ್ನೊಬ್ಬರು ಹೀಗಂದರು 

ಅಂದುಕೊಳ್ಳುವ ಮೊದಲು ನಮ್ಮಲ್ಲೇನು

ಬೆಳೆಸಿಕೊಳ್ಳಬೇಕೆಂದು ಯೋಚಿಸಿದರೆ

ಎಲ್ಲರ ನೆಮ್ಮದಿಯೂ ಉಳಿಯಬಹುದು

ಕಾಲ

 

ದೂರವಾಣಿ ದೂರವಾಗಿ

ಚರವಾಣಿ ಚುರುಕಾಗಿ

ಕರದಲ್ಲಿ ಕರೆ ಹಿಡಿದು ಬೆರಳ 

ಮೂಲಕ ಜಗವ ತೋರುವ ಕಾಲ

ಹಿರಿಯರು ಕಿರಿಯರತ್ತ

ಕಿರಿಯರು ಹಿರಿಯರತ್ತ

ಬೆಟ್ಟು ಮಾಡಿ ಟೀಕಿಸಿ

ಅಪಹಾಸ್ಯ ಮಾಡುವ ಕಾಲ

ಬಿಸಿಲು ಭಯಾನಕ ಭೂತವಾಗಿ

ಮಳೆಯು ಮನಬಂದಂತೆ ಸುರಿದು

ಚಳಿಯು ಛಲ ಬಿಡದೆ ಮರಗಟ್ಟಿಸುವ

ಋತುಗಳ ಅಯೋಮಯ ಕಾಲ

ಅವರಿವರ ಗೊಡವೆ ಬೇಡ

ಕೆಟ್ಟವರೆನಿಸಿಕೊಳ್ಳುವುದು ಬೇಡ

ಎಲ್ಲಿಯೂ ನಗೆಪಾಟಲಾಗುವುದು ಬೇಡ

ನಮಗ್ಯಾಕೆ ಉಸಾಬರಿ ಎನ್ನುವ ಕಾಲ

ಅವಿಭಕ್ತ ಕುಟುಂಬಗಳೊಡೆದು 

ಸಂಬಂಧಗಳು ಸುಟ್ಟು ಕರಕಲಾಗಿ

ಸರಿದಾರಿ ತಿಳಿಯದೇ ಕಳೆದು ಹೋಗಿ

ಪಶ್ಚಾತ್ತಾಪ ಪಡುವ ಕಾಲ

ಕಾದರೆ ಕಾಲವೇ ಮದ್ದು ಇಲ್ಲವಾದರೆ

ಕೈಲಾಸ ಒದ್ದು ಕಸವಾಗಿ ಕಂಗೆಟ್ಟು

ಪರಮಾತ್ಮನ ಪಾದವೇ ಗತಿಯೆಂದು

ಶರಣು ಬಿದ್ದು ತಪ್ಪೊಪ್ಪ ಬೇಕಾದ ಕಾಲ

ಯುಗಾದಿ

 

ಯುಗದ ಆದಿಯಿದು ಯುಗಾದಿ

ಹೊಸತನದ ಸಂಭ್ರಮದ ಹಾದಿ

ಉತ್ತಮವಾದ ಭವಿಷ್ಯಕ್ಕೆ ನಾಂದಿ

ಕುಟುಂಬ ಸಮೇತ ಸೇರುವರು ಮಂದಿ

ಯುಗಾದಿಯ ಬಟ್ಟೆಯಲ್ಲಿ

ಹೊಸ ವರುಷದ ವಿನ್ಯಾಸ

ಹಬ್ಬ ಹರಿಸುವ ಹರ್ಷೋಲ್ಲಾಸ

ತುಂಬಿ ತುಳುಕುವ ನವೋಲ್ಲಾಸ 

ವಸಂತಕಾಲದ ಆಗಮನವಿದು

ಜ್ಞಾನ ಬುದ್ಧಿಯ ದೀವಿಗೆಯಿದು

ಹೊಸವರ್ಷದ ಆರಂಭವಿದು

ಸರ್ವರಿಗೂ ಶುಭವಾಗುವುದು

ಇಂದು ನಮ್ಮದು ನಾಳೆ ನಿಲ್ಲದು

ಇರುವವರೆಗೆ ನಗುತಿರುವುದೇ ಒಳ್ಳೇದು 

ಸ್ವಲ್ಪ ಬೇವು ಸ್ವಲ್ಪ ಬೆಲ್ಲ ಸೇರಿಸಿ ತಿನ್ನುವುದು

ಜೀವನವನ್ನೂ ಹೀಗೇ ಎದುರಿಸುವುದು

ಯುಗಾದಿ ಹಬ್ಬದ ಶುಭಾಶಯ

- ಪೂ.

09-04-2024

ಒಳ್ಳೆಯದೇ

ಅರಳಿದರೆ ಒಳ್ಳೆಯದೇ

ಆದರೆ ಅತಿಯಾಗ ಬಾರದು

ಹೊರಳಿದರೆ ಒಳ್ಳೆಯದೇ

ಆದರೆ ಕೆಳಗೆ ಬೀಳಬಾರದು

ಕೆರಳಿದರೆ ಒಳ್ಳೆಯದೇ

ಆದರೆ ಕೆಡಬಾರದು

ನರಳಿದರೆ ಒಳ್ಳೆಯದೇ

ಆದರೆ ನರಕವಾಗಬಾರದು

ಮರಳಿದರೆ ಒಳ್ಳೆಯದೇ

ಆದರೆ ಮರೆಯಬಾರದು

ಉರುಳಿದರೆ ಒಳ್ಳೆಯದೇ

ಆದರೆ ಉರಿಯಬಾರದು

ಅರಿತರೆ ಒಳ್ಳೆಯದೇ

ಆದರೆ ಅಳಿಯಬಾರದು

ನುರಿತರೆ ಒಳ್ಳೆಯದೇ

ಆದರೆ ತುಳಿಯಬಾರದು

ಸ್ನೇಹವೆಂಬುದು ಒಳ್ಳೆಯದೇ

ಆದರೆ ಸೋಲಬಾರದು

ರಾಗವಿದ್ದರೆ ಒಳ್ಳೆಯದೇ

ಆದರೆ ರಗಳೆಯಾಗಬಾರದು

ಪ್ರೀತಿಯಿದ್ದರೆ ಒಳ್ಳೆಯದೇ

ಆದರೆ ಪೆಟ್ಟು ತಿನ್ನಬಾರದು

ಗರ್ವವಿದ್ದರೆ ಒಳ್ಳೆಯದೇ

ಆದರೆ ತಿಳಿಯಬಾರದು

ಯಾರು

 

ಪೊಡವಿಯ ಅಡವಿಯ ಅಡ ಇಟ್ಟವರು ಯಾರು

ಅಡವಿಟ್ಟ ಅಡವಿಯ ಕಡ ಕಟ್ಟುವವರು ಯಾರು 

ಬಗಲಲ್ಲೇ ಬಗೆಬಗೆ ಬಗೆದು ಬಗೆದವರು ಯಾರು

ಬಗೆದುದನ್ನು ಭರಿಸಲು ಹೆಗಲು ಕೊಟ್ಟವರು ಯಾರು

ಅರಿವಿಗೆ ಅರಿವೆ ಹೊದೆಸಿ ಮುಚ್ಚಿಟ್ಟವರು ಯಾರು

ಅರಿವಿನ ಅರಿಯ ಅರಿಕೆಯನ್ನು ಅರಿತವರು ಯಾರು

ನುಡಿದಂತೆ ನಡೆಯನ್ನು ನಡೆದವರು ಯಾರು

ನುಡಿಯದೇ ನುಡಿಯನ್ನು ನುಡಿಸಿದವರು ಯಾರು

ಬಿಸಿಲಲ್ಲಿ ಬಿಸಿ ಬಸಿದು ಬೀಸಿದವರು ಯಾರು

ಹಸಿದಲ್ಲಿ ಹಸಿಯ ಹಸಿ ಹಂಚಿದವರು ಯಾರು

ಕಾಲನನ್ನು ಮೆಟ್ಟಿ ಕಾಲ ಹೆಚ್ಚಿಸಿಕೊಂಡವರು ಯಾರು

ಸಾಲ ಸಾಲದೆಂದು ಸಾಲಲ್ಲಿ ನಿಂದವರು ಯಾರು

ಬರದ ಬರವನ್ನು ಬರೆದು ತಿಳಿಸಿದವರು ಯಾರು

ಬರೆದ ಬರಹವನ್ನು ಅರ್ಥೈಸಿ ತಿಳಿದವರು ಯಾರು

ಓದಿನ ಒದವಿಗೆ ಒದವು ಒದಗಿಸಿದವರು ಯಾರು

ಆಡಿದಂತೆ ಆಡನ್ನು ಅಡ್ಡಾಡಿಸಿ ಕೈ ಆಡಿಸಿದವರು ಯಾರು 

ಮಡಕೆಯೊಳಗೆ ಮಡಕೆಯನ್ನು ಬೇಯಿಸಿದವರು ಯಾರು

ಪಟ್ಟುಬಿಡದೆ ಪಟ್ಟು ಹಾಕಲು ಪ್ರಯತ್ನ ಪಟ್ಟವರು ಯಾರು

ಪಡಿಯ ಪಡಿಪಡೆದು ಪಡಿಹಾಕಿ ಪಡಿಯೇರಿ ಪಡಿ ಮೆಟ್ಟಿದವರಾರು

ಅಡಿ ಮೇಲೆ ಅಡಿ ಇಟ್ಟು ಅಡಿಯಲ್ಲಿ ಅಡಗಿದವರು ಯಾರು

ಹಲವೆಡೆ ಹಲವಿಟ್ಟು ಹಲವು ಸಲ ಉತ್ತವರು ಯಾರು

ಬೀಳು ಬೀಳದಂತೆ ಬೀಳುಗಳ ಬೆಳೆಸಿದವರು ಯಾರು

ಹರಿವ ಹರಿವನ್ನು ಹರಿದಂತೆ ಹರಿಸಿದವರು ಯಾರು

ಹರಿಯ ಹರವನ್ನು ಹರವಿಟ್ಟು ಹರಸಿದವರು ಯಾರು

ಅಮ್ಮ ಜೀವ - ಅಪ್ಪ ಪ್ರಾಣ

 

ಅಮ್ಮ ಜೀವವನ್ನು 

ಹೊರುತ್ತಾಳೆ ಹೆರುತ್ತಾಳೆ

ಅಪ್ಪ ಅದನ್ನು ಹೊರುತ್ತಾನೆ 

ಪ್ರಾಣ ಒದಗಿಸುತ್ತಾನೆ

ಅಮ್ಮನೆಂಬ ಅಕ್ಕರೆ

ಅಪ್ಪನೆಂಬ ಅದ್ಭುತ

ಅಮ್ಮನ ಮಮತೆಯ ಮತ್ತು

ಅಪ್ಪನ ಮಾತುಗಳು ಮುತ್ತು

ಅಮ್ಮ ನುಡಿಸುತ್ತಾಳೆ

ಅಪ್ಪ ನಡೆಸುತ್ತಾನೆ

ಅಮ್ಮ ಮುದ್ದು ಮಾಡುತ್ತಾಳೆ

ಅಪ್ಪ ತಿದ್ದಿ ತೀಡುತ್ತಾನೆ

ಅಮ್ಮ ಓದಿಸಿ-ಬರೆಸಿ ಮಾಡುತ್ತಾಳೆ

ಅಪ್ಪ ಭವಿಷ್ಯವನ್ನು ಗಟ್ಟಿ ಮಾಡುತ್ತಾನೆ

ಅಮ್ಮ ಕೆಲವೊಮ್ಮೆ ಅಪ್ಪನಾಗುತ್ತಾಳೆ

ಅಪ್ಪ ಕೆಲವೊಮ್ಮೆ ಅಮ್ಮನಾಗುತ್ತಾನೆ

ವಿಪರ್ಯಾಸ

 

ಕೆಟ್ಟದ್ದನ್ನು ಮಾಡಿದವರು ಮರೆತು ಬಿಡುತ್ತಾರೆ

ಅನುಭವಿಸಿದವರಿಗೆ ಅದು ನೆನಪಿರುತ್ತದೆ

ಒಳ್ಳೆಯದನ್ನು ಮಾಡಿದವರಿಗೆ ನೆನಪಿರುತ್ತದೆ

ಅನುಭವಿಸಿದವರು ಅದನ್ನು ಮರೆತು ಬಿಡುತ್ತಾರೆ

ನಾನು ಏನೇ ಮಾಡಿದರೂ ಅದು ಸರಿ

ಬೇರೆಯವರು ಮಾಡಿದರೆ ಎಲ್ಲವೂ ತಪ್ಪು

ನಾನು ಮಾಡಿರುವುದಕ್ಕೆ ಕಾರಣವಿರುತ್ತದೆ

ಬೇರೆಯವರು ಅನಾವಶ್ಯಕವಾಗಿ ಮಾಡುತ್ತಾರೆ

ನಾನು ಮಾಡುವುದೆಲ್ಲಾ ಧನಾತ್ಮಕ

ಇನ್ನೊಬ್ಬರು ಮಾಡುವುದೆಲ್ಲಾ ಋಣಾತ್ಮಕ

ಆಗಬೇಕಾಗಿರುವುದು ನನ್ನ ಜವಾಬ್ದಾರಿಯಲ್ಲ

ಮಾಡದಿರುವುದು ಅವರ ಬೇಜವಾಬ್ದಾರಿ

ಬಿಸಿಲಿದ್ದರೆ ಮಳೆ ಬೇಕೆನಿಸುತ್ತದೆ

ಮಳೆ ಬಂದರೆ ಕಿರಿಕಿರಿಯಾಗುತ್ತದೆ

ಸೆಖೆಯಿದ್ದರೆ ಚಳಿಗಾಗಿ ಆಸೆ ಪಡುತ್ತೇವೆ

ಚಳಿಯಿದ್ದರೆ ಬಿಸಿಲಿಗಾಗಿ ಪರಿತಪಿಸುತ್ತೇವೆ

ಎಲ್ಲವೂ ಸರಿಯಾಗಿದ್ದರೆ ಗೊಣಗುತ್ತೇವೆ

ಸರಿಯಿಲ್ಲದಿರುವಾಗ ಹೆಣಗುತ್ತೇವೆ

ನೆಮ್ಮದಿ ಬಿಟ್ಟು ಚಿಂತೆಯಿಂದ ಕೊರಗುತ್ತೇವೆ

ಕೆಟ್ಟಾಗ ಮತ್ತೊಬ್ಬರನ್ನು ತೆಗಳಿ ಕೃತಾರ್ಥರಾಗುತ್ತೇವೆ 

ಆಸೆ - ವಾಸ್ತವ

ಮನದಾಳದಲ್ಲಿ ಹುದುಗಿದ ಆಸೆಗಳಲ್ಲಿ ಹುಡುಕಿದೆ

ಆಸ್ಥೆಯಿಂದ ಆಯ್ದು ಬೆಲೆಬಾಳುವುದನ್ನು ಹೊರತೆಗೆದೆ

ಅಕ್ಕಿ ಆರಿಸಿದಂತೆ ಹೆಕ್ಕಿ ತೆಗೆದ ಅಮೂಲ್ಯ ಆಸೆಯನ್ನು 

ಕೊಕ್ಕಿನಲ್ಲಿ ಹಿಡಿದಂತೆ ಹಿಡಿದು ಆಕಾಶಕ್ಕೆ ಏರಿದೆ

ಆಕಾಶದೆತ್ತರದಿಂದ ನೋಟವ ಕೆಳ ಹರಿಸಿದಾಗ

ಭೂಮಿ ತುಂಬಾ ಹಸಿರು ಕಂಡೆ, ಸಂತೋಷಗೊಂಡೆ

ಪ್ರಾಣಿಗಳ ಮತ್ತು ಮನುಜನ ಪ್ರಪಂಚ ಬೇರೆಬೇರೆ

ಎಂಬುದನ್ನು ಬಹು ಸ್ಪಷ್ಟವಾಗಿ ನಾ ಕಂಡುಕೊಂಡೆ

ಪ್ರಕೃತಿಯ ಫಲಕದಲ್ಲಿ ಹರಿವ ಪವಿತ್ರ ಪನ್ನೀರು 

ಖಗಮೃಗಗಳ ಬದುಕಿನಲ್ಲಿ ನೆಮ್ಮದಿಯ ಉಸಿರು 

ಮನುಜನ ಮನಸು ಹೃದಯದಲ್ಲಿ ಸದಾ ಒಸರುವ,

ಕೂಡಿ ಬಾಳುವಂಥ ಸದ್ಬುದ್ಧಿ ಚಿಲುಮೆಯ ತೇರು

ಸಾಮರಸ್ಯವೇ ಸರ್ವಸ್ವವೆಂಬ ತಿಳಿವಿನ ಮಾತು

ಜೊತೆಗೂಡಿ ಬಾಳುವುದರ ಅರ್ಥವೇ ಒಳಿತು

ಇದನ್ನರಿತುಕೊಂಡಿದ್ದರದೇ ಸಕಲ ಸಂಪತ್ತು

ಕೈಬಿಟ್ಟಾಗ ಆಕಾಶದಲ್ಲಿರುವ ಆಸೆಗೆ ಬೆಂಕಿಯ ಕುತ್ತು

ಬೆಂಕಿ ಹಿಡಿದ ಆಸೆ ಹೊತ್ತು ಕೆಳಗಿಳಿಯುವ ಹೊತ್ತು

ಇಳಿಯುತ್ತಿದ್ದಂತೆಯೇ ಕಾಣುತ್ತಿತ್ತು ವಾಸ್ತವದ ಕೈತುತ್ತು

ಹಸಿರ ಕೇಶದ ನಡುನಡುವೆ ಬೋಳು ಭೂ-ತಲೆ

ಕಾಡಲ್ಲೆಲ್ಲಾ ಅಭಿವೃದ್ಧಿ ಭೂತದ ಅಬ್ಬರ ದಾಂಧಲೆ

ಪ್ರಾಣಿಪಕ್ಷಿಗಳ ಅಸಹಾಯಕ ಆತಂಕದೊಂದಿಗೆ,

ತನ್ನದೇ ಕಾಲಿಗೆ ಕೊಡಲಿಯಿಟ್ಟು, ಭವಿಷ್ಯವನ್ನು

ಪಣಕ್ಕಿಟ್ಟು, ಅರಚಿ-ಕಿರುಚಿ ಪರದಾಡುವ ಮನುಷ್ಯನ  

ಬುದ್ಧಿಗೇಡಿತನದ ಪರಮಾವಧಿಯ ಪೆಟ್ಟು

ಗಿಡವಿಲ್ಲ ಮರವಿಲ್ಲ ಕಾಡೂ ಇಲ್ಲ ಹಸಿರಿಲ್ಲ 

ಕುಡಿಯಲು ನೀರಿಲ್ಲ ಎಸರಿಡಲೂ ಗತಿಯಿಲ್ಲ

ಮುಂದಿನ ಪೀಳಿಗೆಗೆ ನೀಡಲು ಒಳ್ಳೆಯ ಹೆಸರಿಲ್ಲ

ಪಾಪಪ್ರಜ್ಞೆ ಬಿಟ್ಟು ಬೇರೇನೂ ಉಳಿಯುತ್ತಿಲ್ಲ

ದಾರಿಯುದ್ದಕ್ಕೂ

 

ಬೆಟ್ಟ ಬೆಟ್ಟಗಳ ಮೇಲೆ 

ಬಟ್ಟೆ ಹರಡಿದಂತೆ ನೀಲಾಕಾಶ

ಭೂಮಿ ತಾಯಿ ಹಸಿರುಟ್ಟಂತೆ 

ನಡುವೆ ಹೊಲಗಳ ವಿಶೇಷ 

ಇರುವೆಗಳ ಸಾಲಿನಂತೆ 

ವಾಹನಗಳ ಓಡಾಟ

ಬಿಸಿಯುಗುಳುವ ಚೆಂಡಿನಂತೆ

ಆ ಸೂರ್ಯನ ಆಟೋಟ

ತೆಂಗಿನ ಮರಗಳು, ಬಾಳೆಯ ಗಿಡಗಳು

ಕಾಫಿಯ ತೋಟದಿ ಅರಳಿದ ಹೂಗಳು

ಇಕ್ಕೆಲದಲ್ಲೂ ಪುಟ್ಟಪುಟ್ಟ ಮನೆಗಳು

ಅಲ್ಲಲ್ಲಿ ಕೆಲವೊಂದು ಅಂಗಡಿಗಳು

ಸೂರ್ಯಾಸ್ತದಲ್ಲಿ ತಂಪಾದ ಗಾಳಿ

ರಾತ್ರಿಯಲ್ಲಿ ಸುಳಿದ ತಂಗಾಳಿ

ನಿಶಾರಾಣಿ ಸುಂದರವಾಗಿ ಅರಳಿ

ಸುವಾಸನೆ ಸುತ್ತಿತು ಸುರುಳಿ ಸುರುಳಿ

ಎಚ್ಚರಿಕೆ

 

ಕೆಟ್ಟದೆಂಬುದರ ಕಟ್ಟಿಡದಿದ್ದರೆ

ಅದು ಒಳ್ಳೆಯದರ ಕತ್ತು ಹಿಸುಕಬಹುದು

ಕೆಟ್ಟದೆಂಬುದು ಒಳ್ಳೆಯದನ್ನು ಮೆಟ್ಟಿ ನಿಂದರೆ

ಒಳ್ಳೆಯದರ ಉಸಿರು ನಿಲ್ಲಬಹುದು

ಅಸತ್ಯವನ್ನು ಅರಳಲು ಬಿಟ್ಟರೆ

ಸತ್ಯವು ಅಲ್ಲಿಯೇ ಮುದುಡಬಹುದು

ಅಸತ್ಯವು ಸತ್ಯವನ್ನು ಕುಗ್ಗಿಸಿದರದು

ಸವಾಲಾಗಿ ಪರಿಣಮಿಸ ಬಹುದು

ಅಸುರರಿಗೆ ಅವಕಾಶ ಕೊಟ್ಟರೆ 

ಅಳತೆ ಮೀರಿ ಅಂಧಕಾರ ಮುಸುಕಬಹುದು

ಅಸುರರ ಅಟ್ಟಹಾಸ ತಾರಕಕ್ಕೇರಿದರೆ

ದೇವತೆಗಳ ಸ್ವರ ಕೇಳದಾಗಬಹುದು

ನಮ್ಮ ನಾವು ತಿದ್ದಿಕೊಳ್ಳದಿದ್ದರೆ

ಬೇರೆಯವರು ದೂರವಾಗ ಬಹುದು

ಬೇರೆಯವರ ಸ್ನೇಹವಿಲ್ಲದಿದ್ದರೆ

ಬದುಕು ಬರಡು ಎನಿಸ ಬಹುದು

ಅರ್ಥವಾಗಿ ಎಚ್ಚೆತ್ತುಕೊಳ್ಳದಿದ್ದರೆ

ಸಮಯ ಜಾರಿ ಹೋಗಬಹುದು

ಇರುವ ಸಮಯವ ಬಳಸದಿದ್ದರೆ 

ಬದುಕಿದ್ದೂ ವ್ಯರ್ಥವೆನಿಸಬಹುದು 

ಹನಿ ಹನಿ ಕೂಡಿದರೆ

ಒಂದು ಬೀಜ ಒಂದು ಮರ

ಒಂದು ಮರದಿಂದ ಹಲವು ಬೀಜ

ಹಲವು ಬೀಜಗಳು ಬೆಳೆದು ಹಲವು ಮರ

ಹಲವು ಮರಗಳಿಂದ ಕಾಡು

ಒಂದು ಪಾದ ಒಂದು ಹೆಜ್ಜೆ

ಒಂದೊಂದೇ ಹೆಜ್ಜೆ ಸೇರಿ ಹಲವು ಹೆಜ್ಜೆ

ಹಲವು ಹೆಜ್ಜೆಗಳು ಸೇರಿ ಕೆಲವು ಮೈಲು

ಕೆಲವು ಮೈಲುಗಳು ಸೇರಿ ಪಯಣ

ಒಂದು ನಲ್ಲಿ ಒಂದು ಹನಿ ನೀರು

ಒಂದೊಂದೇ ಹನಿ ಸೇರಿ ಒಂದು ಬೊಗಸೆ 

ಬೊಗಸೆ ಬೊಗಸೆ ಸೇರಿ ಹಲವು ತಂಬಿಗೆ

ಹಲವು ತಂಬಿಗೆಗಳಿಂದ ಬಾಲ್ಡಿ ನೀರು

ಒಂದು ನಾಣ್ಯ ಒಂದು ಪೈಸೆ

ಪೈಸೆ ಪೈಸೆಗಳು ಸೇರಿ ಒಂದು ರೂಪಾಯಿ

ಕೆಲವು ರೂಪಾಯಿಗಳು ಸೇರಿ ನೂರು ರೂಪಾಯಿ

ನೂರಾರು ರೂಪಾಯಿಗಳು ಸೇರಿ ಸಾವಿರಾರು

ಅನುಭವ ಸತ್ಯ

 

ಗೋಡೆ ಬದಿಯ ಮಣ್ಣಿಗೆ ನೀರೆರಚಿ ನೋಡಿ

ಮಣ್ಣು ಸಿಡಿದು ಗೋಡೆ ಕೆಸರಾಗುತ್ತದೆ

ಮನಸಿಗೆ ಒಂಥರಾ ಖುಷಿ ಎನಿಸುತ್ತದೆ

ಅದೇ ಗೋಡೆಗೆ ನೀರೇರಚಿ ನೋಡಿ

ಸಂಪೂರ್ಣ ತೊಳೆದು ಶುಭ್ರವಾಗುತ್ತದೆ

ಮೊದಲಿಗಿಂತ ಮಿಗಿಲಾದ ಖುಷಿ ಸಿಗುತ್ತದೆ

ತಿಳಿಗೊಳಕ್ಕೊಂದು ಕಲ್ಲೆಸೆದು ನೋಡಿ

ಅಲೆಅಲೆಯಾಗಿ ಉಂಗುರಗಳು ಏಳುತ್ತವೆ 

ಮನಸಿಗೆ ಮುದವೆನಿಸುತ್ತದೆ

ಅಲೆಯ ಉಂಗುರಗಳು ಅಳಿದು

ಕೊಳವು ತಿಳಿಯಾಗುವುದನ್ನು ನೋಡಿ

ಮನಸ್ಸು ತಲ್ಲಣ ರಹಿತ ಸುಖ ಪಡೆಯುತ್ತದೆ

ತೊಳೆದಾಗ, ತಿಳಿಗೊಂಡಾಗ ದೊರಕುವುದು

ಕಲಕಿ ಕದಡಿದಾಗ, ಕೆಸರೆರಚಿದಾಗ ಸಿಗುವುದಿಲ್ಲ 

ಎಂಬದು ಅನುಭವ ಸತ್ಯ, ಅದನು ಅರಿತು ನೋಡಿ

ನೆಮ್ಮದಿ

ಇಷ್ಟು ದಿನ ಎಲ್ಲಿದ್ದೆ ನೀನು

ಮೊದಲೇ ಯಾಕೆ ಕಾಣಲಿಲ್ಲ

ಎಲ್ಲಿಯೂ ಯಾಕೆ ಸಿಗಲಿಲ್ಲ

ಇಂದು ನೀನು ಎಲ್ಲಿಂದ ಬಂದೆ

ನನ್ನೊಡನೆಯೇ ಇರುವೆನೆಂದೆ

ಚಿಂತೆಗೆ ತರ್ಪಣ ಬಿಟ್ಟೆನೆಂದೆ

ಗುರಿಯ ದಾರಿ ತೋರುವೆ ಎಂದೆ 

ಅದರ ಕಡೆಗೆ ನಡೆಸುವೆ ಎಂದೆ

ಸದಾ ನನ್ನ ಹಿಂದೆ ಮುಂದೆ

ಸುತ್ತುತಿರುವೆ ಇನ್ನು ಮುಂದೆ

ನಾವಿನ್ನೆಂದಿಗೂ ಒಂದೇ ಎಂದೆ

ನೀನೇ ಆದಿ ಅಂತ್ಯವೆಂದೆ

ಅಮ್ಮ - ಮಗು

 

ಬಿಗಿಯಾದ ದಿರಿಸ ಧರಿಸಿ

ಕಷ್ಟ ಬರಿಸಿ ಅದನು ಭರಿಸಿ

ಬೆವರು ಸುರಿಸಿ ಮತ್ತೆ ಒರೆಸಿ

ದೂರ ಸರಿಸಿ ದುಃಖ ಮರೆಸಿ

ಅಪ್ಪನರಸಿ - ಅಮ್ಮ ನ ಅರಸಿ 

ಭಾರ ಹೊರಿಸಿ ಕಣ್ಣು ತೂಗಿಸಿ 

ಹಾಲು ತರಿಸಿ ಅದನು ಕುದಿಸಿ

ತಣಿಸಿ ಕುಡಿಸಿ ಸಮಾಧಾನಗೊಳಿಸಿ 

ದಿರಿಸ ತೆಗೆಸಿ ಒಗೆಸಿ ಒಣಗಿಸಿ

ಕಪಾಟಿಗೆ ಸೇರಿಸಿ ಬೀಗ ಜಡಿಸಿ

ಊಟ ಬಡಿಸಿ ತಿನ್ನಿಸಿ, ಬಾಯಿ ತೊಳೆಸಿ 

ಮಲಗಿಸಿ ಹೊದಿಕೆ ಹೊದೆಸಿ

ನೆತ್ತಿಗೊಂದು ಮುತ್ತನಿರಿಸಿ

ಜೋಗುಳ ಹಾಡಿ ನಿದ್ದೆಗೆಳೆಸಿ

ಸ್ವಪ್ನದಲ್ಲಿ ತೇಲಿಸಿ, ಮನಸಾರೆ ಹರಸಿ

ಬೆಳಗ್ಗೆ ಎಬ್ಬಿಸಿ ದಿರಿಸ ಧರಿಸಿ...

ಕಾಲನ ಕೈವಾಡ

 

ಬೆರಳಲ್ಲಿ ಬೆಳೆ ಕಡಿತಗೊಂಡಿದೆ

ಮನದಲ್ಲಿ ಮರುಳು ಹೆಚ್ಚಾಗಿದೆ

ತನುವಲ್ಲಿ ಜಡ ತುಂಬಿಕೊಂಡಿದೆ

ಕಣ್ಣುಗಳಿಗೆ ಕಿಸುರು ತಡವಿದೆ 

ಕಾಲುಗಳ ಕೆರೆತ ಹೆಚ್ಚಾಗಿದೆ

ಕೈಗಳ ಕಸುವು ಕಡಿಮೆಯಾಗಿದೆ

ತಲೆಯಲ್ಲಿ ಚಿಂತೆ ವಿಪುಲವಾಗಿದೆ 

ಬಾಯಲ್ಲಿ ಬೈಗುಳ ಹೇರಳವಾಗಿದೆ

ಒಳ್ಳೆಯ ಮಾತು ಮರೆತೇ ಹೋಗಿದೆ

ಕೂದಲೂ ಹಲ್ಲೂ ಉದುರಿ ಹೋಗಿದೆ

ಕಾಲನ ಕೈವಾಡ ಎದ್ದು ಕಾಣುತ್ತಿದೆ

ಉಸಿರು ನಿತ್ಯ ದಿನಗಳ ಎಣಿಸುತ್ತಿದೆ 

ಇವಳು

 

ಉತ್ತಿ ಬಿತ್ತಿ ಬೆಳೆಯನೆತ್ತಿ

ಮಂದಿಗೆಲ್ಲ ಕಟ್ಟಿ ಬುತ್ತಿ

ಹೆಮ್ಮೆಯಿಂದ ತಲೆಯನೆತ್ತಿ

ನಡೆಯುವಳು ಗಟ್ಟಿಗಿತ್ತಿ

ಮುಂಜಾನೆದ್ದು ಮನೆಯ ಬಿಟ್ಟು

ವಾಹನದಲ್ಲಿ ಜೀವವಿಟ್ಟು 

ದುಡಿಮೆಗೆ ತಕ್ಕ ಸಮಯ ಕೊಟ್ಟು

ಗಳಿಸುವಳು ಹೊಟ್ಟೆಗೆ ಹಿಟ್ಟು

ದೇಶವನ್ನು ಆಳಿದವಳು

ವಿಮಾನವನ್ನು ಏರಿದವಳು

ಬಾಹ್ಯಾಕಾಶಕೆ ಹಾರಿದವಳು

ವಿಜ್ಞಾನದಲ್ಲಿ ಮುನ್ನಡೆದವಳು

ನಾಡಿ ಹಿಡಿದ ವೈದ್ಯೆಯಿವಳು

ವಿದ್ಯೆಯನ್ನು ಹಂಚಿದವಳು

ತಂತ್ರಜ್ಞಾನ ಪಡೆದವಳು

ಯಂತ್ರ ಚಾಲನೆಗೆ ನಿಂದವಳು

ಸಂಗೀತ ವಿದುಷಿಯಿವಳು

ನೃತ್ಯವನ್ನು ಮಾಡಿದವಳು

ಕ್ರೀಡೆಯಲ್ಲಿ ಭಾಗವಹಿಸಿ

ಚಿನ್ನವನ್ನು ಗೆದ್ದವಳು

ಮಂತ್ರವನ್ನು ಪಠಿಸುವಳು

ಪೂಜೆಯನ್ನು ಮಾಡುವಳು

ವಿವಿಧ ಖಾದ್ಯ ಕಜ್ಜಾಯಗಳ

ಅಡುಗೆ ಮಾಡಿ ಬಡಿಸುವಳು

ವ್ಯವಹಾರದಲ್ಲಿ ಎಂದಿಗೂ ಮುಂದು

ಸಂಸಾರದಲ್ಲಿ ಬೆನ್ನೆಲುಬಾಗಿ ನಿಂದು

ಮಮತೆಯ ಮಾತೆ ಅಂದೂ ಇಂದೂ

ಇವಳು ಎಲ್ಲರಿಗೂ ಪ್ರಿಯ ಬಂಧು

ನಾಲ್ಕು ದಿನಗಳ ಪಯಣ

 

ನಾಲ್ಕು ದಿನಗಳ ಈ ಪಯಣದಲ್ಲಿ

ನಾಲಗೆ ಹರಿಬಿಟ್ಟು ಜಗಳವೇಕೆ

ಇಹ ಮರೆತು ಹೊಡೆದಾಡುವುದೇಕೆ

ದಾರಿಯಲ್ಲಿ ಒಳ್ಳೆಯ ಮಾತಾಡುವುದಿಲ್ಲವೇಕೆ

ದಾಸನಾಗು ವಿಶೇಷನಾಗು ಎಂಬುದು

ಯಾರಿಗೂ ಹಿಡಿಸುವುದಿಲ್ಲವೇಕೆ 

ಎಲ್ಲಾ ಬೆರಳುಗಳೂ ಒಂದೇ ಅಳತೆಯವಲ್ಲ 

ಎಂಬುದನ್ನು ಅರಿಯುವುದಿಲ್ಲವೇಕೆ

ಹೊಂದಿಕೊಂಡು ಬದುಕುವುದಿಲ್ಲವೇಕೆ

 

ಅಂತ್ಯದಲ್ಲಿ ಆರಡಿ ಮೂರಡಿಯೆಂದು ತಿಳಿದಿದ್ದರೂ

ಮದವೇರಿ ಮಿತಿಮೀರಿ ಕಿತ್ತಾಡುವುದೇಕೆ 

ನಮ್ಮವರಿಂದಲೇ ನಾವು ದೂರವಾಗುವುದೇಕೆ

ಯಾವುದು ಯಶಸ್ಸು ?

 

ಸಾವಿರಸಾವಿರ, ಕೋಟಿಕೋಟಿ ಗಳಿಸಿ

ಸ್ವಂತದವರಿಗೂ ನೀಡದೇ ಉಳಿಸಿ

ಸಹಾಯ ಕೇಳಿ ಬಂದರೂ ಕಡೆಗಣಿಸಿ, 

ಕೊನೆಯಲ್ಲಿ ನಿತ್ಯ ರೋಗಗಳಿಗೆ ಹಣವುಣಿಸಿ,

ನೆಮ್ಮದಿಯಿಲ್ಲದೇ ತೊಳಲುವುದೇ ?

ಒಡಹುಟ್ಟು, ರಕ್ತ ಸಂಬಂಧಿಗಳ ಕಷ್ಟಗಳಿಗೆ 

ಕಿವುಡು-ಕುರುಡಾಗಿ, ತಮ್ಮ ಕೈಕಾಲು-ಕತ್ತಿಗೆ 

ವಿವಿಧ ಆಭರಣಗಳ ಹೇರಿ, ಮಹಡಿ ಮೇಲೆ ಮಹಡಿ 

ಕಟ್ಟಿ, ಸಂಕಷ್ಟದಲ್ಲಿರುವರನ್ನು ಕರೆದು ಆಡಂಬರ

ಪ್ರದರ್ಶನ ಮಾಡುವ, ಹೀನ ಮನಸ್ಸಿನ ಹುಸಿತನವೇ ?

ಸೂರಿಲ್ಲದೇ, ಆಸರೆಯಿಲ್ಲದೇ ಹೊತ್ತಿನ ತುತ್ತಿಗಾಗಿ 

ಪರದಾಡುವವರಿಗೆ,  ಮೈಹಿಡಿಯಾಗಿ ಬೇಡುವವರಿಗೆ, 

ನಿಸ್ವಾರ್ಥದಿಂದ ನೆಲೆ-ಜಲ ನೀಡಿ ಕೈಹಿಡಿದು

ಅನಾಥ ಮಕ್ಕಳಿಗೆ ತಂದೆ-ತಾಯಿಯಾಗಿ ಪ್ರೀತಿ ನೀಡಿ

ಹಿರಿಜೀವಗಳಿಗೆ ಮಕ್ಕಳಾಗಿ ಸೇವೆ ಮಾಡುವುದೇ ?

ಸಾಕುವ ತೀಟೆ ತೀರಿದಾಗ, ಆರೋಗ್ಯ ತಪ್ಪಿದಾಗ,

ಕಂಡವರ ಮನೆ ಮುಂದೆ, ನಿಲ್ದಾಣಗಳಲ್ಲಿ,

ಬೀದಿಗಳಲ್ಲಿ ಬಿಟ್ಟು ಕೈತೊಳೆದುಕೊಳ್ಳುವ

ಪಾಪಿಗಳ ಅಸಡ್ಡೆಗೆ ಒಳಗಾದ, ಮೂಕ

ಪ್ರಾಣಿಗಳ ಹೊಟ್ಟೆ ತುಂಬಿಸಿ ಸಲಹುವುದೇ ?

ಬೆವರು ಹರಿಸಿ, ರಕ್ತ ಸುರಿಸಿ, ಕರ್ಮಯೋಗಿಗಳಾಗಿ

ದುಡಿದು, ತಮ್ಮಾಸೆಗಳಿಗೆ ಕಡಿವಾಣ ಬಿಗಿದು, 

ಒಂದೇ ಹೊತ್ತು ಉಂಡುಕೊಂಡು, ತಮ್ಮ

ಉದರಕ್ಕೆ ತಣ್ಣೀರ ಬಟ್ಟೆ ಬಿಗಿದುಕೊಂಡು,

ಕಷ್ಟದಲ್ಲಿರುವವರಿಗೆ ಸಹಾಯ ಮಾಡುವುದೇ ?

ಅಕ್ಷರ ಕಲಿಕೆಯ ವಿದ್ಯೆ ಇಲ್ಲದಿದ್ದರೂ

ತಮಗೆ ಬರುವ ಅಲ್ಪ ಕಾಸಿನಲ್ಲಿಯೂ ಪಾಲು 

ತೆಗೆದಿರಿಸಿ, ಎಲ್ಲಾ ಅಡ್ಡಿಗಳನ್ನೂ ಎದುರಿಸಿ,  

ಶುದ್ಧ ಮನೋಭಾವದೊಂದಿಗೆ ಆಸ್ಪತ್ರೆ ಕಟ್ಟಿಸಿ, 

ಸಾರ್ವಜನಿಕರಿಗೆ ಸಮರ್ಪಿಸುವುದೇ ?

ಆತ್ಮದ ಪಯಣ

 

ದಿನಾಂಕ ಬರೆದರೆ ದಿನದ 

ಮಹತ್ವ ನೆನಪಾಗುತ್ತದೆ

ದಿನದ ಮಹತ್ವ ನೆನಪಾದರೆ

ಸಂಬಂಧ ಉಳಿದು ಬೆಳೆಯುತ್ತದೆ

ಸಂಬಂಧ ಉಳಿದು ಬೆಳೆದರೆ

ಬದುಕು ಹಗುರವಾಗುತ್ತದೆ

ಬದುಕು ಹಗುರವಾದರೆ

ಬದುಕಿದ್ದೂ ಸಾರ್ಥಕವೆನಿಸುತ್ತದೆ

ಸಾರ್ಥಕವಾದ ಬದುಕು

ಮನಸಿಗೆ ನೆಮ್ಮದಿ ತರುತ್ತದೆ

ನೆಮ್ಮದಿಯ ಮನಸ್ಸು

ಆತ್ಮಕ್ಕೆ ತೃಪ್ತಿ ನೀಡುತ್ತದೆ

ತೃಪ್ತ ಆತ್ಮದ ಪಯಣ

ಸುಖಕರವಾಗುತ್ತದೆ

ಸುಖಕರ ಪಯಣವು 

ಮೋಕ್ಷವನ್ನು ಒದಗಿಸುತ್ತದೆ

ಹಾರುವ ಕುದುರೆ

 

ಚಿತ್ರ: ಗೂಗ್‌ಲ್‌ನಿಂದ

ಹಾರುತ್ತದೆ ಹಾರುವ ಕುದುರೆ

ಏರುತ್ತದೆ ಏರಿಯ ಚದುರೆ

ಬೀರುತ್ತದೆ ನೋಟವ ಓರೆ

ವಯ್ಯಾರದಲಿ ತಿರುವುತ್ತ ಮೋರೆ

ಕೆಲವೊಮ್ಮೆ, ಹಿಡಿತ ಮೀರಿ ಹಾರುತ್ತದೆ

ಮಿಡಿತದೊಂದಿಗೆ ಓಡುತ್ತದೆ

ಹಿರಿಯರಿಗೆ ಸಡ್ಡು ಹೊಡೆಯುತ್ತದೆ

ಕಿರಿಯರಿಗೆ ಗುದ್ದು ನೀಡುತ್ತದೆ

ಮಿಗಿಲಿಲ್ಲವೆಂಬಂತೆ ಕುಣಿಯುತ್ತದೆ

ಬುದ್ಧಿ ಮಾತುಗಳಿಗೆ ಬೆನ್ನು ಹಾಕುತ್ತದೆ

ಜಗವನ್ನೇ ಗೆದ್ದೆನೆಂಬಂತೆ ಮೆರೆಯುತ್ತದೆ

ತಾನೊಂದು ಅಣು ಮಾತ್ರವೆಂಬುದರ ಮರೆಯುತ್ತದೆ

ಹುಚ್ಚುತನ

 

ಕ್ಷಮಿಸಿ, ಈಗ ಹುಟ್ಟುತ್ತಿಲ್ಲ ಕವನ

ಶ್ರಮಿಸಿ ಶೋಧಿಸಿದರೂ ಸಿಗದೆಂಬ ನೆವನ

ಭ್ರಮಿಸಿ ಬರೆಯಲು ಬಿಡುತ್ತಿಲ್ಲ ಈ ಮನ

ಇಂಧನವಿಲ್ಲದೆ ಚಲಿಸದು ವಾಹನ

ಪದಗಳಿಲ್ಲದೆ ಕೂಡಿ ಬರದು ಕವನ

ಕಳಪೆಯಾದರೆಂದು ಒಳಗೊಳಗೇ ಕಂಪನ

ಬರೆಯಲೇ ಬೇಕೆಂಬ ಹುಚ್ಚುತನ 

ಒಟ್ಟಾರೆ ಬರೆದರೆ ನಗುತ್ತಾರೆ ಜನ

ನಕ್ಕರೇನಂತೆ, ಅದೇ ಅಲ್ಲವೇ ಜೀವನ

ನೀರ ಮೇಲಿನ ಗುಳ್ಳೆ

 

ಅಲ್ಲಿ ಚುಕ್ಕೆಯಿದೆ ಎಂದರೂ ಜಗಳ

ನೀರ ಗುಳ್ಳೆ ನಿಜವಲ್ಲವೆಂದರೂ ಜಗಳ

ಪ್ರತಿಯೊಬ್ಬರ ಅನುಭವ ಬೇರೆಬೇರೆ

ಎಂಬ ವ್ಯತ್ಯಾವಿಲ್ಲದೇ, ಕಚ್ಚಾಟ, ಕಳವಳ

ಮುಖವಾಡ ತೊಟ್ಟರೆ ಮುಖವನ್ನು 

ಮರೆಮಾಚಬಹುದು ಮನಸನ್ನಲ್ಲ

ಮನಸ್ಸಿಲ್ಲದೇ ಒಪ್ಪಿದರದು ನೈಜವಲ್ಲ

ನಿಜವಲ್ಲದ ವ್ಯವಹಾರದ ಅಗತ್ಯವಿಲ್ಲ

ಎದುರಿನವರು ಕನ್ನಡಿಯಲ್ಲ, ಬಿಂಬ ನಮ್ಮದಲ್ಲ 

ಈ ಸತ್ಯ ಮರೆತು, ತಿಳಿಸುವ ಯತ್ನ ಸರಿಯಲ್ಲ

ಸ್ವತಃ ಅರಿವಾದರೆ ಎಲ್ಲವೂ ಅರ್ಥವಾಗುತ್ತದೆ

ಒತ್ತಾಯದ ಬೂದಿ ಮುಚ್ಚಿಟ್ಟರೆ ಕೆಂಡ ಕುದಿಯುತ್ತದೆ 

ತಾಳ್ಮೆ ತಪ್ಪಿದಾಗ ಬೂದಿ ಹಾರಿ ಹೋಗುತ್ತದೆ

ಮುಚ್ಚಿಟ್ಟ ಕೆಂಡ ಮೇಲೆದ್ದು ಉರಿ ಉಗುಳುತ್ತದೆ

ಎಲ್ಲರನ್ನೂ ಎಲ್ಲವನ್ನೂ ಸಮಾನವಾಗಿ ಸುಡುತ್ತದೆ

ಒಳಗೂ ಹೊರಗೂ ಅಸಾಧ್ಯ ನೋವು ತುಂಬುತ್ತದೆ

ಪೊಳ್ಳು ಅಹಂಭಾವ ಬಿಟ್ಟು ನಮ್ಮನ್ನು 

ನಾವೇ ತಕ್ಕಡಿಯಲ್ಲಿ ತೂಗಿಕೊಂಡರೆ

ಇನ್ನೊಬ್ಬರ ಭಾವನೆ ಅರಿವಿಗೆ ಬರುತ್ತದೆ

ದಹನದ ಬದಲು ಸುಖ ಸಹನೆಯಿರುತ್ತದೆ

ಸ್ವಲ್ಪ ಎಚ್ಚರದಿಂದಿದ್ದು ಭಾವನೆಗೆ

ಅಂಕುಶವಿಟ್ಟಿದ್ದಿದ್ದರೆ ಎಂಬ ಪರಿತಾಪ

ಯಾಕಾಗಿ ಈ ಕೋಪ, ಅಸಹ್ಯ ರೂಪ,

ಆಮೇಲೆ ಸುಮ್ಮನೇ ಪಶ್ಚಾತ್ತಾಪ

ಅಷ್ಟು-ಇಷ್ಟು

ಗತ್ತು ಗೈರತ್ತು ಹೇರೆತ್ತು ಹೊರುವಷ್ಟು

ಕಷ್ಟ ಕೈಯಲ್ಲಿ ದೃಷ್ಟಿಯೇ ಬಿರಿವಷ್ಟು

ನಷ್ಟ ನಲುವತ್ತು ಎಂದಿಗೂ ಮುಗಿಯದಷ್ಟು  

ದೊರೆಯುವುದೆಲ್ಲರಿಗು ಹಣೆಯಲ್ಲಿ ಬರೆದಷ್ಟು

ನೆಮ್ಮದಿಲಿ ಬದುಕಬೇಕು ಆಯುಸ್ಸು ದೊರೆತಷ್ಟು

ಪಡೆದುದರ ಕೊಡುತ್ತಿರು ಅಷ್ಟು-ಇಷ್ಟು

ಕೆಲಸಕಾರ್ಯಗಳ ಮಾಡು ಕಷ್ಟಪಟ್ಟು

ಸೇವೆಗಳಲ್ಲಿ ತೊಡಗಿಕೊ ಇಷ್ಟಪಟ್ಟು

ಅರಿತುದರ ಹಂಚಿಕೊ ಸಾಧ್ಯವಾದಷ್ಟು

ಸನ್ಮಾರ್ಗದಲ್ಲಿ ನಡೆಯಬೇಕು ಆದಷ್ಟು

ಪರರಿಗೆ ಕೇಡು ಬಗೆವವರು

ಇದ್ದರೆಷ್ಟು ಬಿಟ್ಟರೆಷ್ಟು 

ದಯೆ ದಾಕ್ಷಣ್ಯವಿದ್ದರೆ ಸಾಕಷ್ಟು

ಸಿಗುವುದೆಲ್ಲವೂ ಬೇಕಾದಷ್ಟು

ತಿಳಿದುಕೊಳ್ಳಬೇಕು ಇದನೆಲ್ಲ ಬಹಳಷ್ಟು

ಸ್ವಚ್ಛಂದ - ಹಸಿರು

 

ಚಿತ್ರ: ಪಿಂಟರೆಸ್ಟ್

ಬಾನಲ್ಲಿ ಹಾರುತಿಹ ಹಕ್ಕಿಗಳ ಪುಕ್ಕಗಳಲ್ಲಿ

ಸ್ವಾತಂತ್ರ್ಯದ ಸಂಭ್ರಮ, ಸಂತೋಷ,

ತುಂಬಿ ಹರಿವುದು ಅಗಾಧ ವಿಶ್ವಾಸ

ಗೂಡಲ್ಲಿ ಬಂಧಿಯಾದ ಹಕ್ಕಿಗಳ ತನುಮನದಲ್ಲಿ

ಜಡ ತುಂಬಿದ, ಭಯ, ಅವಿಶ್ವಾಸ,

ಹೊರ ಬೀಳುವುದು ನೋವು ನಿಟ್ಟುಸಿರ ನಿಶ್ವಾಸ

ಕಾಡಲ್ಲಿ ಓಡಾಡುವ ಮೃಗಗಳಿಗೆ

ಊಟಕ್ಕೆ ಉಂಟು ಆಹಾರದ ಸರಪಳಿ

ಮೃಗಾಲಯದಲ್ಲಿ ಬಂಧಿಯಾದ ಮೃಗಗಳಿಗೆ

ಕತ್ತು, ಕಾಲಿಗೆ ಬಿಗಿದ ಗಂಟು ಸರಪಳಿ

ಬಂಧನದಲ್ಲಿ ಯಾವುದೇ ಗಂಧವಿಲ್ಲ

ಗಂಧವಿಲ್ಲದಿರೆ ಅಂದ-ಚಂದವಿಲ್ಲ 

ಅವುಗಳ ಅಂದ ಚಂದಗಳ ಕಿತ್ತುಕೊಂಡರೆ 

ಯಾರಿಗೂ, ಎಂದಿಗೂ ಉಳಿಗಾಲವಿಲ್ಲ

ಬಂಧಿಸಿಡಬೇಡಿ ಸ್ವಚ್ಛಂದ ಜೀವಿಗಳ

ಚಿವುಟದಿರಿ ಅಸಹಾಯ ಪ್ರಾಣಗಳ

ಹಿಸುಕದಿರಿ ಅವುಗಳ ಉಸಿರನ್ನು

ಬೆಳೆಸೋಣ ನಮ್ಮೊಳಗಿನ ಹಸಿರನ್ನು

ಅವಳಾಡಿದ ಮಾತುಗಳು

 

ಇದ್ದಕ್ಕಿದ್ದಂತೆ ಎದ್ದು ಬಂದು

ಎದುರು-ಬದುರಾಗಿ ನಿಂದು

ಕಣ್ಣಲ್ಲಿ ಕಣ್ಣಿಟ್ಟು ದೃಷ್ಟಿ ನೆಟ್ಟು

ಕಣ್ಣೀರ ಹರಿಯಲು ಬಿಟ್ಟು

ಅಸಹನೆಯ ಬದಿಗಿಟ್ಟು

ಭಾವನೆಗಳ ಕಟ್ಟಿಟ್ಟು

ಬಯಕೆಗಳ ಬಚ್ಚಿಟ್ಟು

ಕೈಗಳನು ನನ್ನ ಹೆಗಲ ಮೇಲಿಟ್ಟು

ಅಂದು ಅವಳಾಡಿದ ಮಾತುಗಳು

ಅನುರಣಿಸುತ್ತಿವೆ ಕಿವಿಯಲ್ಲಿ 

ತೊಳಲಾಡುತ್ತಿವೆ ಮನದಲ್ಲಿ

ಕೇಳುತ್ತಿವೆ ಹೃದಯದ ಬಡಿತದಲ್ಲಿ

ಕಾಣುತ್ತಿವೆ ಕನಸಿನಲ್ಲಿ, 

ಹೊಡೆಯುತ್ತಿವೆ ಗೊಂದಲದಲ್ಲಿ

ಜೊತೆಯಾಗಿವೆ ಪ್ರತೀ ಹೆಜ್ಜೆಯಲ್ಲಿ

ಅಚ್ಚಾಗಿದೆ ಅಸ್ಥಿ ಮಜ್ಜೆಯಲ್ಲಿ

ಎಳ್ಳು - ಬೆಲ್ಲ

ಚಿತ್ರ: ಗೂಗ್‌ಲ್‌ನಿಂದ

ಪುಷ್ಯ ಮಾಸ ಶುಕ್ಲ ಪಕ್ಷ ಉತ್ತರಾಯಣ,

ಮಕರ ರಾಶಿಯಲ್ಲಿ ಸೂರ್ಯನ ಸಂಕ್ರಮಣ

ಋತುಗಳ ಬದಲಾವಣೆಯ ಆರಂಭವಿದು

ರೈತರಿಗೆ ಬಹು ದೊಡ್ಡ ಸಮಾರಂಭವಿದು

ಪೈರ ತೆಗೆಯುವ ಶುಭ ಮುಹೂರ್ತ,

ಮನೆಮನೆಯಲ್ಲೂ ಸಮೃದ್ಧಿಯ ಸಂಕೇತ

ಸಂತಸದಲ್ಲಿ ಸಂಕ್ರಾಂತಿಯ ಹಿಗ್ಗಿನ ಸುಗ್ಗಿ,

ಮನೆ-ಮನಗಳಲ್ಲಿ ಸಿಹಿ ಸವಿ ಹುಗ್ಗಿ

ಇಂದು ಸಂಕ್ರಾಂತಿ, ತೊಡೆವುದೆಲ್ಲಾ ಭ್ರಾಂತಿ

ಹೊಳೆಯುವುದು ಹೊಸ ಸೂರ್ಯ ಕಾಂತಿ

ಹೊಸತನ ಹೊಸಮನದೊಂದಿಗೆ ಶಾಂತಿ,

ತರುವುದು ದುಃಖ ದುಮ್ಮಾನಗಳಿಗೆ ವಿಶ್ರಾಂತಿ

ಬನ್ನಿ, ತಿನ್ನಿ, ಸಂಕ್ರಾಂತಿಯ ಎಳ್ಳು-ಬೆಲ್ಲ 

ಸಿಹಿ ತಿಂದ ಬಾಯಿಯಲ್ಲಿ ಕಹಿಯು ಸಲ್ಲ

ಮುಂದಿರುವುದು ನಮಗೆ ಒಳಿತೇ ಎಲ್ಲಾ 

ಕೆಡುಕಿಗಂತೂ ಇಲ್ಲಿ ಜಾಗವೇ ಇಲ್ಲ

ಎಲ್ಲರಿಗೂ ಸಂಕ್ರಾಂತಿ ಹಬ್ಬದ ಶುಭಾಶಯ

- ಪೂ.

೧೫-೦೧-೨೦೨೪

ಮನಸ್ತಾಪ

 

ದೊಡ್ಡವರು ದೊಡ್ಡವರಾಗದಿದ್ದರೆ

ಚಿಕ್ಕವರು ದೊಡ್ಡವರಾಗ ಬೇಕಾಗುತ್ತದೆ

ಆದರೆ ಚಿಕ್ಕವರು ದೊಡ್ಡವರಾದರೆ,

ದೊಡ್ಡವರ ಅಹಂಭಾವಕ್ಕೆ ಪೆಟ್ಟಾಗುತ್ತದೆ 

ಅಹಂ ಇದ್ದಲ್ಲಿ ಮನವು ಕುರುಡಾಗುತ್ತದೆ

ಮನವು ಕುರುಡಾದಾಗ ಬುದ್ಧಿ ಕೈಕೊಡುತ್ತದೆ

ಮಾತಿಗೆ ಮಾತು ಸೇರಿ ಎಲ್ಲವೂ ಕಹಿಯೆನಿಸುತ್ತದೆ

ಕಹಿಯೇರಿದಂತೇ, ಹೇಳುವುದೆಲ್ಲಾ ವಕ್ರ ಎನಿಸುತ್ತದೆ

ಹೇಳುವುದನೆಲ್ಲ ವಕ್ರವಾಗಿ ಸ್ವೀಕರಿಸಿದರೆ

ಮನಸಿಗೆ ನೋವಾಗುತ್ತದೆ, ನೋವಾದ

ಮನಸಿಗೆ ಮೌನವೇ ಪ್ರಿಯವೆನಿಸುತ್ತದೆ

ಮೌನಕ್ಕೆ ಶರಣಾದರೆ ಮನಗಳು ದೂರವಾಗುತ್ತವೆ

ನಮ್ಮನ್ನು ನಾವು ಒರೆಗಿಟ್ಟರೆ ನಮ್ಮ ತಪ್ಪು

ತಿಳಿಯುತ್ತದೆ, ತಿಳಿದ ಮೇಲೆ ತಿದ್ದಿಕೊಂಡರೆ 

ಜೀವನವು ಹೊಳೆಯುತ್ತದೆ, ಇದು ಅರ್ಥವಾಗದಿದ್ದರೆ, 

ಅವರವರ ಪಾಲಿನ ಮನಸ್ತಾಪ ಅಲ್ಲಲ್ಲೇ ಉಳಿಯುತ್ತದೆ

ನೀನ್ಯಾರೋ - ನಾನ್ಯಾರೋ

ನಾನು ಮಗುವಾಗಿದ್ದಾಗ, 

ನೀನು ಯಾರೆಂದೇ ತಿಳಿದಿರಲಿಲ್ಲ

ನೀನೂ ಕೈಕಾಲಾಡಿಸಿ ಕಿಲಕಿಲ

ನಗುತ್ತಿದ್ದೆ, ನಾನೂ ನಗುತ್ತಿದ್ದೆ

ಬಾಲ್ಯದಲ್ಲಿ ನಿನ್ನ ನೋಡಿ, 

ನಿನ್ನ  ಹೊಗಳುವುದ ಕೇಳಿ,

ನಾನು ಹೊಟ್ಟೆಕಿಚ್ಚು ಪಡುತ್ತಿದ್ದೆ

ಉರಿಯನ್ನು ಅಮ್ಮನಿಗೆ ಮುಟ್ಟಿಸುತ್ತಿದ್ದೆ

ತಾರುಣ್ಯದ ಹೊಸ್ತಿಲಲ್ಲಿ, ನಿನ್ನ ನೋಡಿ

ಕೀಳರಿಮೆ ಅನುಭವಿಸುತ್ತಿದ್ದೆ

ನೀನು ಹತ್ತಿರ ಬಂದರೂ ನಾನು

ದೂರವೇ ಉಳಿಯುತ್ತಿದ್ದೆ

ಯೌವನದಲ್ಲಿ, ನಿನ್ನ ನೋಡಿ

ನಾನು ಆಶ್ಚರ್ಯ ಪಡುತ್ತಿದ್ದೆ 

ನೀನು ನನ್ನಂತೆಯೇ ನಾನು 

ನಿನ್ನಂತೆಯೇ, ಅಂದುಕೊಳ್ಳುತ್ತಿದ್ದೆ

ಮಧ್ಯವಯಸ್ಸಿನಲ್ಲಿ, ನಿನ್ನ ನೋಡಿ

ನಿನ್ನ ಬಗ್ಗೆ ಕೇಳಿ, ಖುಷಿ ಪಡುತ್ತಿದ್ದೆ

ನಾನು ನಿನ್ನಿಂದ ಕಲಿತೆ ನೀನು

ನನ್ನಿಂದ ಕಲಿತೆ ಎಂದು ಹೆಮ್ಮೆ ಪಡುತ್ತಿದ್ದೆ

ವೃದ್ಧಾಪ್ಯದಲ್ಲಿ, ನಿನ್ನ ನೋಡಿ

ಎಷ್ಟು ಚಂದ ಈ ಸ್ನೇಹ

ಎಷ್ಟು ಸುಂದರ ಈ ಬದುಕು

ಎಂದು ಆನಂದದಿಂದ ಇರುತ್ತಿದ್ದೆ

ನಾಳೆ ಉಸಿರು ನಿಂತ ಮೇಲೆ

ನೀನ್ಯಾರೋ, ನಾನ್ಯಾರೋ 

ಹೊರುವವರು ಯಾರೋ

ಕಳುಹಿಸಿ ಕೊಡುವವರು ಯಾರೋ