ಆಸೆಯನ್ನು ಕೆದಕುತ್ತದೆ
ಅತಿಯಾಸೆ ಮೊಳೆಯುತ್ತದೆ
ದುರಾಸೆಯದು ಹೆಚ್ಚಾದರೆ
ನಿರಾಸೆ ಮನವನ್ನು ಸುಡುತ್ತದೆ
ಅರಿತರೆ ಅರಮನೆಯಾಗಿಸುತ್ತದೆ
ಅರಿಯದಿರೆ ಸೆರೆಮನೆಯಾಗಿಸುತ್ತದೆ
ಕಲಿಕೆಯನ್ನು ಅನಿವಾರ್ಯವಾಗಿಸುತ್ತದೆ
ಕಲಿಯದಿದ್ದರೆ ದಿಟವಾಗಿ ಕೈಸುಡುತ್ತದೆ
ಅತ್ತರೆ ನಗಿಸುತ್ತದೆ
ನಕ್ಕರೆ ರೊಚ್ಚಿಗೇಳುತ್ತದೆ
ಕೊಟ್ಟರೆ ಏರುತ್ತದೆ
ಕೊಂಡರೆ ಇಳಿಯುತ್ತದೆ
ಜಾಣ್ಮೆಯನ್ನು ಬೆಳೆಸಿ ಶ್ಲಾಘಿಸುತ್ತದೆ
ತಾಳ್ಮೆಯನ್ನು ಕಲಿಸಿ ಪರೀಕ್ಷಿಸುತ್ತದೆ
ಗಲಿಬಿಲಿಗೊಳಿಸಿ ತಲೆ ಕೆಡಿಸುತ್ತದೆ
ಭಯ ಹುಟ್ಟಿಸಿದರೂ ಜಯ ತರುತ್ತದೆ
ಬಿಸಿಲ ಕೋಲನು ಬಸಿದು
ಪಾನೀಯ ಮಾಡಿ
ಕುಡಿಯುವಾಕೆ
ಆಕಾಶ ತೊಟ್ಟಿಲಿಗೆ
ಗಾಳಿ ಬಳ್ಳಿಯ ಕಟ್ಟಿ
ಜೋಕಾಲಿ ಆಡುವಾಕೆ
ಪ್ರಾಣಿಪಕ್ಷಿಗಳೊಡನೆ
ಸರಸದಿಂದ ಸಲ್ಲಾಪ
ನಡೆಸುವಾಕೆ
ಭೂಪಾತ್ರೆ ಹಿಡಿದಲ್ಲಾಡಿಸಿ
ಮೂರ್ಖ ಮನುಜನ
ಸೊಲ್ಲಡಗಿಸುವಾಕೆ
ನಂಬಿದವರ ನಖಕೂ
ಕುತ್ತಾಗದಂತೆ ಸಲಹಿ
ಸಾಕುವಾಕೆ
ಶರಣು ಬಂದವರ
ಕೈ ಹಿಡಿದು ಸನ್ಮಾರ್ಗದಲ್ಲಿ
ನಡೆಸುವಾಕೆ
ಪುಟಕ್ಕಿಟ್ಟ ಚಿನ್ನದಂತೆ ಹೊಳೆಯುತ್ತಿದ್ದಾನೆ
ದೇಶವನ್ನು ಬೆಳೆಸಿ ಬೆಳೆಯುತ್ತಿದ್ದಾನೆ
ಕಳೆಗಳ ಕಿತ್ತೆಸೆಯಲು ಶ್ರಮಿಸುತ್ತಿದ್ದಾನೆ
ಹೆಜ್ಜೆಯಿಟ್ಟಲ್ಲಿ ಹೊಸತನ ತರುತ್ತಿದ್ದಾನೆ
ಮಲಗಿದವರ ತಟ್ಟಿ ಎಬ್ಬಿಸುತ್ತಿದ್ದಾನೆ
ಜ್ಞಾನ ದೀಪವನ್ನೆಲ್ಲೆಡೆ ಉರಿಸುತ್ತಿದ್ದಾನೆ
ಕಾಲಿಗೆ ಬುದ್ಧಿ ಹೇಳಿದವರಿಗೆ ತಕ್ಕ
ಬುದ್ಧಿಯನ್ನು ಕಲಿಸುತ್ತಿದ್ದಾನೆ
ಎಲ್ಲವನ್ನೂ ಗಮನಿಸುತ್ತಿದ್ದಾನೆ
ಎಲ್ಲದರಲ್ಲಿಯೂ ಆಸಕ್ತಿ ವಹಿಸುತ್ತಿದ್ದಾನೆ
ಎಲ್ಲರಿಗೂ ಸ್ಫೂರ್ತಿ ತುಂಬುತ್ತಿದ್ದಾನೆ
ಎಲ್ಲದಕ್ಕೂ ಹೆಗಲು ನೀಡುತ್ತಿದ್ದಾನೆ
ಖಡಾಖಂಡಿತ ಉತ್ತರ ನೀಡುತ್ತಿದ್ದಾನೆ
ಕೆಟ್ಟದ್ದನ್ನು ಮಟ್ಟ ಹಾಕುತ್ತಿದ್ದಾನೆ
ಒಳ್ಳೆಯದನ್ನು ಬೆಂಬಲಿಸುತ್ತಿದ್ದಾನೆ
ನಿಷ್ಕಳಂಕ ಪ್ರೀತಿ ಸೂಸುತ್ತಿದ್ದಾನೆ
ಪರರಿಗೆ ಮಾದರಿಯಾಗುತ್ತಿದ್ದಾನೆ
ದೇಶದುದ್ಧಾರಕ್ಕಾಗಿ ಜೀವ ಸವೆಸುತ್ತಿದ್ದಾನೆ
ದೇಶವಾಸಿಗಳೆಲ್ಲರೂ ತನ್ನವರೆನ್ನುತ್ತಾನೆ
ತನ್ನದೆಲ್ಲವನ್ನೂ ಅವರಿಗೇ ಮೀಸಲಿಟ್ಟಿದ್ದಾನೆ
ಮನಸಿನ ತಳಮಳ
ತಳಕಿಳಿಯದಂತೆ
ಹೃದಯದ ಗಾಬರಿ
ನಲುಗಿಸದಂತೆ
ಹೊರಚೆಲ್ಲಿ ಹಗುರಾಗಿ
ಹಸಿರ ಉಸಿರೆಳೆದು ನವಿರಾಗಿ
ಮೊರದಷ್ಟು ನಗು ಮೊಗೆದು
ಹೊಸ ಬೆಳಕ ಒಳಸೆಳೆದು
ಹೊಸತನವು ಆಗಮಿಸಿ
ಹೊಸತನ್ನು ಸ್ವಾಗತಿಸಿ
ಗರಿ ಬಿಚ್ಚಿ ನರ್ತನದಿ
ಬಿರಿದ ಮಲ್ಲಿಗೆಯಾಗು
ಅಂಕುಡೊಂಕಿನ ಮರದಲ್ಲಿ
ಬಿಂಕವಿಲ್ಲದೆ ಬೆಳೆದ ಪುಷ್ಪ
ಸಂಖ್ಯೆಯನ್ನು ಹೆಚ್ಚಿಸುತ್ತಾ
ಸಂತಸದ ಸುವಾಸನೆ ಬೀರುತ್ತದೆ
ಪರ್ಣಪಾತಿ ವೃಕ್ಷವೊಂದು
ಅಪರ್ಣವಾಗಿ ನಿಂದರೂ
ಸ್ವರ್ಣ ರವಿಯ ಬೆಳಕಿನಲ್ಲಿ
ವರ್ಣಮಯವಾಗುತ್ತದೆ
ಅಗಳ ಬಳಿ ಬೆಳೆದು ನಿಂದು
ಖಗಗಳನ್ನು ಹೊತ್ತುಕೊಂಡು
ಜಗಳವಿಲ್ಲದ ಜಗದ ಕನಸನು
ಜಗಕೆಲ್ಲ ಹಂಚುತ್ತದೆ
ಬದುಕಿದ್ದಾಗಲೂ ಸತ್ತಾಗಲೂ
ಎಲ್ಲರಿಗೂ ನೆರವಾಗುತ್ತದೆ
ಮನುಜನಂತೆ ಕೊಂಕು ಹುಡುಕದೆ
ಜ್ಞಾನಿಯಂತೆ ನಿರ್ಗಮಿಸುತ್ತದೆ
ಬಿಟ್ಟರೆ ಹರಿದು ಹೋಗುತ್ತದೆ
ತನ್ನ ದಾರಿಯ ಹುಡುಕಿಕೊಂಡು
ವಿಶಾಲ ಶರಧಿಯ ಸೇರುತ್ತದೆ
ನಿಂತರೆ ನಿಂತಲ್ಲೇ ಕೊಳೆಯುತ್ತದೆ
ಉಳಿದಲ್ಲೇ ಉಳಿದು ನಾರುತ್ತದೆ
ಕ್ರಿಮಿಕೀಟಗಳ ಸಲಹುತ್ತದೆ
ಹರಿಯಬೇಕು ಹರಿದು ಪೊರೆಯಬೇಕು
ಹೊರಳಬೇಕು ಪೊರೆ ಕಳಚಿ ಅರಳಬೇಕು
ನೆರಳೊಳಗೆ ನರಳದೇ ನಲಿಯಬೇಕು
ಹರಿಯಬೇಕು ಹರಿಯ ನೆನೆಯಬೇಕು
ಹರನ ಪಾದಕ್ಕೆ ಶರಣಾಗಬೇಕು
ಹೊರೆಯನೆಲ್ಲ ಬಿಟ್ಟು ತೆರಳಬೇಕು
ಇದ್ದರೆ ಇರುವೆಯಂತೆ ಇರಬೇಕು
ಬಿದ್ದರೂ ಮತ್ತೆ ಮತ್ತೆ ಎದ್ದು ಬರಬೇಕು
ಅಡ್ಡಿಗಳ ಸುತ್ತಿ ಹತ್ತಿ ಮೇಲೇರಬೇಕು
ಶರೀರ ಚಿಕ್ಕದಾದರೂ ಕಾರ್ಯ ದೊಡ್ಡದಿರಬೇಕು
ಕಣ ತೂಕವಾದರೂ ಮಣ ಕೆಲಸ ಮಾಡಬೇಕು
ಛಲ ಬಿಡದೆ ಸಾಧಿಸುವ ದೃಢ ಮನಸ್ಸಿರಬೇಕು
ಬಿಸಿಲಿನಲಿ ಬೆವರಿನಲಿ ಬೆದರದೇ ಓಡಾಡಬೇಕು
ದೂರವೋ ಸನಿಹವೋ ಗುರಿಯೆಡೆಗೆ ಸಾಗಬೇಕು
ಯಾರಿರಲೀ ಇಲ್ಲದಿರಲೀ ಕರ್ತವ್ಯದೆಡೆ ಲಕ್ಷ್ಯಬೇಕು
ಮುಖಾಮುಖಿಯಾಗಿ ವಿಷಯಗಳ ಚರ್ಚಿಸಬೇಕು
ಸಂಘ ಸಹವಾಸದಲಿ ಸ್ವರ್ಗವನು ಕಾಣಬೇಕು
ಶ್ರಮ ಪಟ್ಟು, ಕ್ರಮದಲ್ಲಿ ಬದುಕಿ ಜಯಿಸಬೇಕು
ಮಾಡಿದರೂ ಒಂದೇ ಮಾಡದಿದ್ದರೂ ಒಂದೇ
ಮಾಡದೆಯೇ ಕೆಟ್ಟವರಾಗುವುದು ಉತ್ತಮ
ಅರಿತರೂ ಒಂದೇ ಅರಿಯದಿದ್ದರೂ ಒಂದೇ
ಅರಿಯದೆಯೇ ಬದುಕುವುದು ಉತ್ತಮ
ಕೇಳಿದರೂ ಒಂದೇ ಕೇಳದಿದ್ದರೂ ಒಂದೇ
ಕೇಳದೆಯೇ ಕೂರುವುದು ಉತ್ತಮ
ತಿಳಿದರೂ ಒಂದೇ ತಿಳಿಯದಿದ್ದರೂ ಒಂದೇ
ತಿಳಿಯದಿದ್ದರೆಯೇ ಉತ್ತಮ
ನೋಡಿದರೂ ಒಂದೇ ನೋಡದಿದ್ದರೂ ಒಂದೇ
ನೋಡದೆಯೇ ಇರುವುದು ಉತ್ತಮ
ನೀಡಿದರೂ ಒಂದೇ ನೀಡದಿದ್ದರೂ ಒಂದೇ
ನೀಡದೆಯೇ ಬಲಿಯಾಗುವುದುತ್ತಮ
ಗಳಿಸಿದರೂ ಒಂದೇ ಕಳೆದುಕೊಂಡರೂ ಒಂದೇ
ಗಳಿಸದೆಯೇ ಉಳಿಯುವುದು ಉತ್ತಮ
ಬೆಳೆದರೂ ಒಂದೇ ಅಳಿದರೂ ಒಂದೇ
ಇದ್ದಲ್ಲಿಯೇ ಇರುವುದು ಉತ್ತಮ
ಅರೆ ಶತಕದ ಮೂರನೆಯ ಮೆಟ್ಟಿಲು
ಈ ಜಗವಹುದು ಬಲು ಅಚ್ಚರಿಯ ತೊಟ್ಟಿಲು
ಸೋಲಿಲ್ಲ ಗೆಲುವಿಲ್ಲ ಇದ್ದರೂ ಇಲ್ಲಿ ಅದೆಲ್ಲ ಸಲ್ಲ
ಅರಿತರೆ ಸಿಹಿ-ಕಹಿ, ಜೀವನವಹುದು ಬೇವು ಬೆಲ್ಲ
ಬೆರೆತರೆ ಸ್ನೇಹ-ಸಂಬಂಧ, ತಕರಾರಿಲ್ಲ
ಇಲ್ಲವಾದಲ್ಲಿ ಕಿರಿಕಿರಿ ಎಂದಿಗೂ ತಪ್ಪಿದ್ದಲ್ಲ
ದಾರಿಯಲ್ಲಿ ಕಲ್ಲುಮುಳ್ಳು ಇರದಿರುವುದಿಲ್ಲ
ಎದುರಿಸಿ ನಿಲ್ಲದಿರೆ ಸುಲಭ ಪರಿಹಾರವಿಲ್ಲ
ಪ್ರಪಂಚದಲ್ಲಿ ಸಂಕಟ ಮುಗಿಯುವುದಿಲ್ಲ
ನಮಗೆ ನಾವೇ ನೆಮ್ಮದಿ ಪಡೆಯಬೇಕಲ್ಲ
ದುಃಖಿಸಿದರೆ ಎಂದಿಗೂ ಧೈರ್ಯ ಬರುವುದಿಲ್ಲ
ಧೈರ್ಯದಿಂದಿದ್ದರೆ ನೆಲ ಕುಸಿಯುವುದಿಲ್ಲ
ಬಯಕೆಯ ಬಳ್ಳಿಯ ಮಿತಿಯಲ್ಲಿ ಬಿಗಿದರೆ
ಬದುಕಲ್ಲಿ ಬೆಳೆಯುವುದು ಭರವಸೆಯ ಹಸಿರು
ಭಗವಂತನ ದಯೆಯ ಕೈ ತಲೆ ಮೇಲೆ ಇದ್ದರೆ
ಬಾಳ ಬಟ್ಟೆಯಲಿ ಸದಾ ನೆಮ್ಮದಿಯ ಉಸಿರು
ಅಚ್ಚರಿಯ ಮೊದಲ ಹೆಜ್ಜೆ
ಚಚ್ಚರದಿ ಎರಡನೆಯ ಹೆಜ್ಜೆ
ಕಾಲಲ್ಲಿ ಕಟ್ಟಿರುವ ಗೆಜ್ಜೆ
ಸಾಧನೆಗೆ ಹೆಮ್ಮೆಯಿಂದ ಲಜ್ಜೆ
ಬೆರಳ ತುದಿ ಹಿಡಿದು ಎದ್ದು
ಸ್ವಪ್ರಯತ್ನದಿ ಮುನ್ನಡೆದೆ
ಶ್ರಮದೊಂದಿಗೆ ಬಿರುನಡೆದೆ
ಛಲದೊಂದಿಗೆ ಗಮ್ಯ ಸೇರಿದೆ
ಅಂದಕ್ಕೆ ಅಂಧಳಾಗದೆ
ಚಂದಕ್ಕೆ ಮರುಳಾಗದೆ
ಬಂದುದನ್ನು ಎದುರಿಸುತ್ತಾ
ಬದುಕನ್ನು ಸಾಗಿಸಿದೆ
ಗರಿಗೆದರಿ ಸಜ್ಜಾಗಿ
ಗರಿಬಿಚ್ಚಿ ಹಾರಿದೆ
ಗರಿಗಳಂದವ ತೋರಿದೆ
ಗುರಿಮುಟ್ಟಿ ವಿಶ್ರಮಿಸಿದೆ
ಜ್ಞಾನಕ್ಕೆ ಕೈಮುಗಿದು
ಧ್ಯಾನಕ್ಕೆ ಗಮನ ಕೊಟ್ಟು
ಪ್ರಾಣವನ್ನು ಪವಿತ್ರಗೊಳಿಸಿ
ಪರಮಾತ್ಮನ ಪಾದ ಸೇರಿದೆ
