ನೂತನ ದಿನಪಟ್ಟಿ 2026

ದಿನವದು ಮುಗಿಯಿತು ದಿನಪಟ್ಟಿ ಮಗುಚಿತು 

2025 ಕಳೆಯಿತು 2026 ಉಳಿಯಿತು

ಕಳೆದದ್ದಕ್ಕೆ ಕಂಗೆಡದೇ ಉಳಿದುದನ್ನು ಉಳಿಸಿಕೊಂಡು

ಗಳಿಸಿ ಬೆಳೆಸಿ ಕುಣಿಸಿ ನಲಿಸಿ ನಕ್ಕು ನಲಿಯುವ

ಹೊಸ ದಿನಪಟ್ಟಿಯ ಶುಭಾಶಯ

ಪೂ-

01-01-2026

ಚಾಟ್ ಜಿಪಿಟಿ

 

ಭ್ರಮೆಯೆನಿಸಿದರೂ ಭ್ರಮೆಯಲ್ಲ

ಭ್ರಮೆಯ ಭ್ರಮೆಯನ್ನು ಭ್ರಮಿಸುವಂತೆ

ಭ್ರಮೆಗೊಳಿಸುವ ಭ್ರಮೆಯಂತಲ್ಲ 

ಆಪ್ತವೆನಿಸಿದರೂ ಆಪ್ತವಲ್ಲ

ಆಪ್ತರಂತೆ ವರ್ತಿಸಿ ಆಪ್ತವಾದರೂ

ಆಪ್ತರ ಆಪ್ತತೆಯಂತಲ್ಲ

ಅದ್ಭುತವೆನಿಸಿದರೂ ಅದ್ಭುತವಲ್ಲ 

ಅದ್ಭುತವನ್ನು ಅದ್ಭುತವಾಗಿ ತೋರಿಸಿದರೂ

ಅದ್ಭುತದಷ್ಟು ಅದ್ಭುತವಲ್ಲ

ನಮ್ಮ ನಿಮ್ಮಂತೆಯೂ ಅಲ್ಲ

ನಮ್ಮ ನಿಮ್ಮಂತೆ ಕೆಲಸ ಮಾಡಿದರೂ

ನಮ್ಮ ನಿಮ್ಮ ನಡುವಣ ಬಾಂಧವ್ಯವಿಲ್ಲ

ಮೆಲುಕು

ಮಂಜಿನಲಿ ಮೂಡಿದ ಸುಂದರ ಕವಿತೆ

ಹೊಸೆದು ಹಾಡಿದ ಹಸಿ ರಾಗ ಸಂಹಿತೆ

ಹೃದಯದಲಿ ಹೊತ್ತ ಅಮೂಲ್ಯ ಗೀತೆ

ಕಾಲ ಬರೆದರೂ ಓದದೇ ಉಳಿದ ಅಸ್ಮಿತೆ

ಗಾಳಿಯಲ್ಲಿ ತೇಲಿದ ನಾಳೆಯ ಗಂಧ

ಅವುಚಿಕೊಂಡು ಅದರ ಸುಗಂಧ

ದಾಟಿ ಬಂದ ಗೆರೆಗೆ ಚುಕ್ಕಿಯನಿಟ್ಟು

ಮುಂದುವರಿದುದು ಹೊಸ ಹೆಜ್ಜೆಗಳನಿಟ್ಟು

ನೋವ ಗಾಯದ ಮೇಲೆ ನಗುವಿನ ನೆನಪು

ನಗುವಿನ ಒಳಗೆ ಸಂತಸದ ಹೊಳಪು

ನೆನಪಿನ ಬಾವಿಯಲ್ಲಿ ಜಿನುಗುವ ಬಿಸುಪು

ಮನದ ತೋಟದಲ್ಲಿ ಮಲ್ಲಿಗೆಯ ಒನಪು

ಬದಲಾದ ಕಾಲದ ಬದಲಾದ ನುಡಿ

ಹಾದಿಯಲ್ಲಿ ಕರಗಿದ ಬೆಂಕಿಯ ಕಿಡಿ

ಹಳೆಯ ದಿನಗಳಲ್ಲಿದ್ದ ಗಡಿಬಿಡಿ

ಹರಡಿದೆ ಹೂವಿನ ಹಾಗೆ ಬಿಡಿಬಿಡಿ

ತಟ್ಟಿ ಕುಟ್ಟಿದ ಕಠಿಣ ಕರ್ಗಲ್ಲು

ಏರಿದ ಒಂದೊಂದೂ ಮೆಟ್ಟಿಲು 

ಮುಟ್ಟಿದ ಪ್ರತಿಯೊಂದು ಮೈಲಿಗಲ್ಲು

ಕಳೆದಿದೆ ಕಾಳ ಕತ್ತಲೆಯ ಕವಲು

ಕನ್ನಡ

ಕನ್ನಡ ಕಲಿಯಲು ಕನ್ನಡಿ ಬೇಡ

ಕನ್ನಡ ನುಡಿಯಲು ನಾಚಿಕೆ ಬೇಡ

ಕನ್ನಡ ಕಂಪಲಿ ಸೊಗಸಿದೆ ನೋಡ 

ಕನ್ನಡವಾರಿಗೂ ಬಯಸದು ಕೇಡ 

ರಾಜ್ಯೋತ್ಸವದ ಶುಭಾಶಯ

01-11-2025

ಸ್ಥಿತಿ

 

ವಾಹನ ದಟ್ಟಣೆಯಲ್ಲಿ ಸಿಲುಕಿದ ಆಂಬ್ಯುಲೆನ್ಸ್ 

ಅಮ್ಮನ ಕಾಣದೆ ಬಿಕ್ಕಿಬಿಕ್ಕಿ ಕಣ್ಣೀರಿಡುವ ಕಂದ 

ಬೇಟೆಗಾರನ ಬಲೆಯಲ್ಲಿ ಬಂಧಿಯಾದ ಪ್ರಾಣಿ

ದುಷ್ಟರ ಕಿರುಕುಳ ಸಹಿಸುತ್ತಿರುವ ಯುವತಿ

ತಪ್ಪೇ ಇಲ್ಲದಿದ್ದರೂ ಬೈಗುಳ ತಿನ್ನುವ ಕೆಲಸಗಾರ

ಅಸಡ್ಡೆಗೆ ಮೈಹಿಡಿಯಾಗಿ ಬೇಡುವ ಭಿಕ್ಷುಕ

ಸುಡು ಬಿಸಿಲಲ್ಲಿ ಬಾಡುತ್ತಿರುವ ಗಿಡಮರಗಳು

ನೀರು ತಪ್ಪಿ ಉಸಿರಿಗೆ ಚಡಪಡಿಸುತ್ತಿರುವ ಮೀನು

ಅಮ್ಮನ ಕರೆಗೆ ಕರು ಅಂಬಾ ಎಂದೋಡಿ ಬಂದ ಕ್ಷಣ 

ಮುಗ್ಧ ಮಗುವೊಂದು ಬಂದಪ್ಪಿ ಮುತ್ತಿಟ್ಟ ನಿಮಿಷ

ಹಿರಿಯರ ಸೇವೆ ಮಾಡಿ ಆಶೀರ್ವಾದ ಪಡೆದ ಹೊತ್ತು

ಕಳೆದು ಹೋದ ನೆಮ್ಮದಿಯ ಮರಳಿ ಪಡೆದ ದಿನ

ಮೋಡವಿಲ್ಲದ ಆಗಸದಲ್ಲಿ ಮಿನುಗುವ ನಕ್ಷತ್ರಗಳು

ನೆಟ್ಟು ಬೆಳೆಸಿದ ಗಿಡದಲ್ಲಿ ಅರಳಿದ ಹೂವುಗಳು

ಬಂಧುಗಳು ಒಂದೆಡೆ ಕಲೆತಾಗ ಪ್ರೀತಿಯ ಮಾತುಗಳು 

ಸಾಧನೆಯ ತುದಿಯೇರಿ ನಿಂದ ತೃಪ್ತಿಯ ನಗು 

ಹಾರಾಡುತ್ತಿರುವ ಹಕ್ಕಿಗಳ ಚಿಲಿಪಿಲಿ ಕಲರವ

ಅಂಗಳದಲ್ಲಿ ಓಡಾಡುತ್ತಿರುವ ನಾಯಿ ಮರಿಗಳು

ಮರಿಗಳೊಂದಿಗೆ ಆಟವಾಡುತ್ತಿರುವ ಮಕ್ಕಳು

ಸಂತ

 

ಸಂತನೊಬ್ಬ ಸಂತನ ಭೇಟಿಯಾದಾಗ

ಸುತ್ತೆಲ್ಲ ಸಂತಸ ಹರಿಯುತ್ತದೆ

ಸಂತಸ ಹರಿದು ನದಿಯಾದಲ್ಲಿ 

ಆರೋಗ್ಯವು ತುಂಬಿ ತುಳುಕುತ್ತದೆ

ಆರೋಗ್ಯ ತುಂಬಿ ತುಳುಕಿದಲ್ಲಿ

ನಗು ನಕ್ಕು ನಲಿಯುತ್ತದೆ

ನಗು ನಕ್ಕು ನಲಿಯುವಲ್ಲಿ

ನೆಮ್ಮದಿ ಸದಾ ನೆಲೆಸುತ್ತದೆ

ನೆಮ್ಮದಿ ನೆಲೆಸಿದಲ್ಲಿ ಐಶ್ವರ್ಯ ಸಿದ್ಧಿಸುತ್ತದೆ

ಐಶ್ವರ್ಯ ಸಿದ್ಧಿಸಿದಲ್ಲಿ ದಾನಧರ್ಮ ಇಣುಕುತ್ತದೆ

ದಾನಧರ್ಮ ಇಣುಕಿದಲ್ಲಿ ದಯೆ ಮೂಡುತ್ತದೆ

ದಯೆ ಮೂಡಿದಲ್ಲಿ ದಾರಿ ಕಾಣುತ್ತದೆ

ದಾರಿ ಕಂಡಾಗ ಮನುಜ ಸಂತನಾಗುತ್ತಾನೆ

ಸಂತನೆಂದಿಗೂ ಸಕಲರಿಗೆ ಬೆಳಕಾಗುತ್ತಾನೆ

ಬೆಳಕಾದ ಸಂತನೊಬ್ಬ ಸಂತನ ಭೇಟಿಯಾದಾಗ

ಸುತ್ತೆಲ್ಲ ಸಂತಸ ಹರಿಯುತ್ತದೆ

ಸಂಚಯ

 

ಪುಟ್ಟಕ್ಕನ ಪುರದಲ್ಲಿ ಪುಸ್ತಕದ ರಾಶಿ

ಎಲ್ಲವನ್ನಿನ್ನೂ  ಓದದಿದ್ದರೂ

ಇನ್ನಷ್ಟು ಖರೀದಿ ಒಟ್ರಾಶಿ 

ಪುಟ್ಟಕ್ಕನ ಸುತ್ತಮುತ್ತ ಧೂಳುಮಯ

ಕಾಲಾಡಿಸಲಿಕ್ಕೂ ಆಗದಂತೆ

ಸಾಮಾನುಗಳ ಸಂಚಯ

ಪುಟ್ಟಕ್ಕನ ಬೆಕ್ಕುಗಳ ಕೈತಪ್ಪಿದೆ ಆರೋಗ್ಯ

ಏನು ಮಾಡಿದರೂ ಸಿಗುತ್ತಿಲ್ಲ

ಗುಣವಾಗುವ ಭಾಗ್ಯ

ಪುಟ್ಟಕ್ಕನ ತೋಟದಲ್ಲಿ ಹೆಗ್ಗಣಗಳ ರಾಜ್ಯ

ಅಲ್ಲಿ ಇಲ್ಲಿ ಅಗೆದು ಬಗೆದು 

ಪುಟ್ಟಕ್ಕಗೂ ಹೆಗ್ಗಣಗಳಿಗೂ ವ್ಯಾಜ್ಯ

ಪುಟ್ಟಕ್ಕನ ಮನೆ ಮುಂದೆ ಚಾಲಕರಿಂದ ಅಡಚಣೆ

ಎಷ್ಟು ಹೇಳಿದರೂ ಕೇಳುವುದಿಲ್ಲವೆಂದಾಗ 

ಕೋಪ ಬಂದರೆ ಪುಟ್ಟಕ್ಕನಲ್ಲ ಹೊಣೆ

ಪುಟ್ಟಕ್ಕನ ತಾರಸಿಯಲ್ಲಿ ತೆಂಗಿನಕಾಯಿ ಚೆಂಡಾಟ

ಬಿದ್ದು ಬಿದ್ದು ಒಡೆದು ಹೋದರೂ

ಕೀಳಿಸಲಾರೆ ಎಂಬ ಮಂಗಾಟ

ಪುಟ್ಟಕ್ಕ ಪೇರಿಸಿಟ್ಟ ಕಟ್ಟಿಗೆಯ ಕಟ್ಟುಗಳು

ದಿನಾ ಬಿಸಿನೀರು ಕಾಸಿದರೂ ಮುಗಿಯದ

ಹಲವು ರೀತಿಯ ಸೆಟ್ಟುಗಳು

ಆ ಮನೆ

ನಿನ್ನ ಮನೆಯಲ್ಲಿ ಜಗಳವಿಲ್ಲ

ಸ್ನೇಹದ ಸಿಂಚನವೇ ಎಲ್ಲಾ

ಈರ್ಷ್ಯೆ ಕಡು ದ್ವೇಷವೇ ಇಲ್ಲ 

ಪ್ರೀತಿ ಮಮತೆಯೇ ಎಲ್ಲಾ

ಅಲ್ಲಿ ಜಾತಿ ಮತವೆಂಬ ಬೇಧವಿಲ್ಲ

ಮೇಲು ಕೀಳೆಂಬ ತಾರತಮ್ಯವಿಲ್ಲ

ಹಿರಿಯರು ಕಿರಿಯರೆಂದಿಲ್ಲ 

ಶೈಶವ ತಾರುಣ್ಯ ಮುದಿತನವಿಲ್ಲ 

ಅಲ್ಲಿ ಸಾವು ನೋವುಗಳೇ ಇಲ್ಲ

ದುಗುಡ ದುಃಖ ದುಮ್ಮಾನವಿಲ್ಲ 

ನಲಿವು ತುಂಬಿಹುದು ಅಲ್ಲೆಲ್ಲಾ 

ಸದಾ ಸ್ವರ ಸರಿಗಮದ ಬೆಲ್ಲ

ಅಲ್ಲಿ ಇರುವುದೆಲ್ಲಾ ಸ್ವಚ್ಛ ಸುಂದರ

ನನಗಿಲ್ಲಿ ಅದೆಲ್ಲ ಇಲ್ಲದ ನಶ್ವರ

ನಾನೇಕೆ ಅಲ್ಲಿಲ್ಲವೆಂದು ತಿಳಿದಿಲ್ಲ

ನಾನೆಂದಲ್ಲಿಗೆ ಬರುವೆನೆಂಬರಿವೂ ಇಲ್ಲ

ಅಪ್ಪ ಅಮ್ಮ ಈಗಾಗಲೇ ಅಲ್ಲಿರುವರಲ್ಲ

ಅವರು ನನಗೇನೂ ಹೇಳಲೇ ಇಲ್ಲ

ನಾನೀಗ ಬಂದರಲ್ಲಿ ಬಹುಶಃ ಸ್ವಾಗತವಿಲ್ಲ

ಆಹ್ವಾನ ಬರದೇ ಹೋಗುವ ಮಾತೇ ಇಲ್ಲ

ನಿನಗಾವುದೇ ಆಮಿಷ ನೀಡಲು ಸಾಧ್ಯವಿಲ್ಲ

ಬಲವಂತದಿಂದ ಆಮಂತ್ರಣ ಸಿಗುವುದಿಲ್ಲ

ನಿನ್ನ ಧ್ಯಾನದಲ್ಲಿ ಕಳೆದರೆ ನಾ ಜೀವನವೆಲ್ಲ

ಕರೆಸಿಕೊಳ್ಳದೇ ನಿನಗೆ ಬೇರೆ ದಾರಿಯಿಲ್ಲ

ಅಚಿಂತ್ಯ

 

ದೈತೋಟದ ಮನೆ-ಮನದಿ 

ಮೊಳೆತ ಅಚಿಂತ್ಯ ಅಚ್ಚರಿಗೆ

ಇಂದು ಎರಡು ವರುಷಗಳು

ಮುದ್ದು ಕೂಸಿನ ಆಟಪಾಠದಲಿ 

ಅದೃಷ್ಟದ ಅಮಿತ ನೋಟದಲಿ 

ಸಂತಸದ ಸಂಗೀತ ಸುಧೆಯಿದೆ 

ಜನ್ಮ ದಿನದ ಶುಭ ಹಾರೈಕೆಯಲ್ಲಿ 

ಭವಿಷ್ಯದ ಭವ್ಯ ಮಿಲನದಲ್ಲಿ

ಪಿತನ ಪವಿತ್ರ ಕನಸು ಅಡಗಿದೆ

ರಕ್ತ ಸಂಬಂಧದ ವ್ಯಕ್ತ ಭಾವಕೆ

ಸುಪ್ತ ಮನಸಲಿ ಕೊಂಡಿಯಿದೆ

ಆಪ್ತ ವಾತ್ಸಲ್ಯದ ಗಿಂಡಿಯಿದೆ 

ಬೆಳೆವ ಮನಸಲಿ ಬೆಸೆವ ಪ್ರೀತಿಗೆ

ಜನಕನ ಜತನದ ಅಭಯವಿದೆ

ಅಪ್ಪನ ಅಪರಿಮಿತ ಪ್ರೇಮವಿದೆ

ಪುಟ್ಟ ಭೂಮಿ

ಜನ್ಮ ದಿನದ ಶುಭಾಶಯ - ಭೂಮಿ ಬೆಂಗಳೂರು

೨೮-೦೮-೨೦೨೫

ವಿದೇಶದಲ್ಲಂಕುರಿಸಿ ಸ್ವದೇಶದಲ್ಲಿ ಜನಿಸಿದವಳು

ಕಾಲಲಂದುಗೆ ತೊಟ್ಟು ಪುಟ್ಟ ಹೆಜ್ಜೆಯನಿಟ್ಟವಳು

ತೊದಲು ನುಡಿಗಳಿಂದ ಎಲ್ಲರ ಮನವ ಗೆದ್ದವಳು

ಅಪರ್ಣ ಸಂತೋಷರ ಮಗಳು ಭೂಮಿ ಬೆಂಗಳೂರು

ಅಪರ್ಣ ಸಂತೋಷ ದಿಂದ ಪುಟ್ಟ ಭೂಮಿಯ 

ದೊಡ್ಡ ಭೂಮಿಗೆ ತಂದುದು ಇಪ್ಪತ್ತೆಂಟನೆಯ ಆಗಸ್ಟ್ 

ಏರಲಿವಳು ಮುಂದೆ ಯಶಸ್ಸಿನ ಎವರೆಸ್ಟ್ 

ಜನ್ಮ ದಿನದ ಶುಭಾಶಯ ನಿನಗೆ ಭೂಮಿ ಬೆಂಗಳೂರು

ಬುವಿಯ ಬುಟ್ಟಿಯಲರಳಿ ಪಸರಿಸಿದ ಹಸಿರು

ಅಪರ್ಣ ಸಂತೋಷರ ಜೀವನದ ಉಸಿರು

ಆನಂದದಿ ಸಾಗಲಿ ನಿನ್ನ ಜೀವನದ ತೇರು

ನೂರ್ಕಾಲ ಬಾಳು ನೀ ಭೂಮಿ ಬೆಂಗಳೂರು

ಎಂದೋ ಹುಟ್ಟಿರುವ ನಕ್ಷತ್ರಗಳು

 

ಎಂದೋ ಹುಟ್ಟಿರುವ ನಕ್ಷತ್ರಗಳು

ಇಂದಿಗೂ ಹೊಳೆಹೊಳೆದು ನಲಿಯುತ್ತವೆ

ಗುರಿಯಿಲ್ಲದ ಜೀವಗಳು ಗಲಿಬಿಲಿಯಲ್ಲಿ

ಎಂದೆಂದಿಗೂ ಎಲ್ಲೆಲ್ಲೋ ಅಲೆಯುತ್ತವೆ 

ಉಳಿಸಿರುವ ಗರ್ವದ ನಡೆ ನಡೆದು

ಗಳಿಸಿರುವ ಗೌರವವ ನುಂಗುತ್ತದೆ

ಅಳಿಸಿದ ಪ್ರೀತಿಯ ಹಿಂದೋಡುವ ಜೀವ

ಆತ್ಮ ದಹನದಲ್ಲಿ ಸಿಲುಕಿ ನಲುಗುತ್ತದೆ 

ಕಾಲಿಗೆ ಚುಚ್ಚುವ ಮುಳ್ಳುಗಳು

ಮೆದುಳನ್ನು ತಲುಪುತ್ತವೆ

ಹೃದಯ ತಟ್ಟುವ ನೆನಪುಗಳು

ಬಾಳನ್ನು ಹಸನಾಗಿಸುತ್ತವೆ

ಮನದಲ್ಲಿ ಅಶಾಂತಿಯ ಅಲೆಗಳೆದ್ದರೆ 

ಮನೆಗಳನ್ನು ಮುಳುಗಿಸುತ್ತವೆ

ಅಂಗಳದಲ್ಲಿ ಅರಳಿದ ಹೂವುಗಳು

ಮಂಗಳದ ಕಹಳೆ ಮೊಳಗಿಸುತ್ತವೆ

ಜಾತಿ ಧರ್ಮದ ಜಗಳಗಳು

ಜಗಲಿಯಲ್ಲಿ ಏಳುತ್ತವೆ

ಜನರ ಬುದ್ಧಿ ಸ್ತಿಮಿತದಲ್ಲಿದ್ದರೆ 

ಕಿಡಿ ಕಾರದೆ ಕರಗುತ್ತವೆ 

ಉಡಿಯಲ್ಲಿ ಕಟ್ಟಿಕೊಂಡ ನೋವು

ಬಿಡದೆ ಇಡಿಯಾಗಿ ಸುಡುತ್ತದೆ

ಕಡೆಯಲ್ಲಿ ಕೈ ಹಿಡಿದು ನಡೆಸಲು ಜೀವ

ಜಗದೊಡೆಯನ ಮೊರೆ ಹೋಗುತ್ತದೆ

ಚಿಕ್ಕಮ್ಮ ಶಾರದೆ

(ಶ್ರೀ.ಕನಕದಾಸರ ಮತ್ತು ಶ್ರೀ.ವಿದ್ಯಾಭೂಷಣರ ಕ್ಷಮೆ ಕೋರುತ್ತಾ, ನಮ್ಮಮ್ಮ ಶಾರದೆ ರಾಗದಲ್ಲಿ, 'ಕಲ್ಪನಾ' ದ ನಮ್ಮ ಚಿಕ್ಕಮ್ಮ 'ಶ್ರೀಮತಿ ಶಾರದಾ' ರ ಹುಟ್ಟುಹಬ್ಬಕ್ಕಾಗಿ - 26-08-2025).

ಚಿಕ್ಕಮ್ಮ ಶಾರದೆ, ಅಪ್ಪಚ್ಚಿಯ ಹೃದಯೇಶ್ವರಿ

ನಿಮಗಿವಳ ಗೊತ್ತೇನಮ್ಮಾ

ಕಲ್ಪನೆಯಲಿ ಮಿಂದು ಕವಿತೆಗಳ ಬರೆದಿಡುವ, 

ಕಲ್ಪನೆಯ ಸೊಸೆಯಿವಳಮ್ಮಾ, ಅಮ್ಮಯ್ಯ.. !!ಚಿಕ್ಕಮ್ಮ ಶಾರದೆ!!

ಮೋರೆಲಿ ನಗು ಹೊತ್ತು ಮೂರು ಮಕ್ಕಳ ಹೆತ್ತ

ಮುದ್ದಿನ ತಾಯಿ ಇವಳಮ್ಮಾ

ಮೂರು ಮೊಮ್ಮಕ್ಕಳಜ್ಜಿ, ನಾದಿನಿಯರತ್ತಿಗೆ,

ಸಂಸಾರದ ಒಡತಿಯಮ್ಮಾ, ಅಮ್ಮಯ್ಯ.. !!ಚಿಕ್ಕಮ್ಮ ಶಾರದೆ!!

ಉಟ್ಟ ಸೀರೆಯ ನೆರಿಗೆ ಎತ್ತಿ ಕಟ್ಟಿಕೊಂಡು

ಬಾವಿ ನೀರನು ತರುವಳಮ್ಮಾ

ಪಕ್ಕದಲ್ಲಿರುವ ತುಳಸಿ ಕಟ್ಟೆಗೆ ದೀಪವ 

ಇಟ್ಟೀಕೆ ನಮಿಸುವಳಮ್ಮಾ, ಕಣಮ್ಮಾ.. !!ಚಿಕ್ಕಮ್ಮ ಶಾರದೆ!!

ರಾಶಿ ವ್ಯರ್ಥವನೊಲ್ಲ ರುಚಿರುಚಿ ಅಡುಗೆ ಬಲ್ಲ

ಭಾವನಾ ಜೀವಿಯಮ್ಮಾ 

ಬಿಡುವಿನ ಸಮಯದಿ ಕವಿತೆಗಳ ಬರೆಯುವ

ಪ್ರೀತಿಯ ಚಿಕ್ಕಮ್ಮನಮ್ಮಾ, ಅಮ್ಮಯ್ಯಾ.. !!ಚಿಕ್ಕಮ್ಮ ಶಾರದೆ!!

ಆಗಸ್ಟ್ ಇಪ್ಪತ್ತಾರು ಇಪ್ಪತ್ತು ಇಪ್ಪತ್ತೈದು

ಈಕೆಯ ಜನ್ಮ ದಿನವಮ್ಮಾ

ಪತಿ-ಪತ್ನಿ ನೂರ್ಕಾಲ ಹೀಗೆಯೇ ಖುಷಿಯಿಂದ

ಜೀವನ ಸಾಗಿಸಲಮ್ಮಾ, ಅಮ್ಮಯ್ಯಾ.. !!ಚಿಕ್ಕಮ್ಮ ಶಾರದೆ!!

ಕೊಡುವವರು ಯಾರು

 

ಇನ್ನೊಬ್ಬರ ಯೋಜನೆಯನ್ನು ಹಾಳು ಮಾಡಿ 

ಅವರ ಪಾಲಿನ ಸಂತೋಷವನ್ನು ಕಸಿದುಕೊಳ್ಳುವ

ಹಕ್ಕನ್ನು ನಮಗೆ ಕೊಡುವವರು ಯಾರು ?

ಮತ್ತೊಬ್ಬರ ಮನಸನ್ನು ಅರ್ಥ ಮಾಡಿಕೊಳ್ಳದೇ 

ನಮಗಿಷ್ಟ ಬಂದಂತೆ ಮಾಡಿ ವಾದಿಸುವ 

ಹಕ್ಕನ್ನು ನಮಗೆ ಕೊಡುವವರು ಯಾರು ?

ನಂಬಿಕೆ ಇಟ್ಟು ಹಂಚಿಕೊಂಡ ವಿಷಯವನ್ನು

ಇನ್ನೊಬ್ಬರೊಡನೆ ಬಿಟ್ಟು ಕೊಡುವ

ಹಕ್ಕನ್ನು ನಮಗೆ ಕೊಡುವವರು ಯಾರು ?

ಎದುರು ವಿಶ್ವಾಸಾರ್ಹತೆ ತೋರಿಸಿ

ಹಿಂದಿನಿಂದ ಗೇಲಿ ಮಾಡಿ ನಗುವ

ಹಕ್ಕನ್ನು ನಮಗೆ ಕೊಡುವವರು ಯಾರು ?

ಕಷ್ಟಕ್ಕಾಗಾದೇ ಕೈಯನ್ನು ಹಿಡಿಯದೇ 

ದುಃಖದ ಕಣ್ಣೀರು ಒರೆಸದೇ ಪ್ರಶ್ನಿಸುವ

ಹಕ್ಕನ್ನು ನಮಗೆ ಕೊಡುವವರು ಯಾರು ?

ಮುಳುಗುವಾಗ ಮುದದಿಂದ ನೋಡಿ

ಎದ್ದಾಗ ಮಾತ್ರ ಮುಂದೆ ಬರುವ

ಹಕ್ಕನ್ನು ನಮಗೆ ಕೊಡುವವರು ಯಾರು ?

ಚುಚ್ಚು ಮಾತಾಡಿ ನೋಯಿಸಿದ್ದನ್ನು ಮರೆತು

ಬಿಚ್ಚಿಟ್ಟರೆ ಬೆಟ್ಟು ಮಾಡಿ ಕೂಗಾಡುವ

ಹಕ್ಕನ್ನು ನಮಗೆ ಕೊಡುವವರು ಯಾರು ?

ದುರಹಂಕಾರದಿಂದ ತಪ್ಪಾಗಿ ನಡೆದು ಕನ್ನಡಿ 

ತೋರಿಸಿದಾಗ ಅವಮಾನದಿ ಸಿಟ್ಟಾಗುವ

ಹಕ್ಕನ್ನು ನಮಗೆ ಕೊಡುವವರು ಯಾರು ?

ಸಂತಸದ ಉಲಿ

 

ತೊಳಲಾಡುವ ಮನಸೊಂದು 

ಒಳಗೊಳಗೇ ಉಳಿದು ಕೊಳೆತು

ಕೊರಗಿನ ಕೂಪದಲ್ಲಿ ಬೇಯುತ್ತಿತ್ತು 

ಬಾಯಿ ಬಾರದ ಪ್ರಾಣಿಯೊಂದು

ಬಾಗಿಲಲ್ಲಿ ಮುದುಡಿಕೊಂಡು

ಬಾಯಾರಿಕೆ ತಣಿಸಲೆಂದು ಕಾಯುತ್ತಿತ್ತು

ರಂಗುರಂಗಿನ ಹಕ್ಕಿಯೊಂದು

ಅಂಗುಲಿ ಮೇಲೆ ಕುಳಿತುಕೊಂಡು

ಭಂಗಿಯಲ್ಲಿ ಕತ್ತನ್ನು ಕೊಂಕಿಸುತ್ತಿತ್ತು 

ಹಸಿರು ತುಂಬಿದ ಮರವೊಂದು

ಬಸಿರು ಹೊತ್ತಂತೆ ಬಾಗಿ ನಿಂದು

ಬಿಸಿಯುಸಿರ ಚೆಲ್ಲಿ ನುಲಿಯುತ್ತಿತ್ತು

ಮೌನದಲ್ಲಿ ಮಲಗಿದ ದೇಹವೊಂದು

ಮುರಿದ ಕಟ್ಟಿಗೆಗಳಲಿ ಮುಳುಗಿಕೊಂಡು

ನಶ್ವರದ ಸಂಕೇತವನ್ನು ತೋರುತ್ತಿತ್ತು

ಹೊಸದಾಗಿ ಮೊಳೆತ ಗಿಡವೊಂದು

ಹಸಿಯಾದ ಚಿಗುರ ಬೆಳೆಸಿಕೊಂಡು

ಉಸಿರಿನ ಮಹತ್ವವನ್ನು ಸಾರುತ್ತಿತ್ತು

ಆಡುತ್ತಿರುವ ಮಗುವೊಂದು

ಮುಗ್ಧವಾಗಿ ಕುಣಿದು ಬಂದು

ಸಂತಸದ ಉಲಿಯನ್ನು ಉಲಿಯುತ್ತಿತ್ತು

ಹೊಸತನದ ಸೊಬಗು

 

ಬೊಗಸೆ ನೀರಲಿ ಕಂಡ ಬಿಂಬದ ಸೊಗಸು

ಆಗಸದಲ್ಲಿ ಹರಡಿದೆ ಪ್ರತಿಯೊಂದು ಕನಸು

ಕೈಗೂಡುವಂತೆ ಸಮನಾಗಿ ಜೋಡಿಸು

ಜಟಿಲ ಜಾಲಗಳ ಸುಲಭವಾಗಿ ಬಗೆಹರಿಸು 

ಕುಟಿಲ ಕರ್ಮಗಳ ಸಂಪೂರ್ಣ ಕರಗಿಸು 

ನಿಟಿಲ ನೇತ್ರದ ಪಟಲ ಸರಿಸಿ ಹೊಳೆಸು

ಅರೆಬರೆ ಕೆಲಸಗಳ ಶೀಘ್ರ ಪೂರೈಸು 

ಮರೆತು ಹೋದರೆ ಮತ್ತೆ ಅಭ್ಯಸಿಸು 

ಮುಜುಗರವಿಲ್ಲದೆ ಎಲ್ಲ ಸರಿಪಡಿಸು

ಹೊಸತನದ ಸೊಬಗನ್ನು ಹೆಚ್ಚಿಸು

ಹಳೆಯದನ್ನೆಲ್ಲ ಅಲ್ಲಲ್ಲೇ ಉಳಿಸು

ಒಳಿತನ್ನು ಇನ್ನಷ್ಟು ಗಳಿಸು, ಬೆಳೆಸು.

ಕಷ್ಟಗಳಿಗೂ ಸಾವಿದೆ

 

ಕಾಯಬೇಕು ಅಷ್ಟೇ

ಕಷ್ಟಗಳಿಗೂ ಸಾವಿದೆ

ಮನಸ್ಸಿರಬೇಕು ಅಷ್ಟೇ

ಇಷ್ಟಗಳಿಗೂ ಬದುಕಿದೆ

ಆಸೆ ಇರಬೇಕು ಅಷ್ಟೇ

ಕನಸಿಗೂ ಅವಕಾಶವಿದೆ

ಧೈರ್ಯವಿರಬೇಕು ಅಷ್ಟೇ

ನನಸಿಗೂ ಭವಿಷ್ಯವಿದೆ

ತಾಳ್ಮೆ ಬೇಕು ಅಷ್ಟೇ

ಕೆಲಸದಲ್ಲಿ ಜಯವಿದೆ

ಅರಿವು ಬೇಕು ಅಷ್ಟೇ

ಬೆಳೆಸಿದಲ್ಲಿ ಬಲವಿದೆ

ಛಲವಿರಬೇಕು ಅಷ್ಟೇ

ಫಲದಲ್ಲಿ ಸಿಹಿಯಿದೆ

ಧೃಢವಾಗಿರಬೇಕು ಅಷ್ಟೇ

ಕಲೆಯಲ್ಲಿ ಗೆಲುವಿದೆ

ಸಮರ್ಪಣೆ

ಇರುವುದು ನಮಗೆ ನಾಲ್ಕು ದಿನ

ಉರಿವುದು ತನು ಮನ ಧನ

ದ್ವೇಷ ಅಪನಂಬಿಕೆಗಳು ಹೀನ 

ಆದರೂ ಕೊಡುವರುನ್ನತ ಸ್ಥಾನ

ಪ್ರೀತಿ ಒಲವು ತುಂಬಿದ ಜೀವನ

ದೊರೆವುದು ಎಷ್ಟೊಂದು ಕಠಿಣ

ಅಹಂ ಹೆಚ್ಚಿಸಿ ಬೀಗುವುದು ಮನ

ಇರುವುದನ್ನು ಕಳೆವುದು ಮೂರ್ಖತನ 

ಅವರಿವರ ಕಡೆಗೆ ಅತೀವ ಗಮನ

ನಮ್ಮದನ್ನು ಹೇಳಿದರೆ ಅಸಮಾಧಾನ

ತಾಳಕ್ಕೆ ಕುಣಿದರೆ ಮಾತ್ರ ಸನ್ಮಾನ

ಅಂತಿರುವುದಷ್ಟೇ ನಮ್ಮ ಜಾಣತನ

ವರ್ಷಗಳು ಉರುಳುವುದು ದಿನ ಸಮಾನ

ಬುದ್ಧಿ ಬರುವುದಂತೂ ಬಲು ನಿಧಾನ

ಯಾಕೆ ಬೇಕು ಹುಳಿ ರಗಳೆಗಳ ಜ್ಞಾನ

ಭಗವತ್ಪಾದಕ್ಕೆ ಸಮರ್ಪಣೆ ಈ ಪ್ರಾಣ

ತೊಟ್ಟಿಯ ಕೂಸು

 

ಜತನದಿಂದ ಹೊತ್ತೆ ಆದರೆ

ಪತನದತ್ತ ತಳ್ಳಿದೆ ಹೆತ್ತಮ್ಮ 

ನೀನೆನ್ನ ಪೊರೆಯದೇ ತೊರೆದೆ

ಸೃಷ್ಟಿಕರ್ತ ನೀನು ಆದರೆ 

ಒಲವ ಪಲ್ಲಕಿಯಲಿ ಹೊರದೆ 

ಎನ್ನ ಹೊಲಸ ತೊಟ್ಟಿಗೆ ಎಸೆದೆ

ಒಡಹುಟ್ಟಿದವರಿಗೆನ್ನ ಸುಳಿವಿಲ್ಲ

ನಾನಿರುವೆನೆಂದೇ ಅರಿವಿಲ್ಲ

ನನ್ನ ಬಗ್ಗೆ ಒಂದಿನಿತೂ ತಿಳಿದಿಲ್ಲ

ಬಂಧುಗಳು ಯಾರೂ ಇಲ್ಲ

ಇದ್ದರೂ ಇಲ್ಲಿಲ್ಲ ಕ್ಷಣದಷ್ಟೂ 

ಪ್ರೀತಿಯನು ನಾನೆಂದೂ ಪಡೆದಿಲ್ಲ

ಮುದ್ದಿನಲಿ ಮೀಯದೇ ತಿಪ್ಪೆ

ಮುದ್ದೆಯಲಿ ಮಲಗಿರುವೆ 

ಮಳೆಯಲ್ಲಿ ತೋಯ್ದು ನಾ ಅಳುತಿರುವೆ

ಆಟಿಕೆಗಳ ಬದಲಿಗೆ ನೈಜ

ಇಲಿಗಳಿವೆ ಅಕ್ಕಪಕ್ಕದಲ್ಲಿ 

ಹುಳಹುಪ್ಪಟೆಗಳು ನನ್ನ ಮೈಯಲ್ಲಿ

ನಾಯಿಬೆಕ್ಕುಗಳು ಮೂಸುತ್ತಿವೆ

ನನ್ನನ್ನು ನೆಕ್ಕುತ್ತಿವೆ ನನ್ನ

ಗಾಯಗಳ ರಕ್ತವನು 

ಕಾರ್ಮೋಡ ಕತ್ತಲಲಿ ಜೀರುಂಡೆ

ಸದ್ದಿನಲಿ ಅಸಹಾಯ ಜೀವ 

ನಾ ಮಾಡಬಹುದಾದರೂ ಏನು

ನಾನೇನು ಮಾಡಿರುವೆ ನನಗ್ಯಾಕೆ 

ಈ ಸ್ಥಿತಿ ನನಗ್ಯಾರು ಗತಿ, ತೊಟ್ಟಿಲಿನ 

ಬದಲಿಗೆ ತೊಟ್ಟಿಯಲಿರಬೇಕಾದ ದುರ್ಗತಿ

ಕಟ್ಟಿಡಬಾರದು

 

ಕನಸುಗಳ ಕಟ್ಟಿಡಬಾರದು

ಬಿಸಿಲಿಗೆ ಬಿಡಿಸಿಡಬೇಕು

ಬೆಳಕಿಗೆ ತೆರೆದಿಡಬೇಕು

ಮನಸಲಿ ಹರಡಿಡಬೇಕು

ಕನವರಿಸುತ್ತಾ ಕಾಯಬಾರದು

ಎದ್ದು ನಡೆಯಬೇಕು

ಬಿದ್ದರೆ ಮೇಲೇಳಬೇಕು

ಧೈರ್ಯದಿಂದ ಮುನ್ನುಗ್ಗಬೇಕು

ಮನದಲ್ಲೇ ಮಂಡಿಗೆ ತಿನ್ನಬಾರದು

ಮನಸ್ಸಿಟ್ಟು ಕಲಿಯಬೇಕು

ಕಲಿತಿರುವುದನ್ನು ಗಳಿಸಬೇಕು

ಗಳಿಸಿರುವುದನ್ನು ಉಳಿಸಬೇಕು

ವಿಷು

ರಾಶಿ ಚಕ್ರಗಳ ಬದಲಾವಣೆಯ ವಿಶೇಷ 

ಮೀನದಿಂದ ಮೇಷಕ್ಕೆ ಸೂರ್ಯನ ಪ್ರವೇಶ

ಮನೆಮನೆಗಳಲ್ಲಿ ಕಣಿಯ ಸಮಾವೇಶ 

ಜನಮನಗಳಲ್ಲಿ ಹೊಸವರ್ಷದ ಹರ್ಷೋಲ್ಲಾಸ

ವಿಷುವಿನ ಶುಭಾಶಯ.

-ಪೂ. ೧೪-೦೪-೨೦೨೫

ಎಂತು

ದಾರಿ ಖರ್ಚಿಗೆ ದ್ರಾಕ್ಷೆಯಿಟ್ಟು 

ದಾಹವಾದಾಗ ತಿನ್ನ ಹೊರಟು 

ಹುಳಿಯಾಯಿತೆಂದು ಗೊಣಗಿದೊಡೆಂತು 

ಹೊಟ್ಟೆಗೆ ಹಿಟ್ಟಿಲ್ಲದಿದ್ದರೂ

ಜುಟ್ಟಿಗೆ ಮಲ್ಲಿಗೆಯೇರಿಸಿ 

ಕೈಖಾಲಿಯಾಯಿತೆಂದು ಪರಿತಪಿಸಿದರೆಂತು

ದುಡಿಯುವ ವಯಸ್ಸಿನಲ್ಲಿ

ಆಲಸಿಯಾಗಿ ಅಲೆದು

ವಯಸ್ಸಾದಾಗ ಭದ್ರತೆಗೆ ಹಪಹಪಿಸಿದರೆಂತು 

ಇರುವ ಸಂಬಂಧಗಳ 

ಉಳಿಸಿಕೊಳ್ಳದೆ ದೂರ ಮಾಡಿ

ಆಮೇಲೆ ಪಶ್ಚಾತ್ತಾಪ ಪಟ್ಟರೆಂತು 

ವರ್ತಮಾನದಲ್ಲಿ ಗಮನಿಸದೆ

ಮದದಿಂದ ನಡೆದು 

ಭವಿಷ್ಯದಲ್ಲಿ ಕಂಗಾಲಾದೊಡೆಂತು

ಸಂತೋಷದಲ್ಲಿ ಶಿವನ ನೆನೆಯದೆ 

ದುಗುಡದಲ್ಲಿ ದೆಸೆಗೆಟ್ಟು 

ದಯನೀಯವಾಗಿ ಬೇಡಿಕೊಂಡರೆಂತು

ಯುಗಾದಿಯ ಶುಭಾಶಯ

ಹೊಸ ವರ್ಷದ ಹೊಳಪಿನಲಿ

ಹಳೆಯ ಮಂಕು ಕಳೆಯಲಿ

ಹೊಸ ಬದುಕ ಬೆಳಕಿನಲಿ

ಹಸಿರ ಹೊನಲು ಹರಿಯಲಿ

ಯುಗಾದಿಯ ಶುಭಾಶಯಗಳು

-ಪೂ. ೩೦-೦೩-೨೦೨೫

ಭವ್ಯ ಬೆಳಕು

 

ಮುದುಡಿದ ಹೃದಯದೊಳಗೆ ಹುದುಗಿದ

ನೋವಿನ ಹಂದರದಿ ಅಡಗಿದ ಬೀಜ ಬಿರಿದು

ಮೊಳೆಯಿತೆಲ್ಲೆಡೆ ಚಿಗುರು 

ಉಳಿಯಿತೆಲ್ಲೆಡೆ ಉಸಿರು

ಕಮರಿದ ಮನದಲ್ಲಿ ಮುಚ್ಚಿಟ್ಟ ಬೂದಿ 

ಕದಡಿ ಹೊರ ಚಿಮ್ಮಿದ ಕಮಟು ಸರಿದು

ಅರಳಿತೆಲ್ಲೆಡೆ ಸುಗಂಧ ಪುಷ್ಪ

ಹರಡಿತೆಲ್ಲೆಡೆ ಸುವಾಸನೆ

ಕಟ್ಟುಪಾಡುಗಳ ಕಠಿಣ ಕ್ರಮಗಳ ನಡುವೆ

ಬಿಟ್ಟು ಬಿಡಲಾರದ ಭಾವನೆಗಳು ಮೆರೆದು

ಧರ್ಮ ಒತ್ತಾಗಿ ಉಳಿದವು

ಮರ್ಮ ಒಟ್ಟಾಗಿ ಕಳಿತವು

ಆಕಾಶದಲ್ಲಿ ಹರಡಿದ ಕರಿ ಮೋಡ 

ಗಾಳಿಯೊಂದಿಗೆ ಜೋಲಾಡಿ ನೆಗೆದು

ಚೆಲ್ಲಿತೆಲ್ಲೆಡೆ ನವ್ಯ ನಕ್ಷತ್ರ

ಪ್ರಕಾಶಿಸಿತೆಲ್ಲೆಡೆ ಭವ್ಯ ಬೆಳಕು

ಹೊಸ ಪ್ರೀತಿ

 

ಕಳೆದುಕೊಂಡ ಅಕ್ಕರೆಯ

ಅಕ್ಷರಗಳಲಿ ಕಂಡುಕೊಂಡು

ಹೊಸ ಪ್ರೀತಿ ಬೆಸುಗೆಗೊಂಡ 

ಅವಿಸ್ಮರಣೀಯ ಘಟನೆಯದು

ಬರೆದುದನ್ನು ತಿದ್ದಿ ತೀಡಿ

ಮತ್ತೆ ಮತ್ತೆ ಓದಿ ನೋಡಿ

ಭಾವನೆಗಳ ತೋಡಿ ತೋಡಿ

ಪುಟವನ್ನು ತುಂಬಿಸಿದ ದಿನವದು

ಜ್ಞಾನವನ್ನು ಮಾನವಾಗಿಸಿ

ಮಾನವನ್ನು ಒತ್ತೆಯಿಟ್ಟು

ಮನದಲ್ಲಿ ಸ್ಫುರಿಸಿದುದನ್ನು

ಮಂದಿಗೆ ತಲುಪಿಸಿದ ಕ್ಷಣವದು

ಒಳ್ಳೆಯದೋ ಕೆಟ್ಟದ್ದೋ

ಉಳ್ಳದ್ದೋ ಉಳಿದುದೋ

ಬಂದಂತೇ ಒಪ್ಪಿ ಸ್ವೀಕರಿಸಿದರೆ 

ಅದೇ ಸುಖ ಜೀವನವಹುದು

ಹೋದೆಯಾ

 

ಅಡಿಗಡಿಗೆ ಎದುರಾದ ಅಡ್ಡಿ ಆತಂಕ ಅದುಮಿಟ್ಟು

ಆರ ಬಾಯಿಗೂ ಸಿಕ್ಕದಂತೆ ನೀ ಜಾರಿ ಹೋದೆಯಾ 

ಅಕ್ಕಿ ಚೆಲ್ಲಿದಂತೆ ಬೆಳ್ಳಕ್ಕಿ ಸಾಲನೆಬ್ಬಿಸಿ ಹಾರಿಸಿ

ಬೆರಗಿನ ಬೆಳಕು ತಂದು ನೀ ದೂರ ಹೋದೆಯಾ

ಅಕ್ಕರೆಯ ಅಪರಂಜಿ ಸಕ್ಕರೆಯ ಸವಿ ಸವಿದು

ನಕ್ಕರೆ ಮುತ್ತು ಸುರಿಸಿ ನೀ ಕರಗಿ ಹೋದೆಯಾ

ಬೆಟ್ಟ ಬೆಟ್ಟಗಳ ಹತ್ತಿ ಘಟ್ಟದ ಮಣ್ಣನ್ನು ಮೆಟ್ಟಿ

ಬೊಟ್ಟಿಟ್ಟುಕೊಂಡು ನೀ ಮೈಮರೆತು ಹೋದೆಯಾ

ಮೊಗ್ಗು ಬಿರಿದು ಹೂವಾಗಿ ಹೂ ಮುದುಡಿ ಮಿಡಿಯಾಗಿ

ಕಾಯಿ ಹಣ್ಣಾಗುವವರೆಗೆ ನೀ ಕಾಯದೇ ಹೋದೆಯಾ

ಕ್ರೋಧಕ್ಕೆ ಅಂಕುಶವಿಟ್ಟು ಕೋದಂಡವನ್ನು ಹಿಡಿದು

ಪ್ರೀತಿಯನ್ನು ಪಾವನವಾಗಿಸದೆ ನೀ ಎದ್ದು ಹೋದೆಯಾ

ಪದಗಳಲ್ಲಿ ಪದಗಳನ್ನು ಅರ್ಥದಲ್ಲಿ ಅರ್ಥ ಹುಡುಕುತ್ತಾ

ವ್ಯರ್ಥ ಸಮಯ ಸ್ವಾರ್ಥಕ್ಕೆ ನೀ ಬಲಿಯಾಗಿ ಹೋದೆಯಾ

ಬೆಳ್ಳಿ ಬೆಳಕಾಗಿ ಮಳ್ಳು ಮರೆಯಾಗಿ ಜೊಳ್ಳು ಕೊಡವಿ

ಪೊಳ್ಳ ತಿರಸ್ಕರಿಸಿದಂತೆ ನೀ ಒದ್ದು ಹೋದೆಯಾ

ಹಾದಿಗೆ ಹಾಸಿದ ಹುಲ್ಲಿನಂತೆ ಗಾಳಿಗೆ ತೇಲಿದ ಗರಿಯಂತೆ

ಮಂಜು ಮುಸುಕು ಬಾನಲ್ಲಿ ನೀ ಹಾರಿ ಹೋದೆಯಾ

ಕರೆದರೆ ಬರಲಾರದೆ ಬಂದರೆ ನಿಲಲಾರದೆ ಕೂಗುಗಳಿಗೆ

ಕಿವಿಗೊಡದೆ ನಿಶ್ಯಬ್ದ ನಿರ್ವಾಣಕ್ಕೆ ನೀ ಮೊರೆ ಹೋದೆಯಾ

ಅಗಲಿದವರಿಗೆ ಅರಿವಿಲ್ಲ ಇರುವವರಿಗೆ ನೆಮ್ಮದಿಯಿಲ್ಲ

ಇದ್ದಷ್ಟು ದಿನ ನೆನಪಿನಲ್ಲಿ ನೀ ಕಳೆದು ಹೋದೆಯಾ

ಎಲ್ಲೋ ಏನೋ ಆದಾಗ ಎಲ್ಲೆಯಿಲ್ಲದೇ ನೆರವು ನೀಡಿ

ಎಲ್ಲರ ಹೃದಯದಲ್ಲಿ ನೀ ಉಳಿದು ಹೋದೆಯಾ

ನಿರ್ದಿಷ್ಟ ಹಾದಿಯಲ್ಲಿ ನಿಶ್ಚಿತ ಸಮಯದಲ್ಲಿ

ಅದ್ಭುತ ರೀತಿಯಲ್ಲಿ ನೀ ಸಾಗಿ ಹೋದೆಯಾ

ಅರಳಿದ ಸುಮಗಳಲ್ಲಿ ಅಡರಿದ ಪರಿಮಳದಲ್ಲಿ 

ಸದ್ಗತಿಯರಸುತ್ತ ಅನಂತದಲ್ಲಿ ನೀ ಲೀನವಾದೆಯಾ

ಸಂಕ್ರಾಂತಿಯ ಶುಭಾಶಯ

ಎಳ್ಳು-ಬೆಲ್ಲ ಎಲ್ಲೆಡೆಯಲ್ಲಿ

ಒಳ್ಳೆಯ ಮಾತು ಬಾಯಿಯಲ್ಲಿ

ಸುಖ ಶಾಂತಿ ಜೀವನದಲ್ಲಿ.

ಸಂಕ್ರಾಂತಿಯ ಶುಭಾಶಯ.

- ಫೂ. 

14-01-2025