ಬೆಕ್ಕಿನ ಬಿಡಾರ

ಅಕ್ಕ ನಿನ್ನ ಬೆಕ್ಕಿಗೊಂದು ಬೇರೆ ಬಿಡಾರ

ಪಕ್ಕದಲ್ಲಿ ಹಾಸಿಕೊಂಡು ನಿನ್ನ ಗುಡಾರ

ಸಿಕ್ಕದಂತೆ ಕುಳಿತೆ ಏಕೆ ಬಹು ದೂರ

ಲೆಕ್ಕಕಿಲ್ಲ ಆಟಕಿಲ್ಲ ಎಂಬ ವಿಚಾರ

ಅರಿತ ಮೇಲೂ ಕಲಿತ ನೀನು ಏಗುವಿಯೇಕೇ

ಸರಿತಪ್ಪು ಗೊತ್ತಿದ್ದೂ ಕುಗ್ಗುವಿಯೇಕೆ

ಪರಿಪರಿಯ ಬೇಡಿಕೆಗೆ ಬಗ್ಗುವಿಯೇಕೆ

ಬರಿದೇ ಅಳತೆಯನ್ನು ಮೀರಿ ತಗ್ಗುವಿಯೇಕೆ

ಏಗಿದರೆ ಬೀಗುವರು 

ಕುಗ್ಗಿದರೆ ಕಿಸಿಯುವರು

ಬಗ್ಗಿದರೆ ಗುದ್ದುವರು 

ತಗ್ಗಿದರೆ ತುಳಿಯುವರು 

ಅರಿತುಕೊಂಡು ಜಗದ ಪರಿಯ

ಬೆರೆತುಕೊಂಡು ಎಲ್ಲರೊಡನೆ

ಮರೆತು ಬಾಳು ಕಹಿಯನೆಲ್ಲ

ಅನುಭವಿಸು ಸಿಹಿಯನೆಲ್ಲ