ದೊಡ್ಡ ಜೀವಿ

ದೊಡ್ಡ ಕಿವಿ ದೊಡ್ಡ ಜೀವಿ

ಅಂದಚೆಂದ ಇದರ ಠೀವಿ

ದೊಡ್ಡ ಕಾಲು, ಕಪ್ಪು ಬಾಲ

ನೋಡಲೆರಡು ಕಣ್ಣು ಸಾಲ

ಅಗಾಧವಿದು ದೇಹದಲ್ಲಿ

ಜಾಣ್ಮೆಯಲ್ಲಿ ಕೃತಿಯಲ್ಲಿ

ಕರುಣೆಯಲ್ಲಿ ಪ್ರೀತಿಯಲ್ಲಿ

ಸ್ನೇಹದಲ್ಲಿ ಸೌಂದರ್ಯದಲ್ಲಿ

ಬುದ್ಧಿವಂತ ಪ್ರಾಣಿಯಿದು

ಭಾವನೆಗಳ ಭಾಂಡಾರವಿದು

ದೀರ್ಘ ಬಸಿರು ಇದರದು

ಹಸಿರನರಸಿ ನಡೆವುದು

ಇದು ನಡೆದದ್ದೇ ದಾರಿ

ಇದರದು ಎಂದಿಗೂ ಒಂದೇ ದಾರಿ

ಸಾಗುವುದು ಕಾಡುದಿಣ್ಣೆಗಳನೇರಿ 

ಜೊತೆಜೊತೆಗೇ ಇರುವುದದರ ಮರಿ

ಪುರಾಣದಲ್ಲಿ ಗಣಪಗೆ

ತಲೆಯನ್ನು ನೀಡಿತು

ವರ್ತಮಾನದಲ್ಲಿ ಮನುಜನ 

ದುರಾಸೆಗೆ ಬಲಿಯಾಯಿತು

ನಿಷ್ಕಲ್ಮಶ, ಸ್ವಚ್ಛಂದ ಗುಣ 

ಹೊಂದಿರುವುದೇ ಮುಳ್ಳಾಯಿತು 

ತನ್ನದಲ್ಲದ ತಪ್ಪಿಗೆ ಪಾಪ, 

ಮನುಜನ ಆಳಾಯಿತು

 

ಮನುಜನನ್ನು ಹೊರುವುದು

ಮನುಜನಿಗಾಗಿ ಸವೆಯುವುದು

ಮನುಜನಿಂದಾಗಿ ಸಾಯುವುದು

ವಿಧಿಯೇ, ಯಾಕೆ ಹೀಗಾಗುವುದು!